നീറ്റ് പരീക്ഷാ ക്രമക്കേടുകള്ക്കും രാജ്യത്ത് വർദ്ധിച്ചുവരുന്ന തൊഴിലില്ലായ്മയ്ക്കുമെതിരെ രാജസ്ഥാനിലെ ജയ്പൂരില് സംഘടിപ്പിച്ച വൻ പ്രതിഷേധത്തിനിടെ നാടകീയ രംഗങ്ങള് അരങ്ങേറി.സോഷ്യല് മീഡിയയിലൂടെ ശ്രദ്ധേയമായ യുവജന കൂട്ടായ്മയായ ‘കോക്രോച്ച് ജനതാ പാർട്ടി’ സ്ഥാപകൻ അഭിജീത് ദിപ്കെയ്ക്ക് നേരെയാണ് ഒരു കൂട്ടം യുവാക്കള് മർദനം അഴിച്ചുവിട്ടത്. ജയ്പൂരിലെ പ്രശസ്തമായ ഷഹീദ് സ്മാരകില് ഒത്തുകൂടിയ ആയിരക്കണക്കിന് യുവാക്കളെ അഭിസംബോധന ചെയ്യാൻ എത്തിയതായിരുന്നു അദ്ദേഹം. ജനക്കൂട്ടത്തിന് നടുവിലൂടെ അനുകൂലികളുടെ തോളിലേറി വേദിയിലേക്ക് നീങ്ങുന്നതിനിടെയാണ് ചിലർ പെട്ടെന്ന് ഇദ്ദേഹത്തിന്റെ നേരെ തിരിയുകയും മുഖത്ത് പലതവണ അടിക്കുകയും ചെയ്തത്.സോഷ്യല് മീഡിയയില് ഈ സംഭവത്തിന്റെ ദൃശ്യങ്ങള് വ്യാപകമായി പ്രചരിക്കുന്നുണ്ട്. അപ്രതീക്ഷിതമായി ഉണ്ടായ ആക്രമണത്തെ തുടർന്ന് സ്ഥലത്ത് വലിയ രീതിയിലുള്ള സംഘർഷാവസ്ഥ ഉടലെടുത്തു.
അഭിജീത് ദിപ്കെയെ മർദിച്ച യുവാക്കളെ സിജെപി പ്രവർത്തകർ ഉടൻ തന്നെ തടഞ്ഞുവെക്കുകയും കൈയേറ്റം ചെയ്യുകയും ചെയ്തു. തുടർന്ന് സ്ഥലത്തുണ്ടായിരുന്ന പോലീസ് ഉദ്യോഗസ്ഥർ ഇടപെട്ടാണ് സ്ഥിതിഗതികള് ശാന്തമാക്കിയത്. അക്രമവുമായി ബന്ധപ്പെട്ട് രണ്ട് യുവാക്കളെ പോലീസ് നിലവില് കസ്റ്റഡിയിലെടുത്തിട്ടുണ്ട്. ഇവരെ ചോദ്യം ചെയ്തുവരികയാണെന്നും സംഭവത്തില് വിശദമായ അന്വേഷണം ആരംഭിച്ചതായും ജയ്പൂർ പോലീസ് ഔദ്യോഗികമായി സ്ഥിരീകരിച്ചു.രാജ്യവ്യാപകമായി കനക്കുന്ന പ്രതിഷേധംകേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാന്റെ രാജി ആവശ്യപ്പെട്ടാണ് കോക്രോച്ച് ജനതാ പാർട്ടി രാജ്യവ്യാപകമായി പ്രക്ഷോഭം ആരംഭിച്ചിരിക്കുന്നത്. നീറ്റ് പരീക്ഷാ പേപ്പർ ചോർച്ചയും മറ്റ് പരീക്ഷാ ക്രമക്കേടുകളും രാജ്യത്തെ വിദ്യാഭ്യാസ വ്യവസ്ഥിതിയുടെ കടുത്ത പരാജയമാണ് കാണിക്കുന്നതെന്നും ഇതിന് ഉത്തരവാദികളായവർ മറുപടി പറയണമെന്നുമാണ് പ്രതിഷേധക്കാരുടെ ആവശ്യം.
അഴിമതിക്കെതിരെയും യുവജനങ്ങളുടെ അവകാശങ്ങള്ക്ക് വേണ്ടിയും വിവിധ നഗരങ്ങളില് വരും ദിവസങ്ങളിലും ശക്തമായ സമര പരിപാടികള് തുടരുമെന്ന് പാർട്ടി ഭാരവാഹികള് വ്യക്തമാക്കിയിട്ടുണ്ട്.ജയ്പൂരിലെ സമരത്തിന് മുന്നോടിയായി കർണാടകയിലെ ബംഗളൂരുവിലും സിജെപിയുടെ നേതൃത്വത്തില് വൻ പ്രതിഷേധം അരങ്ങേറിയിരുന്നു. ബംഗളൂരു ഫ്രീഡം പാർക്കില് കനത്ത മഴയെപ്പോലും അവഗണിച്ച് ആയിരക്കണക്കിന് വിദ്യാർത്ഥികളും യുവാക്കളുമാണ് ഒത്തുകൂടിയത്. കേന്ദ്ര സർക്കാരിന്റെ പരാജയങ്ങള്ക്കെതിരെ കടുത്ത മുദ്രാവാക്യങ്ങളാണ് സമരത്തില് ഉയർന്നത്. പ്രശസ്ത ചലച്ചിത്ര താരം പ്രകാശ് രാജ് ബംഗളൂരുവില് നടന്ന ഈ പ്രതിഷേധത്തില് നേരിട്ടെത്തി യുവാക്കള്ക്ക് പിന്തുണ പ്രഖ്യാപിച്ചു. പരീക്ഷാ തട്ടിപ്പുകള് തដയുന്നതില് പരാജയപ്പെട്ട കേന്ദ്ര ഭരണകൂടം വിദ്യാർത്ഥികളുടെ ഭാവി വെച്ചാണ് പന്താടുന്നതെന്ന് അദ്ദേഹം കുറ്റപ്പെടുത്തി. വിവിധ വിദ്യാർത്ഥി സംഘടനകളും യുവജന കൂട്ടായ്മകളും ഈ പോരാട്ടത്തില് പങ്കാളികളായിട്ടുണ്ട്.
