ബെംഗളൂരു: തമിഴ്നാടിൻ്റെ എതിർപ്പ് അവഗണിച്ച് കാവേരി നദിക്ക് കുറുകെ നിർമിക്കാൻ ഉദ്ദേശിക്കുന്ന മെക്കെദാട്ടു അണക്കെട്ട് പദ്ധതിയുമായി മുന്നോട്ട് പോകാനുള്ള നിർദേശം നല്കി കർണാടക മുഖ്യമന്ത്രി ഡികെ ശിവകുമാർ.പദ്ധതിയുമായി ബന്ധപ്പെട്ട സാങ്കേതിക കുറവുകള് പരിഹരിക്കണമെന്ന് ഉദ്യോഗസ്ഥർക്ക് നിർദേശം നല്കിയ മുഖ്യമന്ത്രി പദ്ധതി വൈകിപ്പിക്കുന്നതിനായി തമിഴ്നാട് സർക്കാർ സുപ്രീം കോടതിയില് “ചെറിയ കാരണങ്ങള്” ഉന്നയിച്ച് എതിർപ്പുകള് ഉന്നയിക്കാൻ ശ്രമിക്കുകയാണെന്ന് മുഖ്യമന്ത്രി ആരോപിച്ചു.മെക്കെദാട്ടു അണക്കെട്ട് പദ്ധതിയുമായി ബന്ധപ്പെട്ട നിർദേശത്തില് ഏതെങ്കിലും തരത്തിലുള്ള ചെറിയ സാങ്കേതിക പ്രശ്നങ്ങള് നിലവിലുണ്ടോ എന്ന് പരിശോധിക്കണം. അത്തരത്തിലുള്ള പ്രശ്നങ്ങള് കണ്ടെത്തി ഉദ്യോഗസ്ഥർ പരിഹരിക്കണം.
എതിർപ്പുകള് ഫലപ്രദമായി നേരിടാൻ കഴിയുന്ന തരത്തില് സാങ്കേതിക പ്രശ്നങ്ങള് പരിഹരിക്കണമെന്ന് വിധാൻ സൗധയില് നടന്ന കർണാടക സംസ്ഥാന വന്യജീവി ബോർഡിന്റെ സ്റ്റാൻഡിങ് കമ്മിറ്റി യോഗത്തില് അധ്യക്ഷത വഹിച്ച ശിവകുമാർ ഉദ്യോഗസ്ഥർക്ക് നിർദേശം നല്കി.ബന്ദിപ്പൂർ, നാഗരഹോള ദേശീയോദ്യാനങ്ങളില് കർശനമായ സുരക്ഷാ നടപടികളോടെ സഫാരി – ഇക്കോ ടൂറിസം പ്രവർത്തനങ്ങള് പുനരാരംഭിക്കാനും മുഖ്യമന്ത്രി യോഗത്തില് ഉത്തരവിട്ടു. കടുത്ത മനുഷ്യ വന്യജീവി സംഘർഷം നിലനില്ക്കുന്ന പ്രദേശങ്ങളെ അപേക്ഷിച്ച് നിയുക്ത സഫാരി മേഖലകളിലെ കടുവ, പുള്ളിപ്പുലി സാന്ദ്രത കൂടുതലാണെന്ന് ഉദ്യോഗസ്ഥർ യോഗത്തില് പറഞ്ഞു. സഫാരി പ്രവർത്തനങ്ങള് പുനരാരംഭിക്കുമ്പോള് വിനോദസഞ്ചാരികളുടെ സുരക്ഷയില് വിട്ടുവീഴ്ച ചെയ്യരുതെന്ന് ശിവകുമാർ ഉദ്യോഗസ്ഥർക്ക് നിർദേശം നല്കി.ബെംഗളൂരു സൗത്ത് ജില്ലയിലെ രാമനഗര, ചന്നപട്ടണ താലൂക്കുകളില് വർധിച്ചുവരുന്ന മനുഷ്യ വന്യജീവി സംഘർഷത്തെക്കുറിച്ചും യോഗം ചർച്ച ചെയ്തു.
ബിഎംഐസി ഇടനാഴി ആനകളുടെയും കടുവകളുടെയും പുള്ളിപ്പുലികളുടെയും പരമ്പരാഗത സഞ്ചാര പാതകളെ തടസ്സപ്പെടുത്തിയെന്നും, വന്യജീവികളെ വനങ്ങളില് നിന്ന് മനുഷ്യവാസ കേന്ദ്രങ്ങളിലേക്ക് മാറ്റാൻ നിർബന്ധിതരാക്കിയെന്നും വനംവകുപ്പ് ഉദ്യോഗസ്ഥർ പറഞ്ഞു.ബെംഗളൂരു മൈസൂരു എക്സ്പ്രസ് വേയ്ക്കുള്ള ക്ലിയറൻസില് അണ്ടർപാസുകള്, ഓവർപാസുകള്, വന്യജീവി ഇടനാഴികള് എന്നിവ നല്കുന്നതിനുള്ള വ്യവസ്ഥകള് ഉള്പ്പെടുത്തിയിരുന്നെങ്കിലും, നിർമാണ സമയത്ത് ഈ വ്യവസ്ഥകള് പൂർണമായും നടപ്പാക്കിയില്ലെന്നും ഉദ്യോഗസ്ഥർ ചൂണ്ടിക്കാട്ടി.പൊതു സുരക്ഷയ്ക്ക് മുൻകാല നിർദേശങ്ങള് നടപ്പിലാക്കുന്നതില് കാലതാമസം നേരിടുന്നതായി സ്റ്റാൻഡിംഗ് കമ്മിറ്റി അംഗങ്ങള് ചൂണ്ടിക്കാട്ടിയതിനെത്തുടർന്ന് ഗ്രേറ്റർ ബെംഗളൂരു ഏരിയയിലെ അപകടകരമായ മരങ്ങളും ശിഖരങ്ങളും അടിയന്തിരമായി കണ്ടെത്തി നീക്കം ചെയ്യണമെന്നും മുഖ്യമന്ത്രി ഡികെ ശിവകുമാർ ഉദ്യോഗസ്ഥർക്ക് നിർദേശം നല്കി.
