ബെംഗളൂരു: ഐടി നഗരമായ ബെംഗളൂരുവിൻ്റെ ഗതാഗത സംവിധാനത്തിന് കരുത്തുപകരുന്ന നമ്മ മെട്രോ യെല്ലോ ലൈൻ വൈകാതെ തുറക്കുമെന്ന് റിപ്പോർട്ട്. ആർവി റോഡ് മുതൽ ബൊമ്മസാന്ദ്ര വരെയുള്ള 19 കിലോമീറ്റർ യെല്ലോ ലൈൻ ഇലക്ട്രോണിക്സ് സിറ്റിയിലേക്കുള്ള യാത്ര സുഗമമാക്കും എന്നതാണ് പ്രത്യേകത. ഇൻഫോസിസ്, ബയോകോൺ തുടങ്ങിയ കമ്പനികളുടെ ആസ്ഥാനമായ ഇലക്ട്രോണിക്സ് സിറ്റിയുമായി ബന്ധിപ്പിച്ചുള്ള റൂട്ടിൽ റെക്കോഡ് യാത്രക്കാരെയാണ് ബാംഗ്ലൂർ മെട്രോ റെയിൽ കോർപറേഷൻ ലിമിറ്റഡ് (ബിഎംആർസിഎൽ) പ്രതീക്ഷിക്കുന്നത്.
2017ൽ ആരംഭിച്ച യെല്ലോ ലൈനിന്റെ നിർമാണം അവസാനഘട്ടത്തിലാണ്. ബെംഗളൂരു നഗരത്തിലെ മെട്രോ ശൃംഖല ശക്തിപ്പെടുത്താനും ഗതാഗതക്കുരുക്ക് ലഘൂകരിക്കാനും യെല്ലൊ ലൈന് സാധിക്കും. ഏറ്റവും പുതിയ റിപ്പോർട്ടുകൾ പ്രകാരം മെയ് അവസാനം അല്ലെങ്കിൽ ജൂൺ ആദ്യത്തോടെ യെല്ലോ ലൈനിൽ ഡ്രൈവർരഹിത ട്രെയിൻ സർവീസ് നടത്തും. മൂന്ന് അല്ലെങ്കിൽ നാല് ട്രെയിനുകളുമായി ആദ്യഘട്ടത്തിൽ സർവീസ് ആരംഭിക്കാനാണ് ലക്ഷ്യമിടുന്നത്.
യെല്ലോ ലൈനിലേക്കുള്ള മൂന്നാമത്തെ ട്രെയിൻ സെറ്റ് ചൊവ്വാഴ്ച രാത്രി ബിഎംആർസിഎല്ലിന് ലഭിച്ചു. ആറ് ബോഗികളുള്ള ട്രെയിൻ സെറ്റ് ഇലക്ട്രോണിക്സ് സിറ്റിക്ക് സമീപത്തെ ഹെബ്ബഗോഡി ഡിപ്പോയിൽ എത്തിച്ചതായി ബിഎംആർസിഎൽ അറിയിച്ചു. വൈകാതെ ട്രെയിൻ സെറ്റുകൾ സർവീസിന് സജ്ജമാക്കും. മെട്രോ റെയിൽ സേഫ്റ്റി കമ്മീഷണറുടെ പരിശോധനയുണ്ടാകും. ജൂലൈ അവസാനത്തോടെയോ ഓഗസ്റ്റ് ആദ്യമോ രണ്ട് സെറ്റ് ട്രെയിനുകൾ കൂടി ലഭിച്ചേക്കുമെന്ന് ബിഎംആർസിഎൽ അറിയിച്ചു.
ഏറ്റവും പുതിയ റിപ്പോർട്ടുകൾ പ്രകാരം മൂന്ന് അല്ലെങ്കിൽ നാല് ട്രെയിനുകളുമായി 30 മിനിറ്റ് ഇടവേളയിൽ യെല്ലോ ലൈനിൽ സർവീസ് നടത്താനാണ് ബിഎംആർസിഎൽ ലക്ഷ്യമിടുന്നത്. ആർവി റോഡ്, ജയദേവ ആശുപത്രി, സെൻട്രൽ സിൽക്ക് ബോർഡ്, ഇൻഫോസിസ്, ബൊമ്മസാന്ദ്ര എന്നീ സ്റ്റേഷനുകളിൽ ട്രെയിന് സ്റ്റോപ്പ് ഉണ്ടാകും. കൂടുതൽ ട്രെയിനുകൾ എത്തിയാൽ എല്ലാ സ്റ്റേഷനുകളിലും സ്റ്റോപ്പ് ഉണ്ടാകും. 2024 മാർച്ച് 7ന് യെല്ലോ ലൈനിൽ ബിഎംആർസിഎൽ സ്ലോ ട്രയൽ റൺ ആരംഭിച്ചിരുന്നു. രണ്ട് ട്രെയിനുകൾ ഉപയോഗിച്ചാണ് ട്രയൽ റൺ തുടരുന്നത്.
ട്രെയിൻ സെറ്റുകൾ നിർമിക്കുന്ന ടിറ്റാഗഡ് റെയിൽ സിസ്റ്റംസ് ലിമിറ്റഡ് 2025 ജനുവരി ആറിന് ആദ്യ ഡ്രൈവർരഹിത ട്രെയിൻ പുറത്തിറക്കിയിരുന്നു. യെല്ലോ ലൈൻ 2021 ഡിസംബറിൽ പ്രവർത്തനക്ഷമമാക്കാൻ തീരുമാനിച്ചിരുന്നുവെങ്കിലും കൊവിഡ് ഉൾപ്പെടെയുള്ള പല കാരണങ്ങളാൽ പദ്ധതി വൈകുകയായിരുന്നു.
