ബംഗളൂരു: കർക്കടക മാസത്തെ വരവേല്ക്കാനൊരുങ്ങി കർണാടകയിലെ പ്രവാസി മലയാളികള്. ചൊവ്വാഴ്ച മുതല് ഒരു മാസം നീളുന്ന രാമായണ പാരായണത്തിന്റെ നാളുകളാണ്.
വിവിധ സംഘടനകള്ക്ക് കീഴില് രാമായണ മാസാചരണം സംഘടിപ്പിക്കും. ആഗസ്റ്റ് മൂന്നിന് കർക്കടക വാവ് ദിനത്തില് വിവിധയിടങ്ങളില് പിതൃതർപ്പണ ചടങ്ങുകളും നടക്കും.
രാമായണ മാസാചരണം
കർണാടക നായർ സർവിസ് സൊസൈറ്റിയുടെ വിവിധ കരയോഗങ്ങളില് കർക്കടക മാസം ഒന്നു മുതല് ഒരു മാസം നീണ്ടുനില്ക്കുന്ന രാമായണ പാരായണം സംഘടിപ്പിക്കുന്നു. ദാസറഹള്ളി കരയോഗം മഹിള വിഭാഗം ചൈതന്യയുടെ ആഭിമുഖ്യത്തില് ജൂലൈ 16ന് രാവിലെ 9ന് സന്തോഷ് നഗറിലുള്ള കരയോഗം ഓഫിസില് ആരംഭിക്കും. ആദ്യ അഞ്ചു ദിവസങ്ങളില് കരയോഗം ഓഫിസില് പാരായണം ചെയ്തതിനുശേഷം രജിസ്റ്റർ ചെയ്യുന്ന അംഗങ്ങളുടെ വീടുകളിലും പാരായണം നടത്തുന്നതാണ്. ആഗസ്റ്റ് 15ന് സമാപന ദിവസം രാവിലെ മുതല് കരയോഗം ഓഫിസില് രാമായണ പാരായണവും പട്ടാഭിഷേക പൂജയും ഉണ്ടായിരിക്കുന്നതാണ്.
എം.എസ് നഗർ കരയോഗത്തിന്റെ നേതൃത്വത്തില് ഒരു മാസം നീണ്ടുനില്ക്കുന്ന രാമായണ പാരായണം 16ന് വൈകീട്ട് കരയോഗം ഓഫിസില് സർവ ഐശ്വര്യ പൂജയോടുകൂടി ആരംഭിച്ചു. തുടർന്നുള്ള ദിവസങ്ങളില് അംഗങ്ങളുടെ വീടുകളില് ദിവസേന പാരായണം ഉണ്ടായിരിക്കും. സമാപന ദിവസമായ ആഗസ്റ്റ് 16ന് നടക്കുന്ന പാരായണ യജ്ഞത്തിനും, പട്ടാഭിഷേക പൂജകള്ക്കും കെ.കെ. നായർ മുഖ്യ കാർമികത്വം വഹിക്കും.
തിപ്പസാന്ദ്ര സി.വി. രാമൻ നഗർ കരയോഗം മഹിള വിഭാഗം പഞ്ചമിയുടെ ആഭിമുഖ്യത്തില് ജൂലൈ 16ന് വൈകീട്ട് 6ന് രാമായണ പാരായണ പൂജകള് ആരംഭിക്കും. വിമാനപുര കരയോഗം മഹിള വിഭാഗം ജയാധാരയുടെ ആഭിമുഖ്യത്തില് ജൂലൈ 16ന് വൈകീട്ട് 5ന് കരയോഗം ഓഫിസ് മന്നം മെമ്മോറിയല് ഹാളില് പാരായണം ആരംഭിക്കും. തുടർന്നുള്ള ദിവസങ്ങളില് അംഗങ്ങളുടെ വീടുകളില് പാരായണം ചെയ്യുന്നതാണ്. വിവേക് നഗർ കരയോഗം മഹിള വിഭാഗം ത്രിവേണിയുടെ നേതൃത്വത്തില് ജൂലൈ 16ന് രാമായണ പാരായണം ആരംഭിക്കും. തുടർന്നുള്ള എല്ലാ ശനി ഞായർ ദിവസങ്ങളില് കരയോഗം ഓഫിസില് പാരായണം ഉണ്ടായിരിക്കുന്നതാണ്.
മഹാദേവപുര കരയോഗത്തിന്റെ നേതൃത്വത്തില് ആഗസ്റ്റ് 15ന് കരയോഗം ഓഫിസില് വെച്ച് പാരായണം സംഘടിപ്പിക്കുന്നു. അബ്ബിഗരെ ഷെട്ടിഹള്ളി കരയോഗത്തിന്റെ ആഭിമുഖ്യത്തില് ജൂലൈ 16 മുതല് ആഗസ്റ്റ് 15 വരെ കരയോഗം ഓഫിസിലും അംഗങ്ങളുടെ ഭവനങ്ങളിലും രാമായണ പാരായണം സംഘടിപ്പിക്കും. സമാപന ദിവസം ചടങ്ങുകള് കരയോഗം ഓഫിസില് നടക്കും.
ജയമഹല് കരയോഗം മഹിള വിഭാഗം ജ്യോതിയുടെ നേതൃത്വത്തില് ജൂലൈ 16ന് കരയോഗം ഓഫിസില് രാമായണ പാരായണം പൂജകള് ആരംഭിക്കും. തുടർന്നുള്ള ദിവസങ്ങളില് അംഗങ്ങളുടെ വീടുകളിലും പാരായണം സംഘടിപ്പിക്കും.ബൊമ്മനഹള്ളി കരയോഗം മഹിള വിഭാഗം കാവേരിയുടെ നേതൃത്വത്തില് പാരായണ പൂജകള് സംഘടിപ്പിക്കുന്നു. ആഗസ്റ്റ് 11ന് കോടിചിക്കാനാഹള്ളി മഹാവീർ മാർവെല് അപാർട്മെന്റ് ക്ലബ് ഹൗസില് വെച്ച് മുഴുദിന രാമായണ പാരായണവും ഉണ്ടായിരിക്കുന്നതാണ്.മല്ലേശ്വരം കരയോഗം മഹിള വിഭാഗം മംഗളയുടെ നേതൃത്വത്തില് ജൂലൈ 16ന് രാവിലെ 10.30ന് കരയോഗം ഓഫിസില് പാരായണം സംഘടിപ്പിക്കും.
സർജാപുര കരയോഗം മഹിള വിഭാഗം സരയുവിന്റെ നേതൃത്വത്തില് ജൂലൈ 16 മുതല് ഒരു മാസം അംഗങ്ങളുടെ വീടുകളില് പാരായണം സംഘടിപ്പിക്കും. വൈറ്റ്ഫീല്ഡ് കരയോഗം മഹിള വിഭാഗത്തിന്റെ നേതൃത്വത്തില് 16 മുതല് രാമായണ പാരായണം ആരംഭിക്കും, തുടർന്നുള്ള ശനി, ഞായർ ദിവസങ്ങളില് വൈകീട്ട് അംഗങ്ങളുടെ വീടുകളിലും പാരായണം നടത്തും. ഹോറമാവു കരയോഗത്തിന്റെ നേതൃത്വത്തില് പാരായണ മാസാചരണം 16 മുതല് ആഗസ്റ്റ് 16 വരെ സംഘടിപ്പിക്കുന്നു. പട്ടാഭിഷേക പൂജകള് ആഗസ്റ്റ് 15ന് കരയോഗം ഓഫിസില് സംഘടിപ്പിക്കും.
കർക്കടക വാവുബലി
ബംഗളൂരു: ശ്രീനാരായണ സമിതിക്കു കീഴില് കർക്കടക അമാവാസി പിതൃതർപ്പണ ചടങ്ങിന് ഒരുക്കങ്ങള് പുരോഗമിക്കുന്നതായി ഭാരവാഹികള് അറിയിച്ചു. ആഗസ്റ്റ് മൂന്നിനാണ് ബലിതർപ്പണ ചടങ്ങ്. തുടർച്ചയായി 25ാം വർഷമാണ് ശ്രീനാരായണ സമിതിക്കുകീഴില് ബംഗളൂരുവില് ബലിതർപ്പണ സൗകര്യമൊരുക്കുന്നത്. അള്സൂർ തടാകത്തിലെ കല്യാണി തീർഥത്തില് നടക്കുന്ന ചടങ്ങില് 700ലേറെ പേർക്ക് ഒരേസമയം ബലിതർപ്പണ ചടങ്ങുകളില് പങ്കെടുക്കാനാവും. 5000 പേരെയാണ് പ്രതീക്ഷിക്കുന്നതെന്ന് ഭാരവാഹികള് പറഞ്ഞു. ദൂരദിക്കുകളില് നിന്നെത്തുന്നവർക്ക് പ്രഭാത ഭക്ഷണം, താമസ സൗകര്യം തുടങ്ങിയവയും ഒരുക്കും.
പുലർച്ച മൂന്നിന് മഹാഗണപതി ഹോമത്തോടെ ചടങ്ങുകള് ആരംഭിക്കും. തുടർന്ന് കല്യാണി തീർഥത്തില് ഗംഗാ പൂജ നടക്കും. രാവിലെ 10 വരെ
പിതൃതർപ്പണ ചടങ്ങുകള് നടക്കും. വഴിപാടുകള്ക്ക് സൗകര്യമുണ്ടാകും. സമിതി പൂജാരിമാർ ചടങ്ങുകള്ക്ക് കാർമികത്വം വഹിക്കും. ആഗസ്റ്റ് മൂന്നിന് ബലിയിടാൻ കഴിയാത്തവർക്ക് പിറ്റേന്ന് സൗകര്യമൊരുക്കും. നാലിന് ബലിയിടാൻ ആഗ്രഹിക്കുന്നവർ മുൻകൂട്ടി അറിയിക്കണം. ഫോണ്: 080 25510277, 9383433110. ബംഗളൂരു: യദിയൂർ വൈദികകേന്ദ്രത്തിന്റെ ആഭിമുഖ്യത്തില് കർക്കടക വാവുബലി ആഗസ്റ്റ് മൂന്നിന് ജയനഗറിലെ യദിയൂർ തടാകതീരത്ത് നടക്കും. പുലർച്ച നാലിന് ഗണപതി ഹോമത്തോടെ ചടങ്ങുകള് ആരംഭിക്കും. തുടർന്ന് പിണ്ഡ നിമജ്ജന പുണ്യകുളത്തില് ഗംഗാ പൂജ നടത്തും.
4.30ന് 100 പേർ അടങ്ങുന്ന ആദ്യ ബാച്ചിന് തർപ്പണം ആരംഭിക്കും. മനോജ് വിശ്വനാഥ പൂജാരി മുഖ്യകാർമികത്വവും ഷിജില് ശാന്തി സഹകാർമികത്വവും വഹിക്കും. ഭക്തർക്ക് പിതൃ നമസ്കാരം, കൂട്ടനമസ്കാരം, തിലഹവനം, ഗണപതി ഹോമം, അന്നദാനം, ഭക്ഷ്യധാന്യ കിറ്റ് വിതരണം എന്നീ വഴിപാടുകള് നടത്തുവാനും സൗകര്യമൊരുക്കിയതായി ഭാരവാഹികള് അറിയിച്ചു. ഫോണ്: 9341240876.
