കൊല്ക്കത്ത:ഇന്ത്യയിലെ ആദ്യ അണ്ടർ വാട്ടർ മെട്രോയായ കൊല്ക്കത്ത മെട്രോയുടെ ഹൗറ മൈതാൻ -എസ്പ്ലാനോഡ് സെക്ഷൻ പ്രധാനമന്ത്രി നരേന്ദ്രമോദി നാളെ ഉദ്ഘാടനം ചെയ്യും.
ആകെ 16.6 കിലോമീറ്റർ ദൂരം വരുന്ന പദ്ധതിയിലെ മെട്രോ ടണല് നിർമിച്ചിരിക്കുന്നത് ഹൂഗ്ലി നദിയിലാണ്. കൊല്ക്കത്തയുടെ ഇരട്ടനഗരങ്ങളായ ഹൗറയെയും സാള്ട്ട് ലേക്കിനെയുമാണ് പാത ബന്ധിപ്പിക്കുക.ഹൂഗ്ലി നദിയുടെ കിഴക്കും പടിഞ്ഞാറുമായാണ് ഹൗറയും സാള്ട്ട് ലേക്ക് നഗരവും സ്ഥിതി ചെയ്യുന്നത്. അണ്ടർ ഗ്രൗണ്ടിലുള്ള മൂന്നെണ്ണമടക്കം ആറ് സ്റ്റേഷനുകളാണ് പാതയിലുണ്ടാകുക. ഹൗറ മൈതാൻ, ഹൗറ സ്റ്റേഷൻ കോംപ്ലക്സ്, ബിബിഡി ബാഗ് (മഹാകരണ്) എന്നിവയാണ് ഈസ്റ്റ് -വെസ്റ്റ് മെട്രോയുടെ ഗ്രീൻ ലൈനിലെ മൂന്നു സ്റ്റേഷനുകള്.
മണിക്കൂറില് 80 കിലോമീറ്റർ വേഗത്തിലാണ് മെട്രോ ഓടുക. അത് ഹൂഗ്ലിയിലെ ഭാഗം 45 സെക്കൻഡ് കൊണ്ട് മറികടക്കും. പ്രധാനമന്ത്രി ഉദ്ഘാടനം ചെയ്യുന്ന ദിവസം തന്നെ പൊതുജനങ്ങള്ക്കായി മെട്രോ യാത്ര നടത്താൻ അവസരം ലഭിക്കും.
കൊല്ക്കത്ത മെട്രോ റെയില് കോർപറേഷൻ ലിമിറ്റഡാണ് (കെഎംആർസിഎല്) പദ്ധതി നടപ്പാക്കുന്നത്. നിലവില് കൊല്ക്കത്ത മെട്രോക്ക് മൂന്നു ലൈനുകളാണുള്ളത്. ദക്ഷിണേശ്വർ മുതല് കവി സുഭാഷ്, സാള്ട്ട് ലേക്ക് സെക്ടർ അഞ്ച് മുതല് സീല്ദാ, ജോക മുതല് താർതല എന്നിങ്ങനെയാണ് ഈ ലൈനുകള്. മറ്റു മൂന്നു ലൈനുകള് നിർമാണത്തിലാണുള്ളത്.
കൊല്ക്കത്ത അണ്ടർ വാട്ടർ മെട്രോ പദ്ധതിയുടെ പ്രത്യേകതകള്
- കൊല്ക്കത്ത മെട്രോയുടെ ഹൗറ മൈതാനം-എസ്പ്ലനേഡ് സെക്ഷനിലാണ് അണ്ടർ വാട്ടർ മെട്രോ സൗകര്യം ആസ്വദിക്കാനാകുക. ഹൗറ മൈതാൻ-എസ്പ്ലനേഡ് ഭാഗം ഹൂഗ്ലി നദിയിലാണ് സ്ഥിതി ചെയ്യുന്നത്. ഈ സെക്ഷനില്പ്പെട്ട ഹൗറയാണ് ഇന്ത്യയിലെ ഏറ്റവും ആഴമേറിയ മെട്രോ സ്റ്റേഷൻ. 33 മീറ്ററാണ് ഇവിടുത്തെ ആഴം.
- 2023 ഏപ്രിലില് ഹൂഗ്ലി നദിക്ക് താഴെയുള്ള തുരങ്കത്തിലൂടെ പരീക്ഷണാടിസ്ഥാനത്തില് ട്രയിൻ ഓടിച്ച് കൊല്ക്കത്ത മെട്രോ ചരിത്രം സൃഷ്ടിച്ചു. ഇത് ഇന്ത്യയില് ആദ്യമായിട്ടായിരുന്നു.
- ഹൗറ മൈതാനത്തെ എസ്പ്ലനേഡുമായി ബന്ധിപ്പിക്കുന്ന പാതയ്ക്ക് 4.8 കിലോമീറ്റർ നീളമുണ്ട്.
- ഈസ്റ്റ് വെസ്റ്റ് മെട്രോ ഇടനാഴിയുടെ ഭാഗമായ പാത ഹൗറ മൈതാനത്തെ സാള്ട്ട് ലേക്ക് ഐടി ഹബ് സെക്ടർ അഞ്ചുമായാണ് ബന്ധിപ്പിക്കുന്നത്.
- ഹൂഗ്ലി നദിയിലെ 520 മീറ്റർ നീളമുള്ള ഭാഗം 45 സെക്കൻഡിനുള്ളില് മെട്രോ കടന്നുപോകുമെന്നാണ് പ്രതീക്ഷിക്കുന്നത്.
- എസ്പ്ലനേഡിനും സീല്ദായ്ക്കും ഇടയിലുള്ള ഈസ്റ്റ്-വെസ്റ്റ് അലൈൻമെന്റിന്റെ ഭാഗം ഇപ്പോഴും നിർമാണത്തിലാണ്. എന്നാല് സാള്ട്ട് ലേക്ക് സെക്ടർ അഞ്ച് മുതല് സീല്ദാ വരെയുള്ള ഭാഗം ഇതിനകം ഉപയോഗിച്ചുവരുന്നുണ്ട്.
- ഓട്ടോമാറ്റിക് ട്രെയിൻ ഓപ്പറേഷൻ (എടിഒ) എന്ന സംവിധാനമാണ് മെട്രോയില് ഉപയോഗിക്കുന്നത്. മോട്ടോർമാൻ ഒരു ബട്ടണ് അമർത്തിയാല് ട്രെയിൻ യാന്ത്രികമായി അടുത്ത സ്റ്റേഷനിലേക്ക് നീങ്ങുന്നതാണ് ഇതിലെ രീതി.
- ഈസ്റ്റ് -വെസ്റ്റ് മെട്രോയുടെ ആകെയുള്ള 16.6 കിലോമീറ്ററില്, ഹൂഗ്ലി നദി തുരങ്കം ഉള്പ്പെടെ 10.8 കിലോമീറ്ററും ഭൂമിക്കടിയിലാണ്. ബാക്കിയുള്ളത് ഭൂമിക്ക് മുകളിലാണ്.
- സാള്ട്ട് ലേക്ക് സെക്ടർ അഞ്ചിനും ഹൗറ മൈതാനത്തിനും ഇടയിലുള്ള ഈസ്റ്റ് – വെസ്റ്റ് റൂട്ടില് സർവീസ് ജൂണ് അല്ലെങ്കില് ജൂലൈയില് ആരംഭിക്കാനാണ് കൊല്ക്കത്ത മെട്രോ ലക്ഷ്യമിടുന്നത്.
- 2020 ഒക്ടോബറിലാണ് മെട്രോ സെക്ഷന് അംഗീകാരം ലഭിച്ചത്. 8574.98 കോടി എസ്റ്റിമേറ്റിലാണ് കേന്ദ്ര റെയില്വേ മന്ത്രാലയം അനുമതി നല്കിയത്.
