ന്യൂഡല്‍ഹി: പാര്‍ലമെന്റിനു പുറത്ത് ഫോണില്‍ സംസാരിക്കുന്നതിനിടെ ആംആദ്മി പാര്‍ട്ടി എംപി രാഘവ് ഛദ്ദയുടെ തലയില്‍ കാക്ക കൊത്തുന്ന ചിത്രം സാമൂഹ്യ മാധ്യമങ്ങളില്‍ വൈറലാകുന്നു. പിടിഐ ഫൊട്ടോഗ്രാഫറാണ് ചൊവ്വാഴ്ച പാര്‍ലമെന്റിനു പുറത്തുനടന്ന സംഭവം പകര്‍ത്തിയത്. ഇതിനു പിന്നാലെ ചിത്രം സമൂഹമാധ്യമങ്ങളില്‍ വൈറല്‍ ആകുകയായിരുന്നു.
പാര്‍ലമെന്റിനു പുറത്തേക്ക് ഫോണില്‍ സംസാരിച്ചു നടന്നു വന്ന ഛദ്ദയുടെ തലയ്ക്കു മുകളില്‍ ഒരു കാക്ക വട്ടമിട്ടു പറക്കുന്നതും പിന്നാലെ തലയ്ക്കിട്ട് ഒരു കൊത്തു കൊടുക്കുന്നതും പകര്‍ത്തിയിട്ടുണ്ട്. കൊത്ത് ലഭിച്ചതിനു പിന്നാലെ രാഘവ് ഛദ്ദ കുനിയുന്നതും ഫൊട്ടോഗ്രാഫര്‍ ഷഹബാസ് ഖാൻ പകര്‍ത്തിയിട്ടുണ്ട്.
ചിത്രം പ്രചരിച്ചതോടെ ഛദ്ദയെ പരിഹസിച്ച്‌ ബിജെപി ഡല്‍ഹി ഘടകം ട്വിറ്ററിലൂടെ രംഗത്തെത്തി. ”കള്ളം പറഞ്ഞാല്‍ കാക്ക കൊത്തും’ എന്ന പഴഞ്ചൊല്ലാണ് ബിജെപി ട്വീറ്റ് ചെയ്തത്. ”ഇന്നുവരെ ഇതു നമ്മള്‍ കേട്ടിട്ടേ ഉള്ളൂ. ഇന്നത് കണ്ടു. കള്ളം പറയുന്നവരെ കാക്ക കൊത്തും” ബിജെപിയുടെ ട്വീറ്റില്‍ പറയുന്നു.
രാഘവ് ഛദ്ദയുടെ തലയില്‍ കാക്ക കൊത്തുന്ന ചിത്രം വൈറലായി; ‘കള്ളം പറഞ്ഞാല്‍ കാക്ക കൊത്തും’ എന്ന് ബിജെപി
