ബംഗളൂരു: വോട്ടർ പട്ടികയിലെ വീഴ്ചകള്‍ക്കും തിരിമറികള്‍ക്കുമെതിരെ ശക്തമായ പ്രക്ഷോഭവുമായി കോക്ക്റോച്ച്‌ ജനതാ പാർട്ടി രംഗത്ത്.എസ്.ഐ.ആർ നടപടികള്‍ക്കെതിരെ വ്യാഴാഴ്ച ബംഗളൂരു ഫ്രീഡം പാർക്കില്‍ സംഘടിപ്പിക്കുന്ന ‘പീപ്പിള്‍സ് ട്രിബ്യൂണലിന്’ പിന്നാലെ ‘ചപ്പല്‍ പ്രതിഷേധം’ നടത്തുമെന്ന് സി.ജെ.പി സഹ കണ്‍വീനർ അശുതോഷ് റാങ്ക അറിയിച്ചു. നടൻ പ്രകാശ് രാജും സി.ജെ.പി സ്ഥാപകൻ അഭിജീത് ദിപ്കെയും സമരത്തില്‍ പങ്കാളിയാകും സി.ജെ.പി വക്താവ് സൗരവ് ദാസ് തുടങ്ങിയവരും വിവിധ യൂത്ത്, സിവില്‍ സൊസൈറ്റി സംഘടനകളുടെ പ്രതിനിധികളും പ്രക്ഷോഭത്തില്‍ അണിനിരക്കും.കർണാടകയിലെ വിവിധ സിവില്‍ സൊസൈറ്റി കൂട്ടായ്മകളുടെ നേതൃത്വത്തിലാണ് എസ്.ഐ.ആർ നടപടികള്‍ക്കെതിരെ പീപ്പിള്‍സ് ട്രിബ്യൂണല്‍ സംഘടിപ്പിക്കുന്നത്. അനധികൃതമായി വോട്ടർപട്ടികയില്‍ നിന്ന് ഒഴിവാക്കപ്പെട്ട സാധാരണക്കാരുമായി നേതാക്കള്‍ വിവരങ്ങള്‍ പങ്കുവെക്കും.
തുടർന്ന് അതിക്രമങ്ങള്‍ക്കിരയായ സ്ത്രീകള്‍ക്ക് ഐക്യദാർഢ്യം പ്രഖ്യാപിച്ചാണ് ചെരുപ്പ് പ്രതിഷേധം സംഘടിപ്പിക്കുന്നത്. ബംഗളൂരു നിവാസികള്‍ വൻതോതില്‍ പരിപാടിയില്‍ പങ്കാളികളാകണമെന്ന് അശുതോഷ് റാങ്ക സോഷ്യല്‍ മീഡിയയിലൂടെ അഭ്യർത്ഥിച്ചു.ജനാധിപത്യ സംരക്ഷണത്തിനായുള്ള ഈ പോരാട്ടത്തില്‍ പങ്കുചേരാൻ നടൻ പ്രകാശ് രാജും എക്സ് കുറപ്പിലൂടെ ആഹ്വാനം ചെയ്തു. എസ്.ഐ.ആർ പ്രക്രിയയുടെ ഭാഗമായി വോട്ടർപട്ടികയില്‍ വരുത്തിയ എല്ലാ വെട്ടിമാറ്റലുകളും റദ്ദാക്കണമെന്നും, മുൻപത്തെ വോട്ടർപട്ടിക പുനഃസ്ഥാപിക്കണമെന്നുമാണ് സംഘടനകളുടെ പ്രധാന ആവശ്യം. തെരഞ്ഞെടുപ്പ് പ്രക്രിയയിലെ ക്രമക്കേടുകള്‍ ആരോപിച്ചുകൊണ്ട് ചീഫ് ഇലക്ഷൻ കമ്മീഷണർ ഗ്യാനേഷ് കുമാർ രാജിവെക്കണമെന്നും പ്രതിഷേധക്കാർ ആവശ്യപ്പെടുന്നു.
