ബെംഗളൂരു: ഇന്ത്യ – പാകിസ്താൻ വെടിനിർത്തലിന് മധ്യസ്ഥം വഹിച്ചുവെന്ന അവകാശവാദത്തിന് പിന്നാലെ യുഎസ് പ്രസിഡൻ്റ് ഡൊണൾഡ് ട്രംപിനോട് മറ്റൊരു അഭ്യർഥനയുമായി ബെംഗളൂരു നിവാസികൾ. വർഷങ്ങളായി ഇഴഞ്ഞുനീങ്ങുന്ന ഈജിപ്പുര ഫ്ലൈഓവർ പദ്ധതിയുടെ പൂർത്തീകരണത്തിനായി ബ്രഹത് ബെംഗളൂരു മഹാനഗര പാലികെ (ബിബിഎംപി) യുമായി മധ്യസ്ഥത വഹിക്കാമോ എന്നാണ് സോഷ്യൽ മീഡിയയിലെ ചോദ്യം. അത് സാധ്യമായാൽ ഈജിപ്പുര ഫ്ലൈഓവറിന് മാഗാ (MAGA) ട്രംപ് ഫ്ലൈഓവർ എന്ന് പേരിടാമെന്നും എക്സിൽ തമാശരൂപേണ പ്രത്യക്ഷപ്പെട്ട പോസ്റ്റിൽ വ്യക്തമാക്കി.
ബെംഗളൂരുവിലെ ഈജിപ്പുര ഫ്ലൈഓവർ ജോലികൾക്കായി ബിബിഎംപിയുമായി മധ്യസ്ഥത വഹിക്കാമോ? ഞങ്ങൾ ഇതിന് മാഗാ (MAGA) ട്രംപ് ഫ്ലൈഓവർ എന്ന് പേരിടും”- കർണാടക വെതർ എന്ന എക്സ് അക്കൗണ്ട് ട്രംപിനെ ടാഗ് ചെയ്ത് തമാശരൂപേണ ചോദിച്ചു. കൂടാതെ, ബെംഗളൂരു മെട്രോയുടെ യെല്ലോ ലൈനിൽ ട്രെയിൻ സ‍ർവീസ് ആരംഭിക്കാൻ ബെംഗളൂരു മെട്രോ റെയിൽ കോ‍ർപറേഷൻ ലിമിറ്റഡുമായി (ബിഎംആ‍ർസിഎൽ) മധ്യസ്ഥത വഹിക്കാമോ എന്നും അഭ്യർഥന തുടർന്നു.
ഇന്ത്യ – പാകിസ്ഥാൻ യുദ്ധം നിർത്തുക എന്നത് അത്ര വലിയ കാര്യമല്ല. താൻ ഒരു ശക്തനായ ചർച്ചക്കാരനും ആഗോള നേതാവുമാണെന്ന് തെളിയിക്കണമെങ്കിൽ, അദ്ദേഹം ഇത് ചെയ്യട്ടെ, ലോകത്തിന് മുന്നിൽ തന്റെ മൂല്യം തെളിയിക്കട്ടെയെന്നും കർണാടക വെതർ എക്സിലൂടെ തുടർന്നു. പോസ്റ്റ് താഴെ തമാശ കലർന്ന കമൻ്റുകളുമായി നിരവധി പേർ രംഗത്തെത്തി. ഈജിപ്പുര ഫ്ലൈഓവർ ഒരു സ്മാരകമാണെന്നും ട്രംപോ വാൻസോ എന്തെങ്കിലും ചെയ്യാൻ ശ്രമിച്ചാൽ പോലും ഈ ചരിത്ര സ്മാരകം നശിപ്പിക്കാൻ നമ്മുടെ ആർക്കിയോളജി സർവേ ഓഫ് ഇന്ത്യ ആരെയും അനുവദിക്കില്ലെന്നും ഒരാൾ കുറിച്ചു. വെടിനിർത്തൽ എളുപ്പമായിരുന്നെങ്കിൽ ട്രംപിന് ഇത് ബുദ്ധിമുട്ടായിരിക്കുമെന്നാണ് മറ്റൊരാളുടെ കമൻ്റ്.
204 കോടി രൂപ ചെലവ് കണക്കാക്കുന്ന ഈജിപ്പുര ഫ്ലൈഓവർ പദ്ധതിക്ക് 2017ലാണ് തുടക്കമായത്. കൊറമംഗലയിലെ കേന്ദ്രീയ സദനും ഈജിപ്പുരയും ബന്ധിപ്പിച്ച് ഇന്നർ റിങ് റോഡിൽ 2.5 കിലോമീറ്റർ നീളത്തിലാണ് ഫ്ലൈഓവർ പദ്ധതി.കരാറുകാരന് സാമ്പത്തിക ബാധ്യത ഉണ്ടായതിനെ തുട‍ർന്ന് 2019 മുതൽ നിർമാണ പ്രവൃത്തി ഇഴഞ്ഞുനീങ്ങാൻ തുടങ്ങി. 2019ൽ പൂർത്തീകരിക്കേണ്ട പദ്ധതി സ്ഥലമേറ്റെടുപ്പ് അടക്കം വിവിധ കാരണങ്ങളാൽ വൈകിയതോടെ 2025 ഡിസംബർ ആണ് നിർമാണ പൂർത്തീകരണത്തിനായി അന്തിമ സമയം നൽകിയിരിക്കുന്നത്.
