ബെംഗളൂരു: ഒരു മാസത്തിനിടെ, മുന്പില്ലാത്തവിധം നമ്മ മെട്രോ സര്വീസുകള് മൂന്ന് തവണയാണ് തടസപ്പെട്ടത്. കനത്ത മഴയും കാറ്റും മൂലം രണ്ടുതവണ ഈ പൊതുഗതാഗത ശൃംഖലയുടെ ചില ഭാഗങ്ങളില് പ്രവര്ത്തനം നിര്ത്തിവക്കേണ്ടിവന്നു.കഴിഞ്ഞ ചൊവ്വാഴ്ച, ഐടിപിബി – സത്യസായി ആശുപത്രി സ്റ്റേഷനുകള്ക്കിടയില് ട്രാക്കില് മരം വീണതിനെ തുടര്ന്ന് ഏകദേശം 30 മിനിട്ടോളം സര്വീസ് മുടങ്ങി. ഇതുമൂലം വൈറ്റ്ഫീല്ഡിനും ഗരുഡാചര്പാളയയ്ക്കും ഇടയിലുള്ള സര്വീസുകള് നിര്ത്തിവക്കേണ്ടിവന്നു.വൈകുന്നേരത്തെ തിരക്കേറിയ വേളയിലെ ഈ ഗതാഗത തടസം വൈറ്റ്ഫീല്ഡ് ഇടനാഴിയിലെ 10 സ്റ്റേഷനുകളിലെ യാത്രക്കാരെയാണ് ബാധിച്ചത്.
‘മെയ് 27 ന്, പര്പ്പിള് ലൈനില് ഐടിപിബിക്കും സത്യസായി ആശുപത്രി സ്റ്റേഷനുകള്ക്കും ഇടയിലുള്ള ട്രാക്കിലേക്ക് ചെറിയ മരം വീണു.സ്റ്റാന്ഡേര്ഡ് ഓപ്പറേറ്റിങ് പ്രോട്ടോക്കോള് അനുസരിച്ച്, തടസം നീക്കുകയും ട്രാക്കില് സുരക്ഷാ പരിശോധനകള് പൂര്ത്തിയാക്കുകയും ചെയ്തു. അതുവരെ ഈ ഭാഗത്തെ ട്രെയിന് സര്വീസുകള് നിര്ത്തിവക്കേണ്ടിവന്നു’ – BMRCLന്റെ വിശദീകരണം ഇങ്ങനെ.അപകടഭീഷണി ഉയര്ത്തുന്ന മരക്കൊമ്പുകള് വെട്ടിയിരുന്നോ ?ഈ സാഹചര്യത്തിലാണ് ബെംഗളൂരു മെട്രോ റെയില് കോര്പറേഷന് ലിമിറ്റഡ് (BMRCL) എന്തുകൊണ്ട് ഉയരപ്പാതയോട് ചേര്ന്നുനില്ക്കുന്ന മരക്കൊമ്പുകള് കാലാവസ്ഥാമാറ്റം മുന്കൂട്ടി കണ്ട് വെട്ടിമാറ്റിയില്ലെന്ന ചോദ്യമുയര്ന്നത്.ചല്ലഘട്ട – വൈറ്റ്ഫീല്ഡ്, സില്ക്ക് ഇന്സ്റ്റിറ്റ്യൂട്ട് – മദാവര ഇടനാഴികളില് ഉയരപ്പാതയുടെ (Elevated Track) വയഡക്റ്റുകളോട് ചേര്ന്ന് ഏകദേശം 890 മരങ്ങളുണ്ടെന്ന് BMRCL പറയുന്നു. ഇതില് 100-ഓളം എണ്ണം ട്രാക്കുകളില് നിന്ന് വെറും 10 മീറ്ററിനുള്ളിലാണ്.
കനത്ത മഴയിലും ശക്തമായ കാറ്റിലും മരക്കൊമ്പുകള് പൊട്ടിവീണ് അപകടമുണ്ടാകുന്നത് ഒഴിവാക്കാന് ഇടയ്ക്കിടെ വെട്ടിമാറ്റുന്നുണ്ടെന്നുമാണ് BMRCL ഉദ്യോഗസ്ഥരുടെ മറുപടി. പര്പ്പിള് ലൈനില് 523 മരങ്ങള് വയഡക്ടിന് സമീപമാണ് സ്ഥിതി ചെയ്യുന്നത്.അതില് 35 എണ്ണം 10 മീറ്ററിനുള്ളിലുമാണ്. 370 മരങ്ങളുള്ള ഗ്രീന് ലൈനില് 71 എണ്ണം 10 മീറ്ററിനുള്ളിലാണ്. ആര്വി റോഡ് മുതല് ബൊമ്മസാന്ദ്ര വരെയുള്ള യെല്ലോ ലൈനിന്റെ ഉയരപ്പാതാ ഭാഗത്ത് മരങ്ങള് പ്രവര്ത്തന – അപകട സാധ്യത സൃഷ്ടിക്കുന്നില്ലെന്നും BMRCL ഉദ്യോഗസ്ഥര് വ്യക്തമാക്കുന്നു.കനത്ത മഴയിലും ശക്തമായ കാറ്റിലും ശാഖകള് ട്രാക്കിലേക്ക് വീഴുന്നത് തടയാന്, പ്രത്യേകിച്ച് മഴക്കാലത്തിന് മുമ്പ്, മെട്രോ വയഡക്റ്റുകള്ക്ക് സമീപമുള്ള മരങ്ങളുടെ കൊമ്പുകള് വെട്ടിമാറ്റാറുണ്ടെന്ന് BMRCL വ്യക്തമാക്കുന്നു.മഴയും കാറ്റും ഇടിമിന്നലും പ്രതിസന്ധി750 വോള്ട്ട് ഡിസി തേര്ഡ്-റെയില് ട്രാക്ഷന് സിസ്റ്റത്തിലാണ് നമ്മ മെട്രോ പ്രവര്ത്തിക്കുന്നത്. ഈ സംവിധാനമാണ് ട്രെയിനുകള്ക്ക് വൈദ്യുതി വിതരണം ചെയ്യുന്നത്. അതുകൊണ്ടുതന്നെ ട്രാക്കിലെത്തുന്ന ഏതെങ്കിലും അന്യവസ്തുവിനെ അവഗണിക്കാന് കഴിയില്ല.
അത് ട്രെയിനുമായോ തേര്ഡ്-റെയില് പവര് സപ്ലൈ സിസ്റ്റവുമായോ സ്പര്ശിച്ചാല്, പ്രവര്ത്തനപരവും സുരക്ഷാപരവുമായ അപകടസാധ്യതകള്ക്ക് കാരണമാകും. അതിനാല് തടസങ്ങള് ഒഴിവാക്കാന്, സേവനങ്ങള് ഉടനടി നിര്ത്തിവയ്ക്കും.തുടര്ന്ന് പരിശോധനകള് പൂര്ത്തിയാക്കിയതിനുശേഷം പുനരാരംഭിക്കുകയും ചെയ്യുകയെന്നതാണ് സാധ്യമായ രീതിയെന്നും BMRCL ഉദ്യോഗസ്ഥര് വ്യക്തമാക്കുന്നു. ശക്തമായ കാറ്റിനൊപ്പം ഇടിമിന്നല് കൂടി ഉണ്ടാകുമ്പോള്, ഓപ്പറേഷണല് കണ്ട്രോള് സെന്റര് (OCC), മുന്കരുതല് സുരക്ഷാ നടപടിയായി ഉയര്ന്ന ഭാഗങ്ങളില് ട്രെയിന് വേഗത കുറയ്ക്കാന് ലോക്കോ പൈലറ്റുമാര്ക്ക് നിര്ദേശം നല്കാറുണ്ട്.മെയ് 21 ന്, കനത്ത മഴയും കാറ്റും കാരണം, എല്ലാ ഭാഗങ്ങളിലും ട്രെയിന് സര്വീസുകള് വൈകിയിരുന്നു. ആ ദിവസം, സമീപത്തെ കെട്ടിടങ്ങളില് നിന്നുള്ള ലോഹ ഷീറ്റുകള് ട്രാക്കുകളിലേക്ക് പറന്നെത്തുന്ന സ്ഥിതിയുമുണ്ടായെന്നും BMRCL അധികൃതര് ചൂണ്ടിക്കാട്ടുന്നു.
