ബെംഗളൂരു: ഓൺലൈൻ ട്രേഡിങ് തട്ടിപ്പിലൂടെ ടെക്കി ദമ്പതിമാർക്ക് നഷ്ടമായ 1.53 കോടി രൂപയിൽ ഭൂരിഭാഗവും വീണ്ടെടുത്ത് നൽകി ബെംഗളൂരു പോലീസ്. ഓൺലൈൻ ട്രേഡിങ്ങിലൂടെ നിക്ഷേപിക്കുന്ന തുക ഇരട്ടിപ്പിച്ച് കിട്ടുമെന്ന് വിശ്വസിപ്പിച്ചാണ് സോഫ്റ്റ്വെയർ എൻജിനീയർമാര്‍ കൂടിയായ ദമ്പതിമാരിൽ നിന്ന് ഇത്രയും തുക തട്ടിപ്പുകാർ കൊണ്ടുപോയത്. പരാതി കിട്ടിയ ഉടനെ ഇടപെടൽ നടത്തിയ ലോക്കൽ പോലീസും, വളരെ വിദഗ്ധമായി തട്ടിപ്പുകാരുടെ അക്കൗണ്ടുകളിൽ പിടിമുറുക്കിയ കർണാടക സൈബർ പോലീസും ചേർന്ന് 1.40 കോടി രൂപയോളം തിരിച്ചുപിടിച്ചു.ദമ്പതികളാണ് ഓൺലൈൻ തട്ടിപ്പിൽ കുടുങ്ങിയത്.
യുകെ കേന്ദ്രീകരിച്ച് പ്രവർത്തിക്കുന്ന തട്ടിപ്പ് സംഘമാണ് നിക്ഷേപിക്കുന്ന തുക ഓഹരിവിപണിയിലിട്ട് ഇരട്ടിപ്പിച്ച് തരാൻ കഴിയുമെന്ന് ഇവരെ വിശ്വസിപ്പിച്ചത്. ദമ്പതിമാരിൽ കൂടുതൽ വിശ്വാസം ജനിപ്പിക്കാനായി ഇവർ ഒരു വെബ്സൈറ്റിലേക്ക് ആക്സസ് നൽകുകയും ചെയ്തു. ഇവിടെ ആദ്യം തങ്ങൾ ‘നിക്ഷേപിച്ച’ തുക ഇരട്ടിക്കുന്നത് ഓൺലൈനായി കാണാൻ സാധിക്കുമായിരുന്നു. ഈ കാഴ്ചയിൽ വീണ ഇരുവരും കൂടുതൽ തുക നിക്ഷേപിച്ചു. പണം വലിയ തോതിൽ കൂടിയപ്പോൾ കുറച്ച് തുക പിൻവലിക്കാൻ ശ്രമിച്ചപ്പോഴാണ് ചതി മനസ്സിലായത്.
പെട്ടെന്ന് വെബ്സൈറ്റ് ലഭിക്കാതായി.ചതിക്കപ്പെട്ടത് മനസ്സിലായതോടെ ഇരുവരും ലോക്കൽ പോലീസിനെ സമീപിച്ചു. ഉടൻ തന്നെ പോലീസ് അന്വേഷണം ആരംഭിച്ചു. പ്രാഥമിക വിവരങ്ങളെല്ലാം ശേഖരിച്ച് ഈസ്റ്റ് ഡിവിഷൻ സൈബർ ക്രൈം പോലീസിന് കേസ് വിട്ടു.ദമ്പതിമാരുടെ ബാങ്കുകൾ അന്വേഷണത്തോട് വളരെ നന്നായി സഹകരിച്ചു. തട്ടിപ്പിൽ ഉൾപ്പെട്ട അക്കൗണ്ടുകളിൽ ഭൂരിഭാഗവും തിരിച്ചറിയാൻ കഴിഞ്ഞു.
ഇങ്ങനെ തിരിച്ചറിഞ്ഞ അക്കൗണ്ടുകൾ ബാങ്കുകൾ മരവിപ്പിച്ചു. 50 അക്കൗണ്ടുകളിലേക്കാണ് തട്ടിപ്പുപണത്തിന്റെ ഭൂരിഭാഗവും ചെന്നിരുന്നത്.എത്രയും പെട്ടെന്ന് പരാതി നൽകുക എന്നതാണ് ഓൺലൈൻ തട്ടിപ്പുകൾ പിടികൂടാനുള്ള എളുപ്പവഴിയെന്ന് അന്വേഷണത്തിലുൾപ്പെട്ട ഒരു പോലീസ് ഉദ്യോഗസ്ഥൻ പറയുന്നു. ഉടനടി പ്രസ്തുത ഇടപാട് ബാങ്ക് വഴി കണ്ടത്തുകയും പണം നിക്ഷേപിക്കപ്പെട്ട അക്കൗണ്ടുകൾ ബ്ലോക്ക് ചെയ്യുകയും ചെയ്യാൻ കഴിയും. പരാതി ‘ഗോൾഡൻ അവറി’നുള്ളിൽ ലഭിക്കുക എന്നതാണ് പ്രധാനം.
തട്ടിപ്പുകാരുടെ നീക്കം ‘വാടക അക്കൗണ്ടുകൾ’ വഴി:യുകെ കേന്ദ്രീകരിച്ച് പ്രവർത്തിക്കുന്ന തട്ടിപ്പുകാർ തങ്ങളുടെ തട്ടിപ്പിനായി ഉപയോഗിച്ചതെല്ലാം ഇന്ത്യക്കാരുടെ അക്കൗണ്ടുകളായിരുന്നു. ഉത്തരേന്ത്യയിൽ നിന്ന് ‘വാടകയ്ക്ക്’ എടുക്കുന്ന അക്കൗണ്ടുകളിലേക്കാണ് ഈ തുക ചെന്നു ചേരുന്നത്. അക്കൗണ്ട് ഉടമകൾ അറിഞ്ഞോ അറിയാതെയോ ഈ തട്ടിപ്പ് നടക്കാം. ഇത്തരം അക്കൗണ്ടുകളിലൂടെ നടക്കുന്ന തട്ടിപ്പുകൾ പിടിക്കാനും പ്രയാസമാണ്. ഓരോ അക്കൗണ്ടുകളിലും നടക്കുന്ന ട്രാൻസാക്ഷനുകൾ നിരന്തരമായി നിരീക്ഷിച്ചാലേ അവ തട്ടിപ്പിനായി ഉണ്ടാക്കിയ അക്കൗണ്ടുകളാണോ എന്ന് തിരിച്ചറിയാൻ കഴിയൂ. ഇത്തരം അക്കൗണ്ടുകളിലേക്കാണ് ബെംഗളൂരു ടെക്കികളുടെ 1.53 കോടി രൂപ ചെന്നുചേർന്നത്.
സോഫ്റ്റ്വെയർ എൻജിനീയർമാരും കുടുങ്ങുന്നു?ഈ കേസിൽ ഏറെ കൗതുകം ജനിപ്പിച്ച കാര്യം ഓൺലൈൻ തട്ടിപ്പിൽ കുടുങ്ങിയ ദമ്പതിമാർ രണ്ടുപേരും സോഫ്റ്റ്വെയർ എൻജിനീയർമാരാണ് എന്നതാണ്. ഇത്തരം തട്ടിപ്പുകൾക്ക് ഏറെയും വിധേയമാകുന്നത് വിദ്യാഭ്യാസമുള്ളവരാണ് എന്നതാണ് വസ്തുത. ഓൺലൈൻ ട്രാൻസാക്ഷനുകൾ നടത്താനും മറ്റും കഴിവുള്ളവര്‍ക്കേ ഇത്തരം തട്ടിപ്പുകളിൽ കുടുങ്ങാൻ കഴിയൂ. സമീപകാലത്ത് ഓൺലൈൻ തട്ടിപ്പുകൾ വളരെ വർദ്ധിച്ചിട്ടുണ്ട്. ഇന്ത്യയിൽ ഏറ്റവും കൂടുതൽ ഓൺലൈൻ തട്ടിപ്പുകൾ നടക്കുന്നത് ഗുജറാത്ത്, മഹാരാഷ്ട്ര, തെലങ്കാന, രാജസ്ഥാൻ, കർണാടക തുടങ്ങിയ സംസ്ഥാനങ്ങളിലാണ്. മഹാരാഷ്ട്രയിൽ കഴിഞ്ഞവർഷം 125153 സൈബർ ഫ്രോഡ് കേസുകളാണ് രജിസ്റ്റർ ചെയ്യപ്പെട്ടത്. കേരളത്തിൽ 23757 കോസുകൾ രജിസ്റ്റർ ചെയ്യപ്പെട്ടു
