യാത്രക്കാരുടെ ശ്രദ്ധയ്ക്ക് : ബെംഗളൂരുവില്‍ നിന്നുള്ള എറണാകുളം ഇന്റര്‍സിറ്റി, കണ്ണൂര്‍ എക്‌സ്പ്രസ് ട്രെയിനുകളുടെ പുറപ്പെടല്‍ സ്റ്റേഷന്‍ മാറുന്നു

മെജസ്റ്റിക് കെഎസ്‌ആര്‍ റെയില്‍വേ സ്റ്റേഷനില്‍ നിന്ന് കേരളത്തിലേക്കുള്ള 2 ട്രെയിനുകള്‍ ഓഗസ്റ്റ് 16 മുതല്‍ 2026 ജനുവരി 15 വരെ പുറപ്പെടുക ബയ്യപ്പനഹള്ളി ടെര്‍മിനലില്‍ നിന്ന്.രാവിലെ 6.10ന് പുറപ്പെടുന്ന എറണാകുളം ഇന്റര്‍സിറ്റി എക്‌സ്പ്രസ് ((12677/78), രാത്രി 9.35ന് പുറപ്പെടുന്ന കണ്ണൂര്‍ എക്‌സ്പ്രസ് (16511/12) എന്നിവയാണ് എസ്‌എംവിടി റെയില്‍വേ സ്റ്റേഷനില്‍ നിന്ന് പുറപ്പെടുക.ബെംഗളൂരു കെഎസ്‌ആര്‍ റെയില്‍വേ സ്റ്റേഷനിലെ നവീകരണ പ്രവര്‍ത്തനങ്ങളുടെ ഭാഗമായി 5 മാസത്തേക്കുള്ള ക്രമീകരണമാണ് ഇതെന്ന് റെയില്‍വേ ഉദ്യോഗസ്ഥര്‍ വിശദീകരിക്കുന്നുണ്ടെങ്കിലും വിഷയത്തില്‍ പ്രതിഷേധം കനക്കുകയാണ്.

നൂറ് കണക്കിന് മലയാളികളാണ് ഈ ട്രെയിനുകളെ ദിവസവും ആശ്രയിക്കുന്നത്. അവരെ സംബന്ധിച്ച്‌ സ്റ്റേഷന്‍ മാറ്റം അസൗകര്യമുണ്ടാക്കും.ബെംഗളൂരു നഗരത്തിലെ രൂക്ഷമായ ഗതാഗതക്കുരുക്ക് താണ്ടി വേണം എസ്‌എംവിടി റെയില്‍വേ സ്റ്റേഷനില്‍ എത്താനെന്ന് യാത്രക്കാര്‍ ചൂണ്ടിക്കാട്ടുന്നു. ഇത് പലപ്പോഴും ട്രെയിന്‍ നഷ്ടമാകുന്ന സാഹചര്യം ഒരുക്കാനിടയുണ്ടെന്നും മലയാളി യാത്രക്കാര്‍ വ്യക്തമാക്കുന്നു. മധ്യ-തെക്കന്‍ കേരളത്തിലേക്കും വടക്കന്‍ കേരളത്തിലേക്കുമുള്ള യാത്രക്കാര്‍ ആശ്രയിക്കുന്നവയാണ് ഈ ട്രെയിനുകള്‍.

സ്വന്തമായി വാഹനങ്ങളില്ലാത്ത, മെജസ്റ്റിക്കില്‍ വന്ന് പോകേണ്ട യാത്രികര്‍ക്ക് കെഎസ്‌ആര്‍ റെയില്‍വേ സ്റ്റേഷനില്‍ നിന്ന് പാസഞ്ചര്‍ ട്രെയിന്‍ ഉപയോഗപ്പെടുത്തിയോ അല്ലെങ്കില്‍ ബസ് മാര്‍ഗമോ, ഓട്ടോ ടാക്‌സി എന്നിവ ഉപയോഗപ്പെടുത്തിയോ എസ്‌എംവിടി സ്‌റ്റേഷനിലെത്താം. പാസഞ്ചറിലാണെങ്കില്‍ കുറഞ്ഞത് 20 മിനിട്ട് വേണം. ബസിലാണെങ്കില്‍ ട്രാഫിക്ക് പരിഗണിക്കുമ്ബോള്‍ മുക്കാല്‍ മണിക്കൂര്‍ വരെ എടുത്തേക്കാം.

ഓട്ടോ അല്ലെങ്കില്‍ ടാക്‌സി ഉപയോഗപ്പെടുത്തിയാലും ഗതാഗതക്കുരുക്ക് വിനയാകും. എന്നാല്‍ കെഎസ്‌ആര്‍ സ്റ്റേഷന്‍ നഗരകേന്ദ്രത്തിലായതിനാല്‍ മിക്കവര്‍ക്കും ഇവിടെ നിന്ന് കയറുന്നത് ഏറെ സൗകര്യപ്രദമായിരുന്നു. യാത്രാസൗകര്യം മുന്‍നിര്‍ത്തി മെജസ്റ്റിക്കിലും സമീപത്തും താമസിക്കുന്ന നിരവധി പേരുണ്ട്. തങ്ങള്‍ വലയുന്ന സാഹചര്യമാണെന്ന് അവരും ചൂണ്ടിക്കാട്ടുന്നു.അത്തരത്തില്‍ ഈ ട്രെയിനുകളെ ആശ്രയിക്കുന്ന മലയാളികള്‍ പലതരം അസൗകര്യങ്ങള്‍ ചൂണ്ടിക്കാട്ടുന്നു.

സ്റ്റേഷന്‍ മാറ്റം കേവലം 5 മാസത്തേക്കാണെന്ന് റെയില്‍വേ പറയുന്നുണ്ടെങ്കിലും ഇത് സ്ഥിരമാകുമോയെന്ന ആശങ്ക മലയാളികളായ യാത്രക്കാര്‍ക്കുണ്ട്. ഇക്കാര്യങ്ങള്‍ മുന്‍നിര്‍ത്തി റെയില്‍വേയുടെ തീരുമാനത്തിനെതിരെ പ്രതിഷേധം ശക്തമാണ്.കെഎസ്‌ആര്‍ സ്റ്റേഷനില്‍ മൂന്നാം നമ്ബര്‍ പിറ്റ് ലൈനും, അഞ്ചാം നമ്ബര്‍ സ്റ്റേബിള്‍ ലൈനും നവീകരിക്കുന്ന സാഹചര്യത്തിലാണ് പുറപ്പെടല്‍ കേന്ദ്രം മാറ്റുന്നതെന്നാണ് റെയില്‍വേ അധികൃതരുടെ വിശദീകരണം. ഇത് പുനപ്പരിശോധിക്കാനാവില്ലെന്നും അവര്‍ വ്യക്തമാക്കുന്നു.