സിനിമാ ഓഡിഷനില്‍ പങ്കെടുക്കാമെന്ന വാഗ്ദാനം നല്‍കി ബെംഗളൂരുവിലേക്ക് കൊണ്ടു പോയെന്ന് ആരോപിക്കപ്പെടുന്ന ത്രിപുര സ്വദേശിയായ പ്രായപൂർത്തിയാകാത്ത പെണ്‍കുട്ടിയെ രക്ഷപ്പെടുത്തി.ഒക്ടോബർ 13-ന് കാണാതായ അഗർത്തല സ്വദേശിനിയെ പിതാവിന്റെയും സാമൂഹിക പ്രവർത്തകരുടെയും സംഘടനാ പ്രവർത്തകരുടെയും ഇടപെടലിലാണ് കണ്ടെത്തി നാട്ടിലെത്തിച്ചത്. മനുഷ്യക്കടത്ത് ശൃംഖലയില്‍ അകപ്പെട്ടിരിക്കാമെന്ന സംശയവും ഉയർന്നിട്ടുണ്ട്.നിഷിമ ബേൻ എന്ന് പരിചയപ്പെടുത്തിയ സ്ത്രീയാണ് ബെംഗളൂരുവില്‍ സിനിമാ ചിത്രീകരണം നടക്കുന്നുണ്ടെന്നും ഓഡിഷനില്‍ പങ്കെടുക്കാമെന്നും പറഞ്ഞ് തന്നെ യാത്രയ്ക്ക് പ്രേരിപ്പിച്ചതെന്നാണ് പെണ്‍കുട്ടിയുടെ മൊഴി.
ആദ്യം ഒറ്റയ്ക്ക് പോകാൻ മടിച്ചെങ്കിലും പിന്നീട് സമ്മതിക്കുകയായിരുന്നു. യാത്രയ്ക്കുള്ള പണം കണ്ടെത്താൻ സ്വർണമാല പണയം വെച്ചതായും യുവരാജ് ചൗധരി എന്നയാള്‍ 30,000 രൂപ നല്‍കിയെന്നും പെണ്‍കുട്ടി പറഞ്ഞു. വിമാന ടിക്കറ്റും ഇയാളാണ് ബുക്ക് ചെയ്തതെന്നാണ് ആരോപണം.ബെംഗളൂരുവിലെത്തിയപ്പോള്‍ വിമാനത്താവളത്തില്‍ നിന്ന് ഒരാള്‍ കാറില്‍ കൂട്ടിക്കൊണ്ടുപോയി അപരിചിതമായ സ്ഥലത്ത് എത്തിച്ചു. അവിടെ സിനിമാ ചിത്രീകരണമോ ഓഡിഷനോ ഇല്ലെന്ന് മനസ്സിലായതായും പകരം മറ്റൊരു ജോലി ചെയ്യണമെന്ന് ആവശ്യപ്പെട്ടതായും പെണ്‍കുട്ടി ആരോപിച്ചു. പിന്നീട് മൊബൈല്‍ ഫോണ്‍ കേടുവരുത്തുകയും സിം കാർഡ് നീക്കം ചെയ്യുകയും ചെയ്തതോടെ കുടുംബവുമായി ബന്ധപ്പെടാൻ കഴിയാത്ത അവസ്ഥയിലായി. പെണ്‍കുട്ടിയുടെ കുടുംബത്തോട് ആദ്യം അഞ്ച് ലക്ഷം രൂപയും പിന്നീട് എട്ട് ലക്ഷം, രണ്ട് ലക്ഷം എന്നിങ്ങനെയും പണം ആവശ്യപ്പെട്ടതായും പരാതിയുണ്ട്.
മകളെ കാണാതായതിനെ തുടർന്ന് കുടുംബം പൊലീസിനെ സമീപിച്ചിരുന്നു. ഒക്ടോബർ 13-ന് ഉച്ചയ്ക്ക് 12.45-ഓടെ വിമാനത്തില്‍ ബെംഗളൂരുവിലേക്ക് പോയതായി പൊലീസ് അറിയിച്ചതിനെ തുടർന്ന് കുടുംബം തിരച്ചില്‍ തുടങ്ങി. പിന്നീട് ലഭിച്ച വിവരങ്ങളുടെ അടിസ്ഥാനത്തില്‍ മുംബൈയിലും അന്വേഷണം നടത്തിയെങ്കിലും കണ്ടെത്താനായില്ല. ഇതിനിടെ ത്രിപുരയിലെ സാമൂഹിക പ്രവർത്തകനായ സുമിത് നല്‍കിയ വിവരത്തെ തുടർന്ന് പിതാവ് വീണ്ടും ബെംഗളൂരുവിലെത്തി. സാമൂഹിക സംഘടനാ പ്രവർത്തകരുടെയും പ്രാദേശിക സന്നദ്ധപ്രവർത്തകരുടെയും സഹായത്തോടെ നടത്തിയ അന്വേഷണത്തിലാണ് ബെംഗളൂരു വിമാനത്താവളത്തില്‍ നിന്ന് ഏകദേശം 90 കിലോമീറ്റർ അകലെയുള്ള സ്ഥലത്ത് പെണ്‍കുട്ടിയെ കണ്ടെത്തിയത്.
അവിടെ മറ്റ് കുട്ടികളും ഉണ്ടായിരുന്നുവെന്നും മകളെ വാഹനത്തില്‍ കയറ്റിയതിന് പിന്നാലെ ചിലർ കുട്ടികളെ കൊണ്ടുപോകാൻ ശ്രമിച്ചതായും പിതാവ് ആരോപിച്ചു. സംഘടനാ പ്രവർത്തകർ ഇടപെട്ടതോടെ പെണ്‍കുട്ടിയെ സുരക്ഷിതമായി തിരികെ കൊണ്ടുവരാനായെന്നും അദ്ദേഹം പറഞ്ഞു.രക്ഷാപ്രവർത്തനവുമായി ബന്ധപ്പെട്ട സാമൂഹിക പ്രവർത്തകൻ ഖോകൻ ചന്ദ്ര പോള്‍, ബെംഗളൂരുവിലെയും മുംബൈയിലെയും സംഘടനാ ശൃംഖലകളുടെ സഹായത്തോടെയാണ് പെണ്‍കുട്ടിയുടെ നീക്കങ്ങള്‍ നിരീക്ഷിച്ചതെന്ന് വ്യക്തമാക്കി. ത്രിപുര മുഖ്യമന്ത്രി മണിക് സാഹയും വിഷയത്തില്‍ ഇടപെട്ടിരുന്നതായും അദ്ദേഹം പറഞ്ഞു. അതേസമയം, സംസ്ഥാനത്തെ വിവിധ ഭാഗങ്ങളില്‍ നിന്ന് പ്രായപൂർത്തിയാകാത്ത കുട്ടികളെ മറ്റ് സ്ഥലങ്ങളിലേക്കും വിദേശത്തേക്കും കടത്തുന്ന സംഘങ്ങള്‍ സജീവമാണെന്ന ആശങ്കയും പോള്‍ പങ്കുവെച്ചു. സംഭവത്തില്‍ ആരോപണവിധേയരായവരുടെ പങ്ക് അന്വേഷണത്തിലൂടെ സ്ഥിരീകരിക്കേണ്ടതുണ്ട്.
