ചെന്നൈ: പുതിയ മെട്രോ പദ്ധതികള്‍ക്ക് വേഗത്തില്‍ അനുമതി നല്‍കണമെന്നും കുടിശ്ശികയുള്ള 5100 കോടി രൂപയുടെ വിദ്യാഭ്യാസ ഫണ്ട് ഉപാധികളില്ലാതെ അനുവദിക്കണമെന്നും പ്രധാനമന്ത്രി നരേന്ദ്ര മോദിയോട് ആവശ്യപ്പെട്ട് തമിഴ്‌നാട് മുഖ്യമന്ത്രി വിജയ്.ഞായറാഴ്‌ച ചെന്നൈ മെട്രോയുടെ പുതിയ പാത ഉദ്ഘാടനം ചെയ്യുന്ന ചടങ്ങിലാണ് നഗരഗതാഗതം, വിദ്യാഭ്യാസ ഫണ്ട്, നദീസംയോജനം തുടങ്ങിയ വിഷയങ്ങളില്‍ വിജയ് കേന്ദ്രത്തിന്റെ ഇടപെടല്‍ ആവശ്യപ്പെട്ടത്.ചെന്നൈ മെട്രോ രണ്ടാം ഘട്ടത്തിലെ പൂനമല്ലി ബൈപ്പാസ് മുതല്‍ വടപളനി വരെയുള്ള 15 കിലോമീറ്റർ പാതയുടെ ഉദ്ഘാടനച്ചടങ്ങില്‍ സംസാരിക്കുകയായിരുന്നു അദ്ദേഹം. നഗരത്തിലെ ഗതാഗത സൗകര്യങ്ങള്‍ മെച്ചപ്പെടുത്തുന്നതിനായി ചെന്നൈ മെട്രോ മൂന്നാം ഘട്ടത്തിന് എത്രയും വേഗം അനുമതി നല്‍കണമെന്ന് വിജയ് ആവശ്യപ്പെട്ടു. തമിഴ്‌നാടിന്റെ പടിഞ്ഞാറൻ, തെക്കൻ മേഖലകളിലെ ഗതാഗതം മെച്ചപ്പെടുത്താൻ കോയമ്പത്തൂരിലും മധുരയിലും മെട്രോ പദ്ധതികള്‍ വേണമെന്നും അദ്ദേഹം പറഞ്ഞു.
തമിഴ്‌നാട്ടിലെ ഹൊസൂരിനെയും കർണാടകയിലെ ബൊമ്മസന്ദ്രയെയും ബന്ധിപ്പിക്കുന്ന മെട്രോ പാതയുടെ ആവശ്യവും അദ്ദേഹം ഉന്നയിച്ചു.2026ലെ കേന്ദ്ര ബജറ്റില്‍ പ്രഖ്യാപിച്ച ചെന്നൈ ബെംഗളൂരു, ചെന്നൈ ഹൈദരാബാദ് അതിവേഗ റെയില്‍ ഇടനാഴികള്‍ക്ക് വിജയ് പ്രധാനമന്ത്രിയോട് നന്ദി അറിയിക്കുകയും ചെയ്‌തിട്ടുണ്ട്‌. സമഗ്ര ശിക്ഷാ പദ്ധതിയുടെ ഭാഗമായി തമിഴ്‌നാടിന് ലഭിക്കാനുള്ള 5100 കോടി രൂപ ഉടൻ അനുവദിക്കണമെന്നും അദ്ദേഹം മോദിയോട് ആവശ്യപ്പെട്ടു. യാതൊരു ഉപാധികളും ഏർപ്പെടുത്താതെ തുക കൈമാറണമെന്നാണ് സംസ്ഥാനത്തിന്റെ ആവശ്യം.ദേശീയ വിദ്യാഭ്യാസ നയം 2020ന്റെ അടിസ്ഥാനത്തിലുള്ള പി എം ശ്രീ സ്‌കൂള്‍ പദ്ധതി നടപ്പാക്കാൻ തമിഴ്‌നാട് കരാറില്‍ ഒപ്പിടണമെന്ന കേന്ദ്രത്തിന്റെ നിബന്ധനയെച്ചൊല്ലി തർക്കം നിലനില്‍ക്കുന്ന സാഹചര്യത്തിലാണ് വിജയ് ഈ ആവശ്യം ഉന്നയിച്ചത്. ദേശീയ വിദ്യാഭ്യാസ നയത്തിലെ ത്രിഭാഷാ രീതി തമിഴ്‌നാട് അംഗീകരിക്കുന്നില്ല. പകരം ദ്വിഭാഷാ നയമാണ് സംസ്ഥാനം പിന്തുടരുന്നത്. മറ്റൊരു പദ്ധതിയില്‍ ചേരാൻ വിസമ്മതിച്ചതിന്റെ പേരില്‍ സ്‌കൂള്‍ വിദ്യാഭ്യാസത്തിനുള്ള ഫണ്ട് തടഞ്ഞുവയ്ക്കുന്നത് ഫെഡറല്‍ സംവിധാനത്തിന്റെ തത്വങ്ങള്‍ക്ക് വിരുദ്ധമാണെന്നാണ് തമിഴ്‌നാടിന്റെ നിലപാട്.
ഗോദാവരി, കാവേരി നദികളെ ബന്ധിപ്പിക്കുന്ന പദ്ധതിയും വിജയ് ആവശ്യപ്പെട്ടു. സംസ്ഥാനങ്ങള്‍ക്കിടയില്‍ ജലലഭ്യത കൂടുതല്‍ തുല്യമായി ഉറപ്പാക്കാൻ നദീസംയോജനം സഹായിക്കുമെന്നാണ് അദ്ദേഹത്തിന്റെ നിലപാട്. ഗോദാവരി, കാവേരി, ഗുണ്ടാർ നദികളെ ബന്ധിപ്പിക്കുന്ന പദ്ധതിക്ക് വേഗത്തില്‍ അനുമതി നല്‍കണമെന്നും ദേശീയ പ്രാധാന്യമുള്ള പദ്ധതിയായി പ്രഖ്യാപിക്കണമെന്നും രണ്ട് മാസം മുമ്പും വിജയ് പ്രധാനമന്ത്രിയോട് ആവശ്യപ്പെട്ടിരുന്നു.ഇന്ന് രാവിലെയോടെയാണ് പ്രധാനമന്ത്രി നരേന്ദ്ര മോദി ഏകദേശം 4900 കോടി രൂപ ചെലവില്‍ നിർമ്മിച്ച പുതിയ മെട്രോ പാത ഉദ്ഘാടനം ചെയ്‌തത്‌. തുടർന്ന് മുഖ്യമന്ത്രി വിജയ്‌ക്കൊപ്പം മെട്രോ ട്രെയിനില്‍ യാത്രയും നടത്തി. തമിഴ്‌നാട് ഗവർണർ രാജേന്ദ്ര വിശ്വനാഥ് ആർലേക്കറും ചടങ്ങില്‍ പങ്കെടുത്തു.
ട്രെയിനില്‍ കയറുന്നതിന് മുമ്പ് പ്രധാനമന്ത്രി ടിക്കറ്റ് വാങ്ങുകയും ടിക്കറ്റ് കൗണ്ടറിലെ ജീവനക്കാരനുമായി ഹ്രസ്വമായി സംസാരിക്കുകയും ചെയ്‌തു.ചെന്നൈ മെട്രോ രണ്ടാം ഘട്ടത്തിലെ നാലാം ഇടനാഴിയുടെ ഭാഗമായ പുതിയ പാത നഗരത്തിന്റെ പടിഞ്ഞാറൻ പ്രാന്തപ്രദേശങ്ങളില്‍നിന്ന് നഗരമധ്യത്തിലേക്കുള്ള യാത്രാസൗകര്യം മെച്ചപ്പെടുത്തുമെന്നാണ് പ്രതീക്ഷ. യാത്രാസമയം ഗണ്യമായി കുറയ്ക്കാനും ഇതിലൂടെ സാധിക്കും. ഇന്ന് വൈകിട്ട് നാല് മണി മുതല്‍ രാത്രി ഒമ്പത് മണി വരെയാണ് പുതിയ പാതയിലെ യാത്രാ സർവീസുകള്‍ നിശ്ചയിച്ചിരിക്കുന്നത്. ഒക്ടോബർ 12 മുതല്‍ രാവിലെ ഏഴ് മണി മുതല്‍ രാത്രി ഒമ്പത് മണി വരെ പതിവ് സർവീസുകള്‍ നടത്തും.രണ്ട് ടെർമിനലുകളില്‍നിന്നുമുള്ള അവസാന ട്രെയിനുകള്‍ രാത്രി ഒമ്പത് മണിക്ക് പുറപ്പെടും. 13,000 കോടി രൂപയിലധികം ചെലവുള്ള വിവിധ പദ്ധതികള്‍ ഉദ്ഘാടനം ചെയ്യാനും പുതിയ പദ്ധതികള്‍ക്ക് തറക്കല്ലിടാനുമായി പ്രധാനമന്ത്രി നടത്തിയ ചെന്നൈ സന്ദർശനത്തിന്റെ ഭാഗമായിരുന്നു മെട്രോ പാതയുടെ ഉദ്ഘാടനവും.
