ബെംഗളൂരു: ഇക്കഴിഞ്ഞ ദിവസമാണ് ബെംഗളൂരുവിലെ ഒരു ഓട്ടോ ഡ്രൈവര്‍ യാത്രക്കാരിയുടെ മുഖത്തടിച്ച സംഭവമുണ്ടായത്. ഓൺലൈനായി ബുക്ക് ചെയ്ത ഓട്ടോറിക്ഷ റൈഡ് റദ്ദാക്കിയതാണ് ആക്രമണത്തിന് കാരണമായത്. ബുക്ക് ചെയ്ത വണ്ടി എത്താൻ വൈകിയപ്പോൾ മറ്റൊരു ഓട്ടോയിൽ സ്ത്രീ കയറി. പിന്നാലെ എത്തിയ ഓട്ടോറിക്ഷയുടെ ഡ്രൈവർ സ്ത്രീയെ ആക്രമിച്ചു. നഗരത്തില്‍ ഓട്ടോറിക്ഷയിൽ കയറിയിട്ടുള്ള നിരവധി പേർക്ക് സമാനമായ അനുഭവം ഉണ്ടായിട്ടുണ്ടാകും. നഗരത്തിൽ ഓട്ടോ ഡ്രൈവർ‍മാരുടെ ഇത്തരം ആക്രമണങ്ങൾക്കെതിരെ എത്രതന്നെ പരാതികൾ ഉയർന്നിട്ടും കാര്യമില്ല എന്നതാണ് സ്ഥിതി.ബെംഗളൂരുവില്‍ ഓട്ടോക്കാർക്കെതിരായ പരാതികൾ കുമിഞ്ഞു കൂടുകയാണെന്ന് കണക്കുകൾ പറയുന്നു.
2024ൽ ജൂലൈ 1 വരെ അയ്യായിരത്തിലധികം പരാതികളാണ് ഓട്ടോക്കാർക്കെതിരെ ട്രാഫിക് പോലീസിന് ലഭിച്ചത്. പരാതിപ്പെടാത്തവര്‍ ഇതിലധികം വരുമെന്നതാണ് വസ്തുത. സോഷ്യൽ മീഡിയയിൽ ദിവസമെന്നേന നിരവധി പരാതികൾ പ്രത്യക്ഷപ്പെടുന്നു. ഓട്ടോറിക്ഷകളുമായി ബന്ധപ്പെട്ട് ദിവസവും 25 പരാതികളെങ്കിലും ട്രാഫിക് പോലീസിന് ഫോൺ മുഖാന്തിരം ലഭിക്കുന്നുണ്ട്.ഓട്ടം വിളിച്ചിട്ട് വരാതിരിക്കുന്ന സംഭവങ്ങൾ വളരെയധികമാണ് നഗരത്തിൽ. ജൂലൈ ഒന്നാംതിയതി വരെ ഇങ്ങനെ ലഭിച്ചത് 2,586 പരാതികളാണ്. അമിതമായി ചാർജ് ഈടാക്കുന്ന സംഭവങ്ങൾ നിത്യമെന്നേന നടക്കുന്നുണ്ട്.
ജൂലൈ 1 വരെ ഇത്തരം 2,582 പരാതികൾ ബെംഗളൂരു ട്രാഫിക് പോലീസിന് ലഭിച്ചു.ഇത്തരം പരാതികൾ വർഷാവർഷം കൂടുന്നു എന്നത് ശ്രദ്ധേയമാണ്. അമിത ചാർജ് ഈടാക്കിയതിന് 2022ൽ ആകെ ലഭിച്ചത് 1,537 പരാതികളായിരുന്നു. 2023ലാകട്ടെ ഇത് 1,599 പരാതികളായി ഉയർന്നു. 2024ൽ വർഷത്തിന്റെ പകുതി എത്തിയപ്പോഴേക്ക് 2,582 പരാതികൾ ലഭിച്ചു. ഈ വർഷം അവസാനിക്കുമ്പോഴേക്ക് പരാതികളുടെ എണ്ണം മുൻ വർഷത്തേതിന്റെ ഇരട്ടിയിലധികമാകുമെന്നാണ് മനസ്സിലാക്കേണ്ടത്.ഈ വർഷം പരാതികളുടെ എണ്ണം കൂടിയതിനു കാരണം പോലീസ് നടത്തുന്ന ഇടപെടലുകളാണെന്ന് ട്രാഫിക് പോലീസ് ജോയിന്റെ കമ്മീഷണർ എംഎൻ അനുചേത് ചൂണ്ടിക്കാട്ടുന്നു.
പോലീസ് നേരിട്ട് പൊതുജനങ്ങളുടെ പ്രശ്നങ്ങളില്‍ ഇടപെട്ട് പരാതികൾ വാങ്ങുന്നുണ്ട്. ഇത് തുടങ്ങിയത് 2024ലാണ്. ജനങ്ങൾ കൂടുതൽ എത്തുന്ന സ്ഥലങ്ങളിലെല്ലാം പോലീസുകാർ മഫ്ടിയിൽ ചെന്ന് ഓട്ടോറിക്ഷക്കാരോട് ഓട്ടം വരാൻ ആവശ്യപ്പെടുന്നു. വരില്ലെന്ന് പറയുന്നവർക്കെതിരെയും, അമിത ചാർജ്ജ് ആവശ്യപ്പെടുന്നവർക്കെതിരെയും കേസെടുക്കുന്നു.ഇതോടൊപ്പം പൊതുജനങ്ങൾ ഈ വിഷയത്തിൽ കൂടുതല്‍ ജാഗ്രത കാണിക്കുന്നതും കേസുകളുടെ എണ്ണം കൂടുന്നതിന് കാരണമായിട്ടുണ്ട്.
ദുരനുഭവം ഉണ്ടായാൽ ജനങ്ങൾ ഉടനെ പ്രതികരിക്കുന്നു. പരാതിപ്പെടാൻ എത്തുന്നു. ഈ അയ്യായിരം കേസുകളിൽ പലതും ഔദ്യോഗിക പരാതികളായി ലഭിച്ചിട്ടില്ലെന്നതും ശ്രദ്ധേയമാണ്. പലരും ട്രാഫിക് പോലീസിന്റെ 112 എന്ന പരാതിപരിഹാര നമ്പരിലേക്ക് വിളിച്ച് വണ്ടിയുടെ രജിസ്ട്രേഷൻ നമ്പർ പറയുക മാത്രമാണ് ചെയ്യാറ്. ഈ ഓട്ടോറിക്ഷകൾക്കെതിരെ ഔദ്യോഗികമായി നടപടിയെടുക്കുന്നു. പിഴ ഈടാക്കുകയും മറ്റുമാണ് ചെയ്യുക.ഓട്ടോക്കാരുമായുള്ള തർക്കങ്ങൾ ഒഴിവാക്കാനായി ട്രഫിക് പോലീസ് തിരക്കുള്ള കേന്ദ്രങ്ങളിൽ ഓട്ടോറിക്ഷാ കൗണ്ടറുകൾ സ്ഥാപിച്ചിട്ടുണ്ട്. നഗരത്തിലാകെ 17 കൗണ്ടറുകൾ ഇങ്ങനെ പ്രവർത്തിക്കുന്നു. ഇതുവരെ 1500 ഓട്ടങ്ങൾ വരെ നടക്കുന്നുണ്ടെന്ന് ട്രാഫിക് പോലീസ് വ്യക്തമാക്കി.
