ബെംഗളൂരു: ഭാര്യയെ കൊലപ്പെടുത്തിയ ശേഷം വൈദ്യുതാഘാതമേറ്റുള്ള മരണമെന്ന് വരുത്തിത്തീർക്കാൻ ശ്രമിച്ച യുവാവ് അറസ്റ്റില്.ഭാര്യ രേഷ്മ കുളിക്കുന്നതിനിടെ വൈദ്യുതാഘാതമേറ്റ് മരിച്ചെന്നാണ് ഭർത്താവ് പ്രശാന്ത് കമ്മർ (35) എല്ലാവരോടും പറഞ്ഞത്. ബെംഗളൂരുവില് ഈ മാസം 15-നാണ് കൊലപാതകം നടന്നത്.
ബല്ലാരി സ്വദേശിയാണ് പ്രശാന്ത്. ഒൻപത് മാസം മുമ്ബ് രേഷ്മയെ വിവാഹം ചെയ്ത ശേഷം ബെംഗളൂരുവിലെ ഹെബ്ബഗോഡിയിലാണ് താമസിച്ചിരുന്നത്. രേഷ്മയുടെ രണ്ടാം വിവാഹമായിരുന്നു ഇത്. ആദ്യ ഭർത്താവ് മരിച്ചുപോയി. ഒരു മകളുണ്ട്. രേഷ്മ മുംബൈയിലാണ് ജോലി ചെയ്തിരുന്നത്. ഇൻസ്റ്റഗ്രാമിലൂടെയാണ് രേഷ്മയും പ്രശാന്തും പരിചയപ്പെട്ടത്. പിന്നീട് ഇരുവരും വിവാഹിതരവാൻ തീരുമാനിക്കുകയായിരുന്നു. തുടർന്ന് ബെംഗളൂരുവിലേക്ക് താമസം മാറ്റി. രേഷ്മയുടെ മകളും ഒപ്പമുണ്ടായിരുന്നു.
ഒക്ടോബർ 15-ന് വൈകുന്നേരം സ്കൂളില് നിന്ന് മടങ്ങിയെത്തിയ രേഷ്മയുടെ മകളാണ്, കുളിമുറിയില് അമ്മയെ അബോധാവസ്ഥയില് കണ്ടത്. കുളിമുറി പുറത്തുനിന്ന് പൂട്ടിയ നിലയിലായിരുന്നു. പ്രശാന്ത് വീട്ടിലുണ്ടായിരുന്നില്ല. തുടർന്ന് പെണ്കുട്ടി ബെംഗളൂരുവിലുള്ള രേഷ്മയുടെ ചേച്ചി രേണുകയെ വിവരമറിയിച്ചു. രേണുകയെത്തി രേഷ്മയെ ആശുപത്രിയില് എത്തിച്ചു.
ബല്ലാരിയിലെ വീട്ടിലേക്കുള്ള യാത്രയിലായിരുന്നുവെന്ന് പറഞ്ഞ പ്രശാന്തും വൈകാതെ ആശുപത്രിയിലെത്തി. എന്നാല് ആശുപത്രിയില് എത്തിക്കും മുൻപ് രേഷ്മയുടെ മരണം സംഭവിച്ചിരുന്നുവെന്ന് ഡോക്ടർമാർ അറിയിച്ചു. വൈകുന്നേരം താൻ വീട്ടില് നിന്ന് പോകുമ്ബോള് രേഷ്മ കുളിക്കാൻ ഒരുങ്ങുകയായിരുന്നെന്നും ഹീറ്ററില് നിന്ന് വൈദ്യുതാഘാതമേറ്റായിരിക്കാം മരണം സംഭവിച്ചതെന്നുമാണ് ഭർത്താവ് ആദ്യം മൊഴി നല്കിയതെന്ന് പൊലീസ് പറഞ്ഞു.
എന്നാല് രേഷ്മയുടെ മരണത്തില് സംശയം തോന്നിയ രേണുക ഒക്ടോബർ 16ന് ഹെബ്ബഗോഡി പൊലീസ് സ്റ്റേഷനില് പരാതി നല്കി. കുളിമുറി പുറത്തുനിന്ന് പൂട്ടിയ നിലയിലായിരുന്നുവെന്ന രേഷ്മയുടെ മകളുടെ മൊഴി നിർണായകമായി. തലേദിവസം അമ്മ മറ്റൊരാളുമായി സംസാരിക്കുന്നതില് സംശയം തോന്നി പ്രശാന്ത് അമ്മയുമായി വഴക്കിട്ടിരുന്നതായും മകള് വെളിപ്പെടുത്തിയെന്ന് പൊലീസ് പറഞ്ഞു. അന്നുതന്നെ പ്രശാന്തിനെ പൊലീസ് കസ്റ്റഡിയില് എടുത്തു. തുടർന്ന് പ്രതി കുറ്റം സമ്മതിച്ചു.
ഭാര്യയ്ക്ക് മറ്റൊരു ബന്ധമുണ്ടെന്ന് സംശയം തോന്നിയെന്നും ആ ദേഷ്യത്തില് ശ്വാസം മുട്ടിച്ച് കൊലപ്പെടുത്തിയെന്നും പ്രശാന്ത് പറഞ്ഞു. മൃതദേഹം കുളിമുറിയിലേക്ക് മാറ്റി. വൈദ്യുതാഘാതമേറ്റ് മരിച്ചതായി വരുത്തിത്തീർക്കാൻ വാട്ടർ ഹീറ്റർ ഓണ് ചെയ്തെന്നും പ്രതി പൊലീസിനോട് പറഞ്ഞു. പ്രശാന്തിനെ കോടതിയില് ഹാജരാക്കി റിമാൻഡ് ചെയ്തു.
