സോഷ്യല് മീഡിയയില് സിനിമാതാരങ്ങളെ കുഴപ്പിച്ച് പുതിയ ട്രെൻഡ് പ്രത്യക്ഷപ്പെട്ടിരിക്കുകയാണ്. തെന്നിന്ത്യൻ താരം വിജയ് ദേവരക്കൊണ്ട കമന്റ് ചെയ്താലേ പരീക്ഷയ്ക്ക് പഠിക്കൂ എന്ന വിദ്യാർഥികളുടെ വീഡിയോ വൈറലായത് കഴിഞ്ഞദിവസമായിരുന്നു. ഇതിന് താഴെ കമന്റുമായി വിജയ് ദേവരക്കൊണ്ട എത്തുകയും ചെയ്തു. തൊണ്ണൂറ് ശതമാനത്തിന് മുകളില് മാർക്ക് വാങ്ങിയാല് ഉറപ്പായും കാണാൻ വരുമെന്നായിരുന്നു വിജയ്യുടെ വാഗ്ദാനം. ഇപ്പോഴിതാ പുതിയ ട്രെൻഡില്പ്പെട്ടിരിക്കുകയാണ് നടൻ ടൊവിനോയും.
താഹ ഹസൂൻ എന്ന ഇൻസ്റ്റഗ്രാം അക്കൗണ്ടില് നിന്ന് പോസ്റ്റ് ചെയ്ത ഒരു വീഡിയോയ്ക്ക് മറുപടിയുമായാണ് ടൊവിനോ എത്തിയിരിക്കുന്നത്. ‘ഈ വീഡിയോയ്ക്ക് ടൊവിനോ തോമസ് കമന്റ് ചെയ്താല് ഞാൻ എന്റെ പരീക്ഷക്കുള്ള തയാറെടുപ്പുകള് ആരംഭിക്കും’ എന്ന ക്യാപ്ഷനോടെയായിരുന്നു ഇൻസ്റ്റഗ്രാം പേജില് വീഡിയോ പോസ്റ്റ് ചെയ്തിരുന്നത്. ‘പോയിരുന്ന് പഠിക്ക് മോനെ’ എന്നായിരുന്നു ഇതിന് ടൊവിനോയുടെ മറുപടി. വീഡിയോ പോസ്റ്റ് ചെയ്ത് രണ്ട് ദിവസത്തിനകമായിരുന്നു ടൊവിനോയുടെ പ്രതികരണമെത്തിയത്.
ടൊവിനോയുടെ കമന്റിന് താഴെ രസകരമായ പ്രതികരണങ്ങളുമായി നിരവധിപേരാണ് എത്തുന്നത്. സംവിധായകൻ അല്ഫോൻസ് പുത്രനുമുണ്ട് കൂട്ടത്തില്. പുതിയ ട്രെൻഡ് ഏറ്റെടുത്ത് നിരവധി പോസ്റ്റുകളും സോഷ്യല്മീഡിയയില് സജീവമാകുന്നുണ്ട്.
