കർണാടക സർക്കാർ സെക്കൻഡറി സ്കൂള് ലീവിംഗ് സർട്ടിഫിക്കറ്റ് (എസ്എസ്എല്സി), സെക്കൻഡ് പ്രീ-യൂണിവേഴ്സിറ്റി കോഴ്സ് (II പിയുസി) എന്നിവയുടെ യോഗ്യതാ മാനദണ്ഡങ്ങള് പരിഷ്കരിച്ചു.അടുത്ത ക്ലാസ്സിലേക്ക് യോഗ്യത നേടുന്നതിനുള്ള ഏറ്റവും കുറഞ്ഞ മാർക്ക് 33 ശതമാനമാക്കിയതാണ് പ്രധാന പരിഷ്കാരം. നേരത്തെ ഇത് 35% ആയിരുന്നു. മാറ്റങ്ങള് ഉടനടി പ്രാബല്യത്തില് വരും. പുതുക്കിയ മാനദണ്ഡങ്ങള് അനുസരിച്ചായിരിക്കും പരീക്ഷയില് വിദ്യാർഥികള് ജയിച്ചോ തോറ്റോ എന്ന് തീരുമാനിക്കുക. 15 ദിവസത്തെ കൂടിയാലോചന കാലയളവില് 701 കത്തുകള് ഭേദഗതിയെ അനുകൂലിച്ച് വോട്ട് ചെയ്തു.
എട്ട് കത്തുകള് മാത്രമാണ് സർക്കാർ നീക്കത്തെ എതിർത്തത്. വിജയശതമാനം വർധിപ്പിക്കാനും സിബിഎസ്ഇയും മറ്റ് ബോർഡുകളുമായി യോജിപ്പിച്ച് ഏകീകൃത സംവിധാനം ഏർപ്പെടുത്താനും ആഗ്രഹിക്കുന്നുവെന്ന് പ്രൈമറി, സെക്കൻഡറി വിദ്യാഭ്യാസ മന്ത്രി മധു ബംഗാരപ്പ പറഞ്ഞു. കർണാടക ഭരണപരിഷ്കാര കമ്മീഷൻ -2 ന്റെ നാലാമത്തെ റിപ്പോർട്ടില് നിന്നുള്ള നിർദ്ദേശങ്ങള് അടിസ്ഥാനമാക്കിയാണ് ഈ തീരുമാനം.പുതുക്കിയ നിയമങ്ങള് അനുസരിച്ച്, പരീക്ഷകളില് വിജയിക്കാൻ, സെക്കൻഡറി സ്കൂള് ലീവിംഗ് സർട്ടിഫിക്കറ്റ് വിദ്യാർത്ഥികള് ഓരോ വിഷയത്തിനും 30% മാർക്കും ഇന്റേണല് അസസ്മെന്റും എക്സ്റ്റേണല് പരീക്ഷയും സംയോജിപ്പിച്ച് 33% മാർക്കും (625 ല് കുറഞ്ഞത് 206 മാർക്ക്) നേടണം.
പിയുസി പരീക്ഷര്ര് ഓരോ വിഷയത്തിനും 30 ശതമാനം മാർക്ക് (എഴുത്ത്, പ്രായോഗിക/ഇന്റേണല് അസസ്മെന്റുകള് ഉള്പ്പെടെ) നേടുകയും മൊത്തത്തില് 33 ശതമാനം സ്കോർ നേടുകയും വേണം. 600 മാർക്കില് 198 നേടിയാല് യോഗ്യതയായി കണക്കാക്കും. അഖിലേന്ത്യാ ഉന്നത വിദ്യാഭ്യാസ സർവേ (എഐഎസ്എച്ച്ഇ) പ്രകാരം, 2021-22 ല് കർണാടക ദേശീയതലത്തില് 15-ാം സ്ഥാനത്തായിരുന്നു. അതിനാല്, ഉയർന്ന വിജയശതമാനം നേടുന്നതിനായി പാസിംഗ് മാർക്ക് കുറയ്ക്കാൻ അധികൃതർ തീരുമാനിക്കുകയായിരുന്നു.
