ഓണത്തിന് നാട്ടിലെത്താന് ആഗ്രഹിക്കുന്ന മലയാളികള്ക്കൊരു സന്തോഷ വാര്ത്ത. രണ്ട് മാസം മുന്പേ ട്രെയിന് ടിക്കറ്റുകള് ഉറപ്പുവരുത്താം.ഓണത്തിന് രണ്ട് മാസം ബാക്കിനില്ക്കെയാണ് കേരളത്തിലേക്കുള്ള ട്രെയിനുകളിലെ ടിക്കറ്റ് ബുക്കിങ് ആരംഭിക്കുന്നത്. ജൂലൈ 2 മുതല് ടിക്കറ്റുകള് ബുക്ക് ചെയ്യാവുന്ന രീതിയിലാണ് ക്രമീകരണം.തിരുവോണം സെപ്റ്റംബര് 5നാണ്. എന്നാല് 1 മുതല് 4 വരെയുള്ള ദിവസങ്ങളില് ബെംഗളൂരുവില് നിന്ന് കേരളത്തിലേക്ക് യാത്രക്കാരുടെ വന് തിരക്കാണ് പ്രതീക്ഷിക്കുന്നത്. ഈ സാഹചര്യത്തിലാണ് ഐആര്സിടിസി വെബ്സൈറ്റ്, മൊബൈല് ആപ്പ് എന്നിവ വഴി 60 ദിവസം മുന്പേ ടിക്കറ്റ് ബുക്കിങ്ങിന് ഇന്ത്യന് റെയില്വേ നടപടികള് സ്വീകരിച്ചിരിക്കുന്നത്.
ബയ്യപ്പനഹള്ളി ടെര്മിനല്-തിരുവനന്തപുരം നോര്ത്ത് എക്സ്പ്രസിന്റെ (06555/06556) സര്വീസ് സെപ്റ്റംബര് 28 വരെ നീട്ടിയിട്ടുണ്ട്. ഇത് ഓണത്തിന് നാട്ടിലെത്താന് ആഗ്രഹിക്കുന്നവര്ക്ക് ഏറെ ഉപകാരപ്രദമാണ്. വെള്ളിയാഴ്ചകളില് രാത്രി 10-ന് ബയ്യപ്പനഹള്ളിയില് നിന്ന് പുറപ്പെടുന്ന ട്രെയിന്, പിറ്റേദിവസം ഉച്ചയ്ക്ക് 2-ന് കൊച്ചുവേളിയില് എത്തും.ഞായറാഴ്ചകളില് ഉച്ചയ്ക്ക് 2.15-ന് കൊച്ചുവേളിയില് നിന്ന് പുറപ്പെടുന്ന ട്രെയിന്, പിറ്റേദിവസം രാവിലെ 7.30-ന് ബയ്യപ്പനഹള്ളിയില് എത്തും. അതേസമയം ബെംഗളൂരുവില് നിന്നുള്ള സ്വകാര്യ ബസുകള്, തിരുവനന്തപുരം, എറണാകുളം, കോട്ടയം റൂട്ടുകളിലേക്കുള്ള ഓണക്കാല റിസര്വേഷന് ആരംഭിച്ചിട്ടുമുണ്ട്.
എസി മള്ട്ടി ആക്സില് ബസുകളുടെ ടിക്കറ്റ് നിരക്ക് 2500 മുതല് 3500 രൂപ വരെയാണ്. കേരള, കര്ണാടക ആര്ടിസി ബസുകളില് 30 ദിവസം മുന്പ് മാത്രമേ ടിക്കറ്റ് റിസര്വേഷന് സൗകര്യം ലഭ്യമാവുകയുള്ളൂ. സെപ്റ്റംബര് മാസത്തെ ബുക്കിങ് ഓഗസ്റ്റ് ആദ്യവാരം ആരംഭിക്കും.അതേസമയം ഏകദേശം 3800-5500 നിരക്കിലാണ് ബെംഗളൂരുവില് നിന്ന് കേരളത്തിലെ വിവിധ വിമാനത്താവളങ്ങളിലേക്കുള്ള ടിക്കറ്റ് നിരക്ക്. തിരുവനന്തപുരത്തേക്ക് 4800-5500 രൂപ, കോഴിക്കോട്ടേക്ക് 3000-3900 രൂപ, കണ്ണൂരിലേക്ക് 4600-5000 രൂപ എന്നിങ്ങനെയാണ് നിരക്കുകള്. എന്നാല് ഓണം അടുക്കുന്നതോടെ ഇത് ഉയരാന് ഇടയുണ്ട്.
