ചെന്നൈ : ഐ‌പി‌എല്‍ 2026 സീസണിന് മുന്നോടിയായി, ഇതിഹാസ താരം എം‌എസ് ധോണിയുടെ ചെന്നൈ സൂപ്പർ കിംഗ്‌സിന്റെ ഭാഗമാകാൻ ആവേശം പ്രകടിപ്പിച്ച്‌ സഞ്ജു സാംസണ്‍.രാജസ്ഥാൻ റോയല്‍സില്‍ നിന്ന് 18 കോടി രൂപയ്ക്ക് ട്രേഡ് ചെയ്യപ്പെട്ട കീപ്പർ ബാറ്റർ, പുതിയ അവസരം ഒരു സ്വപ്നസാക്ഷാത്കാരമാണെന്ന് വിശേഷിപ്പിച്ചു. ഐ.പി.എല്‍ സീസണിലെ ഏറ്റവും വലിയ താരകൈമാറ്റമായി മാറിയിരിക്കുകയാണ് സഞ്ജു സാംസണ്‍.മാസങ്ങള്‍ നീണ്ടു നിന്ന ഊഹാപോഹങ്ങള്‍ക്കു ശേഷം ഏതാനും ദിവസം മുമ്ബാണ് സഞ്ജുവിന്റെ ഡീല്‍ ചെന്നൈയും രാജസ്ഥാനും ഉറപ്പിച്ച്‌ കൂടുമാറ്റം അന്തിമമാക്കിയത്. പിങ്കും നീലയും കുപ്പായത്തില്‍ പതിറ്റാണ്ടുകളായി കണ്ട സഞ്ജുവിനെ ചെന്നൈയുടെ മഞ്ഞ കുപ്പായത്തിലെ അരങ്ങേറ്റം കാത്തിരിക്കുന്ന ആരാധകരോട് മഞ്ഞയണിഞ്ഞ് ഒരുങ്ങാൻ കേരളത്തിന്റെ പ്രിയതാരം സഞ്ജു സാംസണ്‍ അഭ്യർഥിക്കുന്നു. ചെന്നൈ സൂപ്പർ കിങ്സ് ടീം സാമൂഹിക മാധ്യമങ്ങളില്‍ പങ്കുവെച്ച സഞ്ജുവിന്റെ ആദ്യ അഭിമുഖത്തിലാണ് ചെന്നൈയിലേക്കുള്ള വരവും, പ്രതീക്ഷയുമെല്ലാം താരം പങ്കുവെച്ചത്.ചെറിയ പ്രായം മുതല്‍ ആരാധനയോടെ നോക്കി നിന്ന, എം.എസ് ധോണിക്കൊപ്പം ചെന്നൈ സൂപ്പർ കിങ്സിന്റെ ഡ്രസ്സിങ് റൂം നിമിഷങ്ങള്‍ക്കും ഒന്നിച്ച്‌ കളിക്കുന്ന ഭാഗ്യത്തിനുമായി കാത്തിരിക്കുകയാണെന്ന് സഞ്ജു പറയുന്നു. ’19ാം വയസ്സിലാണ് എം.എസ് ധോണിയെ കാണുന്നത്. മഹി ഭായുടെ കീഴില്‍ ഇംഗ്ലണ്ട് പര്യടനത്തിനുള്ള ടീമിന്റെ ഭാഗമായപ്പോഴായിരുന്നു അത്. അന്ന് 10-20 ദിവസം അദ്ദേഹവുമായി ഒന്നിച്ചിടപഴകാനും സംസാരിക്കാനും കഴിഞ്ഞു. ശേഷം, ഐ.പി.എല്ലിലും ദേശീയ ടീമിലുമായി കാണുമ്ബോഴേല്ലാം ആള്‍കൂട്ടങ്ങള്‍ക്ക് നടുവിലായിരിക്കും മഹി ഭായ്. ഒരിക്കലെങ്കിലും തനിച്ച്‌ ധോണിയെ കാണണം എന്നത് ആഗ്രഹമായിരുന്നു. ഒടുവില്‍, ഏതാനും മാസങ്ങള്‍ക്കൊടുവില്‍ അദ്ദേഹത്തിനൊപ്പം ഡ്രസ്സിങ് റൂമിലും ഡൈനിങ് റൂമിലും കളത്തിലും ഒന്നിച്ചിരിക്കാനും കളിക്കാനും പോകുന്നതിന്റെ ആവേശത്തിലാണിപ്പോള്‍’ -സഞ്ജു സാംസണ്‍ പറഞ്ഞു.കഴിഞ്ഞ പതിറ്റാണ്ടു കാലം രാജസ്ഥാൻ റോയല്‍സിനൊപ്പം തന്നെയും പിന്തുണച്ച ആരാധകരോട് ചെന്നൈകൊപ്പം കൂടാനും താരം ആവശ്യപ്പെട്ടു. ‘ആരുടെയും ഇഷ്ടങ്ങള്‍ പെട്ടെന്ന് മാറ്റാൻ പറ്റില്ല. നാളെ മുതല്‍ ചെന്നൈയെ സപ്പോർട്ട് ചെയ്യണം എന്ന് പറയുന്നില്ല. പക്ഷേ, ഇനി മുതല്‍ നമ്മള്‍ ചെന്നൈ ആണ്. എല്ലാവരും മഞ്ഞ ജഴ്സി അണിയുക. ചെന്നൈ സൂപ്പർകിങ്സിനെ ഒരു കപ്പ് കൂടി അടിപ്പിക്കുക’ -സഞ്ജു പതിവു ചിരിയോടെ ആവേശത്തോടെ പറഞ്ഞു.’ഐ.പി.എല്ലിന്റെ ആദ്യ സീസണ്‍ മുതല്‍ മനസ്സില്‍ കൊതിക്കുന്ന ജഴ്സിയാണ് ചെന്നൈ സൂപ്പർ കിങ്സ്. ഐ.പി.എല്ലിലെ ഏറ്റവും മികച്ച ഡ്രസ്സിങ് റൂമുകളില്‍ ഒന്നാണ് ചെന്നൈയുടേത്. ഇന്ത്യൻ താരങ്ങളും, വിദേശതാരങ്ങളും ആഭ്യന്തര താരങ്ങളും ഉള്‍പ്പെടെ വലിയൊരു നിര തന്നെ ചെന്നൈകൊപ്പമുണ്ട്. അതിന്റെ ഭാഗമാവുന്നതിനായി ആവശേത്തോടെ കാത്തിരിപ്പിലാണ് ഞാൻ’ -സഞ്ജു പറഞ്ഞു.’ചെറിയ പ്രായത്തില്‍ ചെന്നൈയില്‍ വന്ന് ക്രിക്കറ്റ് കളിച്ചിരുന്നു. തമിഴ്നാടും ചെന്നൈയും കേരളം പോലെ സുപരിചിതമാണ്. ഒരുപാട് സുഹൃത്തുക്കളുണ്ട്. നേരത്തെ തന്നെ തമിഴ് സിനിമകള്‍ കാണുമായിരുന്നു. ചെറിയ പ്രായത്തില്‍ തന്നെ തമിഴ് മനസ്സിലാകുമായിരുന്നു. അത്യാവശ്യം സംസാരിക്കുകയും ചെയ്യും.’ ‘ചെന്നൈ ജഴ്സി അണിയുമ്ബോള്‍ തന്നെ ചാമ്ബ്യൻ ഫീലിങ് ആണ്. തീർച്ചയായും സന്തോഷവും പുത്തൻ ഊർജവും വരുന്നു.’ സഞ്ജു പറഞ്ഞു.രവീന്ദ്ര ജഡേജയും സാം കറനും എന്ന രണ്ട് സീനിയർ ഓള്‍റൗണ്ടർമാരുടെ രാജിയാണ് സാംസണെ സിഎസ്‌കെയിലേക്ക് എത്തിച്ചത്.
ഐപിഎല്ലിന്റെ മീഡിയ അഡ്വൈസറി പ്രകാരം, കരാറിന്റെ ഭാഗമായി ജഡേജയുടെ ഫീസ് 18 കോടി രൂപയില്‍ നിന്ന് 14 കോടി രൂപയായി ക്രമീകരിച്ചു, അതേസമയം കറന്റെ മുൻ മൂല്യമായ 2.4 കോടി രൂപയില്‍ തന്നെ തുടരുന്നു. സാംസണ്‍ തന്റെ നിലവിലുള്ള ലീഗ് ഫീസ് 18 കോടി രൂപയില്‍ തന്നെ നിലനിർത്തും.
