മംഗളൂരു യാത്രക്കാർക്ക് ആഡംബരവും വേഗതയും ഉറപ്പാക്കി കർണാടക ആർ.ടി.സി.യുടെ ‘രാജഹംസ’ എക്സ്പ്രസ് സർവീസ് കാസർകോട്-മംഗളൂരു റൂട്ടില്‍ പ്രയാണം ആരംഭിച്ചു.യാത്രക്കാരുടെ ദീർഘകാലമായുള്ള ആവശ്യം പരിഗണിച്ച്‌ ആരംഭിച്ച ഈ സർവീസ് ചുരുങ്ങിയ ദിവസങ്ങള്‍ക്കുള്ളില്‍ത്തന്നെ മികച്ച പ്രതികരണമാണ് നേടിയിരിക്കുന്നത്. താരതമ്യേന കുറഞ്ഞ സമയം കൊണ്ട് ലക്ഷ്യസ്ഥാനത്ത് എത്താനും സുഖകരമായ യാത്ര പ്രദാനം ചെയ്യാനും ഈ ബസുകള്‍ക്ക് കഴിയുന്നത് യാത്രക്കാർക്ക് വലിയ ആശ്വാസമാണ്.രാജഹംസ ബസുകള്‍ 2×2 റിക്ലൈനിംഗ് സീറ്റുകളോടുകൂടിയാണ് സർവീസ് നടത്തുന്നത്.
ചാരിയിരുന്ന് സുഖകരമായ യാത്ര സാധ്യമാക്കുന്ന ഈ സീറ്റുകള്‍ ദീർഘദൂര യാത്രക്കാർക്ക് ഏറെ പ്രയോജനകരമാണ്. ഓരോ സീറ്റിന് മുൻപിലും വാട്ടർ ബോട്ടില്‍ ഹോള്‍ഡർ, ന്യൂസ്‌പേപ്പർ/മാഗസിൻ തുടങ്ങിയവ വെക്കാനുള്ള സീറ്റ് പോക്കറ്റ് എന്നിവ സജ്ജീകരിച്ചിട്ടുണ്ട്. വെളുത്ത യൂണിഫോമണിഞ്ഞ, ഉപഭോക്തൃ സൗഹൃദ സമീപനം പുലർത്തുന്ന കണ്ടക്ടർമാരും ഈ സർവീസിന്റെ പ്രത്യേകതയാണ്. ഇത്രയേറെ സൗകര്യങ്ങള്‍ ഒരുക്കിയ സ്ഥിതിക്ക് ടിക്കറ്റ് നിരക്ക് അധികമെന്ന് പറയാനാവില്ലെന്ന് മുൻ പഞ്ചായത്ത് അസിസ്റ്റന്റ് ഡയറക്ടർ നിസാർ പെറുവാട് അഭിപ്രായപ്പെട്ടു.
കാസർകോട് നിന്ന് മംഗളൂരിലേക്ക് 100 രൂപയും കുമ്ബളയില്‍ നിന്ന് മംഗളൂരിലേക്ക് 80 രൂപയുമാണ് ടിക്കറ്റ് നിരക്ക്. കാസർകോട് നിന്ന് കുമ്ബളയിലേക്ക് 30 രൂപ നല്‍കിയാല്‍ മതിയാകും.രാജഹംസ ബസുകള്‍ക്ക് പരിമിതമായ സ്റ്റോപ്പുകള്‍ മാത്രമാണുള്ളത്. കുമ്ബള, ബന്തിയോട്, നയാ ബസാർ, കൈകമ്ബ, ഉപ്പള, ഹസങ്കടി, മഞ്ചേശ്വരം, തലപ്പാടി, ബീരി എന്നിവിടങ്ങളില്‍ മാത്രമാണ് ഈ സർവീസ് നിർത്തുന്നത്. മറ്റ് ബസുകള്‍ കാസർകോട്-മംഗളൂരു പൂർണ്ണ ദൂരം സഞ്ചരിക്കാൻ ഒരു മണിക്കൂർ 35 മിനിറ്റ് എടുക്കുമ്ബോള്‍, രാജഹംസ ബസുകള്‍ക്ക് കാല്‍ മണിക്കൂറോളം കുറവ് മതി.
അതായത്, ഏകദേശം ഒരു മണിക്കൂർ 20 മിനിറ്റിനുള്ളില്‍ ലക്ഷ്യസ്ഥാനത്ത് എത്താൻ സാധിക്കും. ഇത് സമയലാഭം ആഗ്രഹിക്കുന്ന യാത്രക്കാർക്ക് വലിയ സഹായമാണ്.ദിവസേന രണ്ട് രാജഹംസ ബസുകളാണ് കാസർകോട്-മംഗളൂരു റൂട്ടില്‍ സർവീസ് നടത്തുന്നത്. ഓരോ ബസും അങ്ങോട്ടുമിങ്ങോട്ടും ആറ് ട്രിപ്പുകള്‍ വീതം നടത്തുന്നുണ്ട്. മംഗളൂരില്‍ നിന്ന് രാവിലെ 6.30, 7.30, 10.30, 11.30, ഉച്ചതിരിഞ്ഞ് 3.00, 3.30 എന്നീ സമയങ്ങളിലാണ് ബസുകള്‍ പുറപ്പെടുന്നത്. കാസർകോട് നിന്ന് രാവിലെ 8.30, 9.30, ഉച്ചതിരിഞ്ഞ് 1.00, 1.30, വൈകുന്നേരം 5.00, 5.30 എന്നീ സമയങ്ങളിലും സർവീസുകള്‍ ലഭ്യമാണ്.യാത്രക്കാർക്കിടയില്‍ നിന്ന് ഈ സർവീസിന് മികച്ച പ്രതികരണമാണ് ലഭിക്കുന്നത്.
കേരള എസ്.ആർ.ടി.സി.യെ അപേക്ഷിച്ച്‌ കർണാടക ആർ.ടി.സി. നല്‍കുന്ന ഈ യാത്രാസൗകര്യം പലരെയും ആകർഷിച്ചിട്ടുണ്ട്. യാത്രക്കാർക്ക് സുഖകരവും സമയബന്ധിതവുമായ യാത്രാനുഭവം നല്‍കുന്നതില്‍ കർണാടക ആർ.ടി.സി. മികച്ചുനില്‍ക്കുന്നു എന്നത് ഏവരും അംഗീകരിക്കുന്ന കാര്യമാണ്. കേരള ആർ.ടി.സി.യും സമാനമായ ഗുണമേന്മയുള്ള സർവീസുകള്‍ ലഭ്യമാക്കണം എന്ന ആവശ്യം ഈ സാഹചര്യത്തില്‍ ശക്തമാവുകയാണ്.രാവിലെ 11.30 ന് മംഗളൂരില്‍ നിന്ന് പുറപ്പെടുന്ന സർവീസ് കാസർകോട് റെയില്‍വേ സ്റ്റേഷൻ വരെ ദീർഘിപ്പിക്കുകയാണെങ്കില്‍ അത് ഉച്ചതിരിഞ്ഞ് 1.20 ന് കാസർകോട് യാത്ര അവസാനിപ്പിക്കുന്ന വന്ദേ ഭാരത് എക്സ്പ്രസ് ട്രെയിനില്‍ എത്തിച്ചേരുന്ന യാത്രക്കാർക്ക് മംഗളൂരിലേക്ക് കണക്ഷൻ ബസ്സാകുമെന്ന് റെയില്‍ പാസഞ്ചർ അസോസിയേഷൻ ചൂണ്ടിക്കാട്ടുന്നു.
കൂടാതെ, 2.30 ന് കാസർകോട് നിന്ന് തിരുവനന്തപുരത്തേക്ക് തിരിച്ചു പുറപ്പെടുന്ന ഈ ട്രെയിനില്‍ കയറുന്നവർക്കും ഇത് വലിയ ഉപകാരമാകും. അസോസിയേഷൻ ഇത് സംബന്ധിച്ച്‌ കർണാടക എസ്.ആർ.ടി.സി. മംഗളൂരു ഡി.സി.ക്ക് നിവേദനം നല്‍കിയിട്ടുണ്ട്
