തിരുവനന്തപുരം: കേരളത്തില് കുതിച്ചുയര്ന്ന് സ്വര്ണ്ണവില. ഇരുപത്തിരണ്ട് കാരറ്റ് സ്വര്ണത്തിന് ഒരു പവന് ഇന്ന് മാത്രം 480 രൂപയാണ് കൂടിയിരിക്കുന്നത്. ഇതോടെ വില 45,920 ആയി ഉയര്ന്ന് സര്വ്വകാല റെക്കോര്ഡിലെത്തിയിരിക്കുകയാണ്.ഗ്രാമിന് 60 രൂപയാണ് കൂടിയത്. ജി എസ് ടിയും പണിക്കൂലിയും ഒക്കെ ആകുമ്പോള് അന്പതിനായിരം കൊടുത്താലും ഒരു പവന് കിട്ടാത്ത സ്ഥിതിയാണ്. 5,740 രൂപയ്ക്കാണ് വ്യാപാരം നടക്കുന്നത്.
കഴിഞ്ഞദിവസം പവന് 45,440 രൂപയ്ക്കായിരുന്നു വ്യാപാരം നടന്നത്. അതേസമയം, മൂന്നാഴ്ചയ്ക്കിടെ ആയിരങ്ങളാണ് പവന് കൂടിയത്. നാലായിരം രൂപയോളമാണ് സ്വര്ണ്ണവിലയില് കൂടിയത്.ഈ മാസം അഞ്ചിന് 41,920 രൂപയ്ക്കായിരുന്നു വ്യാപാരം നടന്നത്. ഇതാണ് ചുരുങ്ങിയ ദിവസങ്ങള്ക്കുള്ളില് നാല്പ്പത്തിയാറായിരത്തിനടുത്തെത്തിയത്. ഇരുപത്തിനാല് കാരറ്റ് ഒരു പവന് സ്വര്ണത്തിന് 528 രൂപയാണ് ഇന്ന് കൂടിയത്. ഇതോടെ വില 50,096 ആയി. ഗ്രാമിന് 66 രൂപ കൂടി. 6,262 രൂപയ്ക്കാണ് ഇന്ന് വ്യാപാരം നടക്കുന്നത്. ഇന്നലെ പവന് 49,568 രൂപയായിരുന്നു.
കണ്ണൂര് സ്ക്വാഡ് ഇനി ഒടിടിയിലേക്ക്
മമ്മൂട്ടി നായകനായി എത്തിയ പുതിയ ചിത്രം കണ്ണൂര് സ്ക്വാഡ് വൻ ഹിറ്റായി മാറിയിരിക്കുകയാണ്. ഹൈപ്പില്ലാതെ എത്തിയിട്ടും ആഗോളതലത്തില് ചിത്രം കളക്ഷൻ റെക്കോര്ഡുകള് തിരുത്തുകയും ചെയ്തു. അതിനാല് മമ്മൂട്ടിയുടെ വിജയം പ്രാധാന്യമര്ഹിക്കുന്നതുമാണ്. അഞ്ചാമാഴ്ചയിലും കുതിക്കുന്ന കണ്ണൂര് സ്ക്വാഡിന്റെ ഒടിടി റിലീസ് സംബന്ധിച്ചാണ് പുതിയ റിപ്പോര്ട്ട്.
ഡിസ്നി ഹോട്സ്റ്റാറാണ് മമ്മൂട്ടി ചിത്രത്തിന്റെ സ്ട്രീമിംഗ് റൈറ്റ്സ് നേടിയിരിക്കുന്നത് എന്നും നവംബറില് പ്രദര്ശനം ഉണ്ടാകുമെന്നും ഒടിടി പ്ലാറ്റ്ഫോമുമായി അടുത്തവൃത്തങ്ങള് സ്ഥിരീകരിച്ചു. കണ്ണൂര് സ്ക്വാഡ് ആഗോളതലത്തില് 82.95 കോടി രൂപയാണ് ആകെ നേടിയത് എന്നാണ് ട്രേഡ് അനലിസ്റ്റുകള് സാമൂഹ്യ മാധ്യമത്തില് പങ്കുവെച്ച റിപ്പോര്ട്ടില് നിന്ന് വ്യക്തമാകുന്നത്. കണ്ണൂര് സ്ക്വാഡ് ആകെ 75 കോടി രൂപ നേടിയെന്ന് ഔദ്യോഗികമായി ഒക്ടോബര് 17ന് അറിയിച്ചിരുന്നു. റിലീസിന് കണ്ണൂര് സ്ക്വാഡ് 2.40 കോടി രൂപ നേടി ബോക്സ് ഓഫീസില് കുതിപ്പിന് തുടക്കമിട്ടപ്പോള് വൻ വിജയത്തിലേക്കുള്ളതാണ് എന്ന് ഇപ്പോള് മനസിലാകുകയും ചെയ്യുന്നു.
റോബി വര്ഗീസ് രാജാണ് സംവിധാനം. റോബി വര്ഗീസ് രാജ് സംവിധായകനായി തുടക്കം മികച്ചതാക്കിയിരിക്കുന്നുവെന്നാണ് പ്രതികരണങ്ങളും. മുഹമ്മദ് ഷാഫിക്കൊപ്പം കണ്ണൂര് സ്ക്വാഡിന്റെ തിരക്കഥാ രചനയില് നടൻ റോണി ഡേവിഡ് രാജും പങ്കാളിയപ്പോള് മികച്ച ഒരു ത്രില്ലര് ചിത്രമായിരിക്കുന്നു കണ്ണൂര് സ്ക്വാഡ്. നൻപകൽ നേരത്ത് മയക്കത്തിനും റോഷാക്കിനും ശേഷം മമ്മൂട്ടി കമ്പനിയുടെ നിര്മാണത്തില് എത്തിയ കണ്ണൂര് സ്ക്വാഡിന്റെ വിതരണം ദുല്ഖറിന്റെ വേഫെറര് ഫിലിംസും ആണ്.
കണ്ണൂര് സ്ക്വാഡിലൂടെ പ്രകടനത്തില് വിസ്മയിപ്പിക്കുന്ന താരം മമ്മൂട്ടി ബോക്സ് ഓഫീസിലും റെക്കോര്ഡുകള് തീര്ക്കുന്നതിന്റെ സന്തോഷത്തിലാണ് ആരാധകരും. മമ്മൂട്ടി ജോര്ജ് മാര്ട്ടിൻ എന്ന കഥാപാത്രമായി വിസ്മയിപ്പിക്കുമ്പോള് കണ്ണൂര് സ്ക്വാഡില് കിഷോർ കുമാർ, വിജയരാഘവൻ, അസീസ് നെടുമങ്ങാട്, ശബരീഷ്, റോണി ഡേവിഡ്, മനോജ് കെ യു, അർജുൻ രാധാകൃഷ്ണൻ, ദീപക് പറമ്പോല്, ധ്രുവൻ, ഷെബിൻ ബെൻസൺ, ശ്രീകുമാർ തുടങ്ങി നിരവധി താരങ്ങളും പ്രധാന വേഷങ്ങളിലുണ്ട്. മമ്മൂട്ടിയുടേത് മാത്രമല്ല ഓരോരുത്തരുടെയും കഥാപാത്രം സിനിമയില് നിര്ണായകവുമാണ്. മമ്മൂട്ടിയുടെ നേതൃത്വത്തില് ഉത്തരേന്ത്യയിലേക്ക് ഒരു കേസ് അന്വേഷണത്തിന് പോകുന്നതുമായി ബന്ധപ്പെട്ട സംഭവങ്ങളാണ് കണ്ണൂര് സ്ക്വാഡില് പറയുന്നത്.
