ഷൂട്ടിങ് പുരോഗമിക്കുന്ന ‘കാന്താര- ചാപ്റ്റർ 1’ എന്ന സിനിമയുടെ ഭാഗമായിരുന്ന ഒരു മിമിക്രി കലാകാരൻ മരിച്ചു.മലയാളിയായ വിജു വി കെ ആണ് മരിച്ചത്. തൃശൂർ സ്വദേശിയാണ്. ബുധനാഴ്ച രാത്രി തീർത്ഥഹള്ളിയിലെ അഗുംബെയ്‌ക്ക് സമീപമായിരുന്നു ദുരന്തം. കാന്താര ഫിലിം ഷൂട്ടിങ്ങിന്റെ ഭാഗമായി അഗുംബെയ്‌ക്ക് സമീപമുള്ള ഒരു ഹോംസ്റ്റേയില്‍ താമസിക്കുകയായിരുന്നു അദ്ദേഹം.ബുധനാഴ്ച രാത്രി വിജുവിന് പെട്ടെന്ന് നെഞ്ചുവേദന അനുഭവപ്പെട്ടതായി റിപ്പോർട്ടുകള്‍ പറയുന്നു. ഉടൻ തന്നെ തീർത്ഥഹള്ളി ആശുപത്രിയിലേക്ക് കൊണ്ടുപോയെങ്കിലും വഴിമധ്യേ അദ്ദേഹം മരിച്ചു.
വിജുവിന്റെ മൃതദേഹം തീർത്ഥഹള്ളിയിലെ ജെസി ആശുപത്രിയില്‍ സൂക്ഷിച്ചിരിക്കുകയാണ്. കേരളത്തില്‍ നിന്ന് കുടുംബാംഗങ്ങള്‍ ഉടൻ എത്തുമെന്ന് പ്രതീക്ഷിക്കുന്നു.’കാന്താര: ചാപ്റ്റർ 1′ എന്ന സിനിമയുടെ ജൂനിയർ ആർട്ടിസ്റ്റായ കോട്ടയം സ്വദേശിയായ എം.എഫ്. കപില്‍ നേരത്തെ മരിച്ചിരുന്നു. ഒരു സംഘത്തോടൊപ്പം കൊല്ലൂരിലെ സൗപർണിക നദിയില്‍ നീന്താൻ പോയ ഇദ്ദേഹം വെള്ളത്തിന്റെ ആഴം അറിയാതെ നദിയില്‍ ഇറങ്ങിയപ്പോഴാണ് മരണം സംഭവിച്ചത്.
മെയ് 6 നാണ് ഈ സംഭവം നടന്നത്.അതിനുശേഷം, ചിത്രത്തിലെ ഒരു പ്രധാന വേഷം ചെയ്തിരുന്ന നടൻ രാകേഷ് പൂജാരിയും മരിച്ചു. സുഹൃത്തിന്റെ വിവാഹത്തില്‍ പങ്കെടുക്കുമ്ബോള്‍ നൃത്തം ചെയ്യുന്നതിനിടയില്‍ അദ്ദേഹം കുഴഞ്ഞുവീഴുകയായിരുന്നു. ഈ മരണത്തിന്റെ കാരണവും ഹൃദയാഘാതം എന്നാണ് സ്ഥിരീകരിച്ചത്.ഷെഡ്യൂളിന്റെ തുടക്കത്തില്‍, ജൂനിയർ ആർട്ടിസ്റ്റുകളെ കൊണ്ടുപോകുന്ന ഒരു ബസ് കൊല്ലൂരില്‍ വെച്ച്‌ മറിഞ്ഞു. ആ സംഭവത്തില്‍ ആർക്കും പരിക്കില്ല.
കൂടാതെ മോശം കാലാവസ്ഥ കാരണം ചിത്രത്തിനായി നിർമ്മിച്ച ഒരു വലിയ സെറ്റ് തകർന്നു വീണിരുന്നു. ഇതിനിടയില്‍ പ്രാദേശിക പരിസ്ഥിതിക്ക് തടസ്സം സൃഷ്ടിച്ചുവെന്നാരോപിച്ച്‌ വനം ഉദ്യോഗസ്ഥരുടെ പരിശോധനയും സംഘത്തിന് നേരിടേണ്ടി വന്നു
