ഇന്ത്യന് പ്രീമിയര് ലീഗ് (ഐപിഎല്) 2026 സീസണ് മല്സരങ്ങള് മാര്ച്ച് 26 ന് ആരംഭിക്കും. ഫൈനല് മല്സരം മെയ് 31 ന് നടക്കുമെന്നും റിപോര്ട്ട്.ടൂര്ണമെന്റിന്റെ കൃത്യമായ ഷെഡ്യൂള് വെളിപ്പെടുത്തിയിട്ടില്ല. വരും ദിവസങ്ങളില് ഔദ്യോഗിക പ്രഖ്യാപനമുണ്ടാവും.ഐപിഎല് സീസണിന് മുന്നോടിയായുള്ള മിനി താര ലേലം ഇന്ന് (ഡിസംബര് 16 ചൊവ്വാഴ്ച) അബുദാബിയില് നടക്കാനിരിക്കെയാണ് തീയതികള് പുറത്തുവരുന്നത്. ലേലത്തിന് മുന്നോടിയായി പത്ത് ഫ്രാഞ്ചൈസികളുടെയും യോഗം ബിസിസിഐ വിളിച്ചുചേര്ത്തിരുന്നു. ഈ യോഗത്തില് വരാനിരിക്കുന്ന പതിപ്പിന്റെ തീയതികള് വെളിപ്പെടുത്തിയതായി ക്രിക്ക്ബസ് റിപ്പോര്ട്ട് ചെയ്തു.ഐപിഎല് സിഇഒ ഹേമാങ് അമിന് ആണ് ഫ്രാഞ്ചൈസികളുമായുള്ള ബ്രീഫിങില് വിവരങ്ങള് നല്കിയത്.
യോഗത്തില് ടൂര്ണമെന്റിന്റെ കൃത്യമായ ഷെഡ്യൂള് അവതരിപ്പിച്ചിട്ടില്ലെങ്കിലും പ്രധാന തീയതികള് പുറത്തുവിട്ടു.നിലവിലെ രീതികള് അനുസരിച്ച് നിലവിലെ ചാമ്ബ്യന്മാരുടെ ഹോം ഗ്രൗണ്ടിലാണ് ഉദ്ഘാടന മത്സരം നടക്കുക. ഐപിഎല് 2025 ചാമ്ബ്യന്മാരായ റോയല് ചലഞ്ചേഴ്സ് ബെംഗളൂരു (ആര്സിബി) ഉദ്ഘാടന മത്സരം കളിക്കുമെന്ന് ഉറപ്പാണ്. എന്നാല്, ഉദ്ഘാടനം ആര്സിബിയുടെ ഹോം ഗ്രൗണ്ടായ ചിന്നസ്വാമി സ്റ്റേഡിയത്തില് നടക്കുമോയെന്ന് ഉറപ്പില്ല. കഴിഞ്ഞ തവണ വിജയാഘോഷത്തിനിടെ തിക്കിലും തിരക്കിലും ആളുകള് മരിക്കാനിടയായതിനാല് അധികൃതര് സ്റ്റേഡിയത്തില് മല്സരത്തിന് അനുമതി നിഷേധിച്ചതായി നേരത്തേ റിപോര്ട്ടുകള് വന്നിരുന്നു.ചിന്നസ്വാമി സ്റ്റേഡിയത്തിന്റെ ലഭ്യത അനിശ്ചിതത്വത്തിലാണ്. സുരക്ഷാ നിബന്ധനകള് പൂര്ണമായും പാലിച്ചാല് മല്സരങ്ങള് നടത്താനുള്ള അനുമതി നല്കാമെന്ന് സംസ്ഥാന സര്ക്കാര് കര്ണാടക സംസ്ഥാന ക്രിക്കറ്റ് അസോസിയേഷനെ (കെഎസ്സിഎ) അറിയിച്ചിട്ടുണ്ട്. സ്റ്റേഡിയത്തിന് പുറത്തുണ്ടായ തിക്കിലും തിരക്കിലും പെട്ട് കഴിഞ്ഞ വര്ഷം 11 പേര് മരിച്ചതിന് ശേഷം ഇവിടെ മല്സരങ്ങളൊന്നും നടന്നിട്ടില്ല. വനിതാ ലോകകപ്പ് മത്സരങ്ങളും ഇവിടെ നിന്ന് മാറ്റി.ഇന്ന് നടക്കുന്ന താര ലേലത്തില് 77 കളിക്കാരെയാണ് ഫ്രാഞ്ചൈസികള് തെരഞ്ഞെടുക്കുക. ഇതില് 31 സ്ലോട്ടുകള് വിദേശ കളിക്കാര്ക്കുള്ളതാണ്. ലേലത്തിനെത്തുന്ന താരങ്ങളുടെ ഏറ്റവും ഉയര്ന്ന അടിസ്ഥാന വില രണ്ട് കോടി രൂപയും കുറഞ്ഞത് 30 ലക്ഷം രൂപയുമാണ്. രണ്ട് കോടി രൂപ മൂല്യമുള്ള 40 കളിക്കാര് ലേലത്തിലുണ്ട്.കാമറൂണ് ഗ്രീന്, ഡേവിഡ് മില്ലര്, ഡെവണ് കോണ്വേ, ജെയ്ക്ക് ഫ്രേസര്-മക്ഗുര്ക്ക്, ഗസ് ആറ്റ്കിന്സണ്, വനിന്ദു ഹസരംഗ, വെങ്കിടേഷ് അയ്യര്, ലിയാം ലിവിങ്സ്റ്റണ് തുടങ്ങിയവരാണ് ലേലത്തിനെത്തുന്ന താരങ്ങളില് പ്രമുഖര്.
