തൊടുപുഴ: കേരളത്തിലെ വാഗമണ്ണില് നിര്മ്മിച്ച ഇന്ത്യയിലെ ഏറ്റവും നീളം കൂടിയ ചില്ലുപാലത്തിന്റെ ഉദ്ഘാടനം ഇന്ന്. പൊതുമരാമത്ത്, വിനോദസഞ്ചാര മന്ത്രി പിഎ മുഹമ്മദ് റിയാസാണ് ചില്ലുപാലവും സാഹസിക വിനോദ പാര്ക്കും ഉദ്ഘാടനം ചെയ്യുക.വൈകീട്ട് അഞ്ചിന് വാഗമണ് അഡ്വഞ്ചര് പാര്ക്കില് വെച്ചാണ് ഉദ്ഘാന പരിപാടി. വാഴൂര് സോമന് എം.എല്.എ അധ്യക്ഷത വഹിക്കും. ഡീന് കുര്യാക്കോസ് എം.പി മുഖ്യാതിഥിയാകും. ഇടുക്കി ഡിടിപിസിയും പെരുമ്പാവൂരിലെ ഭാരത് മാത വെഞ്ചേഴ്സ് പ്രൈവറ്റ് ലിമിറ്റഡിന്റെ കിക്കി സ്റ്റാര്സും ചേര്ന്നാണ് ഗ്ലാസ് ബ്രിഡ്ജ് ഒരുക്കിയിരിക്കുന്നത്.
സ്വകാര്യ സംരംഭകരുമായി ചേര്ന്ന് ടൂറിസം കേന്ദ്രങ്ങള് വികസിപ്പിക്കുക എന്ന സര്ക്കാര് നയത്തിന്റെ ഭാഗമായി നിര്മ്മിച്ച പാലം കാന്റിലിവര് മാതൃകയിലാണ് ഒരുക്കിയത്. ഓണത്തിന് തുറക്കുമെന്ന് പ്രതീക്ഷിച്ചിരുന്നെങ്കിലും വൈകുകയായിരുന്നു.സമുദ്രനിരപ്പില്നിന്ന് 3600 അടി ഉയരത്തിലുള്ള വാഗമണ്ണില് 120 അടി നീളത്തില് ജര്മനിയില്നിന്ന് ഇറക്കുമതി ചെയ്ത ഗ്ലാസില് നിര്മിച്ച പാലത്തിനു മൂന്ന് കോടിയാണ് നിര്മാണച്ചെലവ്. 35 ടണ് സ്റ്റീലാണ് പാലം നിര്മാണത്തിന് ഉപയോഗിച്ചിരിക്കുന്നത്.
ഒരേസമയം 15 പേര്ക്ക് കയറാവുന്ന പാലത്തില് കയറി നിന്നാല് മുണ്ടക്കയം, കൂട്ടിക്കല്, കൊക്കയാര് മേഖലകള്വരെ കാണാന് സാധിക്കും. ആകാശ ഊഞ്ഞാല്, സ്കൈ സൈക്ലിങ്, സ്കൈ റോളര്, റോക്കറ്റ് ഇജക്ടര്, ഫ്രീഫോള്, ജയന്റ് സ്വിങ്, സിപ്ലൈന് തുടങ്ങിയവയും സാഹസിക പാര്ക്കില് ഒരുക്കിയിട്ടുണ്ട്.
