മാലിദ്വീപ് വിവാദം കത്തിപ്പടരുന്നതിനിടെ ലക്ഷദ്വീപില്‍ പുതിയ വിമാനത്താവളം വികസിപ്പിക്കാനുള്ള പദ്ധതികളുമായി ഇന്ത്യ. മിനിക്കോയ് ദ്വീപുകളില്‍ സൈനിക, വാണിജ്യ വിമാനങ്ങള്‍ പ്രവര്‍ത്തിപ്പിക്കുന്ന പുതിയ വിമാനത്താവളം നിര്‍മ്മിക്കുമെന്നാണ് റിപ്പോര്‍ട്ട്. പ്രധാനമന്ത്രി നരേന്ദ്ര മോദിയുടെ സന്ദര്‍ശനത്തിന് പിന്നാലെ ലക്ഷദ്വീപില്‍ വിനോദസഞ്ചാരികളുടെ ഒഴുക്കുണ്ടാകുമെന്ന വിലയിരുത്തലിനിടെയാണ് വിമാനത്താവള പദ്ധതി മുന്നോട്ട് വരുന്നത്.
ടൂറിസത്തിനൊപ്പം അറബിക്കടലിലും ഇന്ത്യന്‍ മഹാസമുദ്ര മേഖലയിലും നിരീക്ഷണം നടത്താന്‍ പുതിയ പദ്ധതിയിലൂടെ ഇന്ത്യ ലക്ഷ്യമിടുന്നു. യുദ്ധവിമാനങ്ങള്‍, മറ്റ് സൈനിക വിമാനങ്ങള്‍, വാണിജ്യ വിമാനങ്ങള്‍ എന്നിവ പ്രവര്‍ത്തിപ്പിക്കാന്‍ പ്രാപ്തമായ ഒരു ഡ്യുവല്‍ പര്‍പ്പസ് എയര്‍ഫീല്‍ഡ് ഉണ്ടാക്കാനാണ് പദ്ധതിയെന്നാണ് റിപ്പോര്‍ട്ട്.
മിനിക്കോയ് ദ്വീപുകളില്‍ ഒരു പുതിയ എയര്‍ഫീല്‍ഡ് വികസിപ്പിക്കാന്‍ നേരത്തെ തന്നെ സര്‍ക്കാരിന് നിര്‍ദ്ദേശം ലഭിച്ചിരുന്നു. നിലവിലെ സാഹചര്യങ്ങള്‍ ചൂണ്ടിക്കാട്ടി പദ്ധതി നിര്‍ദ്ദേശം വീണ്ടും സര്‍ക്കാരിന് അയക്കുകയായിരുന്നു.
ഇന്ത്യൻ പ്രധാനമന്ത്രി നരേന്ദ്ര മോദിക്കും ഇന്ത്യയിലെ ജനങ്ങള്‍ക്കുമെതിരെ സര്‍ക്കാരിലെ ചില ഉപമന്ത്രിമാര്‍ സോഷ്യല്‍ മീഡിയ പ്ലാറ്റ്‌ഫോമുകളില്‍ നടത്തിയ ആക്ഷേപകരമായ പ്രസ്താവനകളെ ശക്തമായി അപലപിക്കുന്നതായി മാലിദ്വീപ് ടൂറിസം ഇൻഡസ്ട്രി അസോസിയേഷൻ വ്യക്തമാക്കി. മാലിദ്വീപിന്റെ ഏറ്റവും അടുത്ത അയല്‍ക്കാരനും പങ്കാളിയുമാണ് ഇന്ത്യ. മാലിദ്വീപിന്റെ ചരിത്രത്തിലെ എല്ലാ പ്രതിസന്ധികളിലും ഇന്ത്യ നമുക്കൊപ്പം നിന്നു. ഇന്ത്യയിലെ ഗവണ്‍മെന്റും ജനങ്ങളും തങ്ങളുമായി ഉണ്ടാക്കിയിരിക്കുന്ന അടുത്ത ബന്ധത്തിന് തങ്ങള്‍ നന്ദിയുള്ളവരാണെന്നും പ്രസ്താവനയില് പറയുന്നു.
മാലിദ്വീപിലെ വിനോദസഞ്ചാര വ്യവസായത്തില്‍ ഇന്ത്യ സ്ഥിരവും പ്രധാനപ്പെട്ടതുമായ സംഭാവന നല്‍കിയിട്ടുണ്ട്. കൊറോണ വൈറസ് മഹാമാരി സമയത്ത് അതിര്‍ത്തികള്‍ തുറന്നതിന് ശേഷം ട്രാക്കിലേക്ക് തിരിച്ചുവരാനുള്ള ഞങ്ങളുടെ ശ്രമങ്ങളെ പിന്തുണച്ച ഒരു സഖ്യകക്ഷിയാണ് ഇന്ത്യ. ഇരു രാജ്യങ്ങളും തമ്മിലുള്ള ബന്ധം നിരവധി തലമുറകളിലേക്കും തുടരണമെന്നാണ് ഞങ്ങളുടെ ആഗ്രഹം. ഞങ്ങള്‍ തമ്മിലുള്ള മികച്ച ബന്ധത്തെ പ്രതികൂലമായി ബാധിക്കുന്ന പ്രസ്താവനകളില്‍ നിന്നും പ്രവര്‍ത്തനങ്ങളില്‍ നിന്നും ഞങ്ങള്‍ അകലം പാലിക്കുന്നു, പ്രസ്താവനയില് വ്യക്തമാക്കി.
പ്രധാനമന്ത്രി നരേന്ദ്ര മോദിയുടെ ലക്ഷദ്വീപ് സന്ദര്‍ശനത്തിന് പിന്നാലെയാണ് വിവാദം പൊട്ടിപ്പുറപ്പെട്ടത്. മാലിദ്വീപിലേക്കുള്ള തങ്ങളുടെ യാത്ര റദ്ദാക്കിയതായി സോഷ്യല്‍ മീഡിയയില്‍ പലരും അവകാശപ്പെട്ടു. അതേസമയം, ടൂര്‍ ഓപ്പറേറ്റര്‍മാരും വലിയ തോതില്‍ ടിക്കറ്റുകള്‍ റദ്ദാക്കാനുള്ള ഒരുക്കങ്ങള്‍ ആരംഭിച്ചിട്ടുണ്ട്. അവധിക്കാലത്ത് ഇന്ത്യക്കാരുടെ പ്രിയപ്പെട്ട സ്ഥലങ്ങളിലൊന്നാണ് മാലിദ്വീപ്.
20-25 ദിവസങ്ങള്‍ക്ക് ശേഷം പ്രത്യാഘാതം വ്യക്തമാകും
മാലിദ്വീപിനെതിരെ സോഷ്യല്‍ മീഡിയയില്‍ വര്‍ധിച്ചുവരുന്ന പ്രതിഷേധത്തിന്റെ ഫലം അടുത്ത 20-25 ദിവസങ്ങള്‍ക്കുള്ളില്‍ വ്യക്തമാകുമെന്നാണ് ഇന്ത്യൻ അസോസിയേഷൻ ഓഫ് ടൂര്‍ ഓപ്പറേറ്റേഴ്‌സിന്റെ വിലയിരുത്തല്‍. കഴിഞ്ഞ കുറച്ച്‌ ദിവസങ്ങളായി മാലിദ്വീപിനായി പുതിയ ബുക്കിങ്ങുകളൊന്നും ഉണ്ടായിട്ടില്ലെന്ന് ഇവര്‍ പറയുന്നു. അതേസമയം, വിമാനങ്ങളും ഹോട്ടലുകളും ഇതിനകം ബുക്ക് ചെയ്തവര്‍ റദ്ദാക്കില്ലെന്ന് പ്രതീക്ഷിക്കുന്നതായി അസോസിയേഷൻ പ്രസിഡന്റ് രാജീവ് മെഹ്‌റ പ്രസ്താവിച്ചു. എന്നിരുന്നാലും, പുതിയ ബുക്കിംഗുകളെക്കുറിച്ചുള്ള പ്രതീക്ഷകള്‍ കുറവാണ്.
മാലദ്വീപ് എങ്ങനെയാണ് ഇന്ത്യയെ ആശ്രയിക്കുന്നത്?
കഴിഞ്ഞ ഏതാനും വര്‍ഷങ്ങളായി മാലദ്വീപ് സന്ദര്‍ശിക്കുന്ന ഇന്ത്യൻ വിനോദസഞ്ചാരികളുടെ എണ്ണത്തില്‍ ഗണ്യമായ വര്‍ധനയുണ്ടായിട്ടുണ്ട്. 2018ല്‍ രാജ്യത്തിന്റെ ടൂറിസം വിപണിയില്‍ ഇന്ത്യയുടെ പങ്ക് ഏകദേശം 6.1% ആയിരുന്നു. 2019-ല്‍, 2018-നെ അപേക്ഷിച്ച്‌ ഇന്ത്യയില്‍ നിന്നുള്ള വിനോദസഞ്ചാരികളുടെ ഇരട്ടിയോളം വിനോദസഞ്ചാരികള്‍ ദ്വീപ് രാജ്യത്ത് എത്തി, ഇത് മറ്റ് രാജ്യങ്ങളെ അപേക്ഷിച്ച്‌ ഏറ്റവും ഉയര്‍ന്ന രണ്ടാമത്തെ കണക്കാണ്.
2020 ല്‍ മാലിദ്വീപിന്റെ ടൂറിസം വിപണിയുടെ ഏറ്റവും വലിയ ഉറവിടമായി ഇന്ത്യ മാറി. ഏകദേശം 63,000 ഇന്ത്യക്കാരാണ് ഈ വര്‍ഷം മാലിദ്വീപ് സന്ദര്‍ശിച്ചത്. 2021ലും 2022ലും ഇന്ത്യയില്‍ നിന്ന് 2.91 ലക്ഷവും 2.41 ലക്ഷവും വിനോദസഞ്ചാരികള്‍ മാലിദ്വീപ് സന്ദര്‍ശിച്ചു. ഈ രീതിയില്‍, മാലിദ്വീപിന്റെ ടൂറിസം വിപണിയില്‍ രണ്ട് വര്‍ഷങ്ങളിലും ഇന്ത്യക്കാരുടെ പങ്കാളിത്തം യഥാക്രമം 23% ഉം 14.4% ഉം ആയിരുന്നു, ഇതുമൂലം ഇന്ത്യ മികച്ച വിപണിയായി തുടര്‍ന്നു. 2023 ഡിസംബര്‍ 13 വരെ 11.1% വിപണി വിഹിതവുമായി ഇന്ത്യ മാലിദ്വീപിന്റെ രണ്ടാമത്തെ പ്രധാന വിപണിയായി തുടര്‍ന്നു. ഡിസംബര്‍ 13 വരെ 1,93,693 ഇന്ത്യൻ വിനോദസഞ്ചാരികളാണ് മാലിദ്വീപ് സന്ദര്‍ശിച്ചത്.
