കൊച്ചി: ബ്രഹ്മപുരം ദുരന്തത്തിന് ശേഷം പെയ്ത ആദ്യ മഴ കൊച്ചി നഗരവാസികളെ ആശങ്കയിലാഴ്ത്തി. മഴയ്ക്ക് പിന്നാലെ നഗരത്തിലെങ്ങും വെള്ളപ്പത പ്രത്യക്ഷപ്പെട്ടതാണ് ആശങ്കയ്ക്ക് കാരണമായത്. മഴയിൽ അമ്ലത്തിൻ്റെ സാന്നിധ്യമുണ്ടെന്ന് പല ശാസ്ത്രവിദഗ്ദ്ധരും വ്യക്തമാക്കി. ബ്രഹ്മപുരം ദുരന്തത്തിന് ശേഷം ഇതാദ്യമായാണ് നഗരത്തിൽ മഴ പെയ്യുന്നത്. രണ്ടാഴ്ചയോളം വിഷപ്പുക മൂടി നിന്ന നഗരത്തിൽ പെയ്യുന്ന മഴ ആരോഗ്യത്തിന് നല്ലതായിരിക്കില്ലെന്നും ജനങ്ങൾ ജാഗ്രത പാലിക്കണമെന്നും പല ആരോഗ്യവിദഗ്ദ്ധരും നേരത്തെ മുന്നറിയിപ്പ് നൽകിയിരുന്നു. അതേസമയം അഗ്നിബാധയുണ്ടായ ബ്രഹ്മപുരത്തും നല്ല രീതിയിൽ മഴ ലഭിച്ചത് അവിടെ ക്യാംപ് ചെയ്യുന്ന അഗ്നിരക്ഷാസേന അംഗങ്ങൾക്ക് ആശ്വാസമായി. നല്ല രീതിയിൽ ലഭിച്ച മഴ മറ്റൊരു അഗ്നിബാധയ്ക്കുള്ള സാധ്യത ഇല്ലാതാക്കുമെന്നതാണ് അവരുടെ പ്രതീക്ഷ. മലപ്പുറം മുതൽ തെക്കോട്ടുള്ള വിവിധ ജില്ലകളിൽ ഇന്ന് മഴ ലഭിച്ചു. മലയോര മേഖലയിൽ തുടങ്ങിയ മഴ പിന്നീട് കൂടുതൽ മേഖലകളിലേക്ക് വ്യാപിക്കുകയായിരുന്നു. കൊല്ലം , വയനാട് ജില്ലകളിലും ഇന്നലെ നല്ല രീതിയിൽ വേനൽ മഴ ലഭിച്ചിരുന്നു.
അധികം സൂര്യപ്രകാശമേൽക്കണ്ട,സൂര്യാഘാതത്തിന് സാധ്യത
തിരുവനന്തപുരം: ഉയർന്ന താപനിലയേക്കാൾ കേരളം ഈ ദിവസങ്ങളിൽ ഭയക്കേണ്ടത് അൾട്രാ വയലറ്റ് രശ്മികളെ. കേരളത്തിലെ മിക്ക സ്ഥലങ്ങളിലും ആൾട്രാ വയലറ്റ് രശ്മികളുടെ വികിരണം അപകടരമായ തോതിലാണ്. പകൽ നേരം തുടർച്ചയായി സൂര്യപ്രകാശം ഏൽക്കുന്നത് ഗുരുതരമായ സൂര്യാഘാതത്തിന് ഇടയാക്കുമെന്നാണ് വിദഗ്ധർ മുന്നറിയിപ്പ് നൽകുന്നത്.
തിരുവനന്തപുരത്ത് യുവി ഇൻഡെക്സ് 12, പുനലൂരിൽ 12, ആലപ്പുഴയിൽ 12, കൊച്ചി, തൃശ്ശൂർ, തിരൂർ, കോഴിക്കോട്, കൽപ്പറ്റ,കാസ‍ർകോട് എന്നിവിടങ്ങളിലും യുവി ഇൻഡെക്സ് 12, തളിപ്പറമ്പിൽ 11.യുകെ ഏജൻസിയായ വെതർ ഓൺലൈന്റെ കണക്ക് പ്രകാരം, കേരളത്തിലെ വിവിധ സ്ഥലങ്ങളിൽ ബുധനാഴ്ച രേഖപ്പെടുത്തിയ അൾട്രാ വയലറ്റ് വികിരണത്തിന്റെ തോതാണിത്.
യുവി ഇൻഡെക്സ് 10ആണെങ്കിൽ തന്നെ അപടകരം. അപ്പോഴാണ് സംസ്ഥാനത്തെ യുവി ഇൻഡെക്സ് 10ഉം കടന്ന് 12ലേക്ക് എത്തിനിൽക്കുന്നത്. സൂര്യന്റെ ഉത്തരായനത്തിലേക്കുള്ള സഞ്ചാരമാണ് മാർച്ച്, ഏപ്രിൽ മാസങ്ങളിൽ ആൾട്രാ വയലറ്റ് രശ്മികളുടെ വികിരണം ഉയരാൻ കാരണം.
സംസ്ഥാനത്ത് യുവി ഇൻഡെക്സ് 12ലേക്ക് ഉയരുന്നത് ഇതാദ്യമല്ല. മുൻവർഷങ്ങളിലും സമാനതോതിൽ തന്നെയായിരുന്നു അൾട്രാ വയലറ്റ് വികിരണം.പക്ഷെ കൂടിയ താപനിലയ്ക്ക് ഒപ്പം, അൾട്രാ വയലറ്റ് വികിരണം കൂടി ഉയരുന്നത്, സൂര്യാഘാത സാധ്യത വ‌ർധിപ്പിക്കും.പകൽ 11.30 മുതൽ വെയിൽ താഴുന്നത് വരെ പുറത്തിറങ്ങുമ്പോൾ അതീവ ജാഗ്രത പാലിക്കണം.തുടർച്ചയായി സൂര്യപ്രകാശം ഏൽക്കുന്നത് നിർബന്ധമായും ഒഴിവാക്കണം.
അടുത്ത ദിവസങ്ങളിലും യുവി ഇൻഡെക്സ് ഉയർന്ന് തന്നെ നിൽക്കാനാണ് സാധ്യത.മാർച്ച് അവസാനത്തോടെ കൂടുതൽ സ്ഥലങ്ങളിൽ യുവി ഇൻഡെക്സ് 12ലേക്ക് എത്താമെന്നാണ് പ്രവചനം. പൊതുവേ ഈ ദിവസങ്ങളിൽ ചൂടിന് അൽപം ശമനമുണ്ടെങ്കിലും ജാഗ്രതയിൽ വിട്ടുവീഴ്ച പാടില്ലെന്ന് ചുരുക്കം.
