ബെംഗളൂരു: യാത്രക്കാരുടെ നിരന്തരമായ ആവശ്യത്തിനൊടുവിൽ ബെംഗളൂരു നമ്മ മെട്രോയുടെ പർപ്പിൾ ലൈനിൽ കൂടുതൽ ട്രെയിനുകൾ ഓടിത്തുടങ്ങി. യാത്രാ ക്ലേശത്തിന് പരിഹാരമായി ശനിയാഴ്ച മുതൽ മജസ്റ്റിക്കിലെ കെംപഗൗഡ സ്റ്റേഷനിൽ നിന്നാണ് കൂടുതൽ ട്രെയിനുകൾ സർവീസ് ആരംഭിച്ചത്. വെള്ളിയാഴ്ചയാണ് ഇതുസംബന്ധിച്ച് ബെംഗളൂരു മെട്രോ റെയിൽ കോർപറേഷൻ ലിമിറ്റഡ് (ബിഎംആർസിഎൽ) തീരുമാനമെടുത്തത്.
ബെംഗളൂരുവിൻ്റെ കിഴക്കൻ മേഖലയിലെ വൈറ്റ്ഫീൽഡിനെയും പടിഞ്ഞാറൻ മേഖലയായ ഛാലഗട്ടയെയും ബന്ധിപ്പിക്കുന്നതാണ് നമ്മ മെട്രോയുടെ പർപ്പിൾ ലൈൻ. നിലവിൽ ഒൻപത് ട്രെയിനുകളാണ് കെംപഗൗഡ സ്റ്റേഷനിൽനിന്ന് പർപ്പിൾ ലൈനിൽ സർവീസ് നടത്തുന്നത്. പുതിയ തീരുമാനപ്രകാരം, മോണിങ് പീക്ക് ഹവേഴ്സിൽ 15 ട്രെയിനുകൾ കൂടി സർവീസ് നടത്തും. ഇതിൽ 10 ട്രെയിനുകൾ പട്ടൻദുരു അഗ്രഹാര (ഐടിപിൽ) വരെയും നാലെണ്ണം വൈറ്റ്ഫീൽഡ് വരെയും ഒരു ട്രെയിൻ ബൈയ്യപ്പനഹള്ളി വരെയും സർവീസ് നടത്തും.
കെംപഗൗഡ സ്റ്റേഷനിൽനിന്ന് രാവിലെ 8:48 മുതലാണ് പുതിയ ട്രെയിനുകൾ സർവീസ് ആരംഭിക്കുക. 8:48, 8:58, 9:08, 9:18, 9:29, 9:39, 9:50, 10, 10:11, 10:21, 10:39, 10:50, 11, 11:22 എന്നിങ്ങനെയാണ് പുതിയ ട്രെയിനുകളുടെ സമയക്രമം.
കൂടാതെ, പർപ്പിൾ ലൈനിലെ ഗരുഡചാർപാളയത്തിൽ അവസാനിക്കുന്ന 14ൽ ആറ് ട്രെയിനുകൾ പട്ടൻദുരു അഗ്രഹാര വരെ നീട്ടിയതായും ബിഎംആർസിഎൽ അറിയിച്ചു. യാത്രക്കാരുടെ സൗകര്യാർഥം വൈകുന്നേരങ്ങളിൽ ബൈയപ്പനഹള്ളിയിൽനിന്ന് 4:40 ന് പകരം 4:20 ന് മൈസൂർ റോഡ് സ്റ്റേഷനിലേക്ക് അഞ്ച് മിനിറ്റ് ഇടവിട്ട് ട്രെയിനുകൾ സർവീസ് നടത്തുമെന്നും ബിഎംആർസിഎൽ കൂട്ടിച്ചേർത്തു. അതേസമയം ഗ്രീൻ ലൈനിലെ ട്രെയിനുകളുടെ സമയക്രമത്തിൽ മാറ്റമില്ല.
കുതിച്ചുകയറി വരുമാനം
യാത്രക്കാരുടെ എണ്ണം കൂടിയതോടെ ബെംഗളൂരു മെട്രോയുടെ വരുമാനത്തിലും വർധന ഉണ്ടായി. ജൂലൈ ആദ്യ മൂന്ന് ദിനങ്ങളിൽ പ്രതിദിന വരുമാനം രണ്ട് കോടിയിലധികം കടന്നു. ജൂലൈ ഒന്നിന് 2.59 കോടി രൂപയും രണ്ടിന് 2.30 കോടി രൂപയും മൂന്നിന് 2.16 കോടി രൂപയുമാണ് വരുമാനമായി ലഭിച്ചത്. ജൂലൈ മൂന്നിന് പ്രതിദിന യാത്രക്കാരുടെ എണ്ണം എട്ടുലക്ഷം കടന്നു.
പീക്ക് സമയങ്ങളിൽ തിരക്കോട് തിരക്ക്
ബംഗളൂരു മെട്രോയിലെ തിരക്ക് വ്യാപക പരാതിക്ക് ഇടയാക്കുന്നുണ്ട്. പീക്ക് സമയങ്ങളിൽ കാലുകുത്താൻ പോലും ഇടകിട്ടാത്ത അവസ്ഥ യാത്രക്കാർ നേരിടുന്നുണ്ട്. അനുവദനീയമായ എണ്ണത്തിലധികം യാത്രക്കാർ ട്രെയിനിൽ പ്രവേശിച്ചതോടെ ഓട്ടോമാറ്റിക് ഡോറുകൾ അടയാത്ത സാഹചര്യവും കഴിഞ്ഞ ദിവസമുണ്ടായി. ഇൻ്റർചേഞ്ച് സ്റ്റേഷനായ മജസ്റ്റിക്കിലാണ് യാത്രക്കാർ കടുത്ത ദുരിതം നേരിടുന്നത്. ആറ് കോച്ചുകളുള്ള 32 ട്രെയിനുകളായിരുന്നു ഇതുവരെ പർപ്പിൾ ലൈനിൽ സർവീസ് നടത്തിയിരുന്നത്.
