ബെംഗളൂരു: ബെംഗളൂരുവിനടുത്ത് സര്‍ജാപുരിൽ നിർമ്മിക്കുന്ന സ്വിഫ്റ്റ് എന്ന പുതിയ നഗര മേഖലയുടെ ഔദ്യോഗിക പ്രഖ്യാപനം ഡിസംബർ 14 ശനിയാഴ്ചയാണ് നടന്നത്. വലിയ പ്രതീക്ഷയോടെയാണ് ഈ പുതിയ നഗരമേഖലയെ ബെംഗളൂരു നോക്കിക്കാണുന്നത്. കഴിഞ്ഞ ദിവസങ്ങളിൽ ചർച്ചയായ ക്വിൻ (KWIN) സിറ്റിക്ക് സമാനമായ ഒരു നഗരം തന്നെയായിരിക്കും സ്വിഫ്റ്റ്. ദബാസ്പേട്ടിനും ദൊഡ്ഡബല്ലാപുരിനും ഇടയിലായിരിക്കും ക്വിൻ സിറ്റിയുടെ സ്ഥാനം. ഈ രണ്ട് നഗരങ്ങളും ബെംഗളൂരുവിന് അനുബന്ധമാകും. ദക്ഷിണേന്ത്യയിലെ ഏറ്റവും വലിയ നഗരം എന്ന ഖ്യാതി തുടർന്നും ബെംഗളൂരു കൈവശം വെക്കുന്നതിന് ഈ നഗരവ്യാപനം സഹായകമാകും.
സ്വിഫ്റ്റ് (SWIFT) എന്നതിന്റെ പൂർണ രൂപം ഇങ്ങനെയാണ്: സ്റ്റാർട്ടപ്പ്സ്, വർക്സ്പേസസ്, ഇന്നവേഷൻ, ഫിനാൻസ്, ടെക്നോളജി. പേരിൽ തന്നെ നഗരം ശ്രദ്ധ കേന്ദ്രീകരിക്കാൻ ഉദ്ദേശിക്കുന്ന മേഖലകളുണ്ട്. ഈ രണ്ട് പുതിയ നഗര മേഖലകളും സമീപത്ത് വളരാൻ ശ്രമിക്കുന്ന തമിഴ്നാടൻ നഗരമായ ഹൊസ്സൂരിന്റെ സാധ്യതകളെ കുറയ്ക്കാനും ഇടയുണ്ട്. കർണാടക മന്ത്രി എംബി പാട്ടീലിന്റെ അഭിപ്രായപ്രകാരം സ്വിഫ്റ്റ് നഗരം ബെംഗളൂരുവിന്റെ സ്റ്റാർട്ടപ്പ് ഇക്കോസിസ്റ്റത്തിന് ഊർജ്ജമായി മാറും.
എന്തെല്ലാമാണ് സർജാപുരിൽ ഒരുങ്ങുന്ന ഈ നഗരത്തിന്റെ പ്രത്യേകതകൾ?:ആയിരം ഏക്കറിലാണ് സ്വിഫ്റ്റ് നഗരം ഒരുങ്ങുന്നത്. ഇത് ഇലക്ട്രോണിക് സിറ്റി പോലെയും ഐടിപിഎൽ പോലെയും ബെംഗളൂരുവിന്റെ പുതിയ സാധ്യതകൾ തേടുന്ന നഗരമേഖലയായിരിക്കും. നഗരത്തിൽ സ്റ്റാർട്ടപ്പുകൾക്കായി പ്രത്യേക ഇടം നൽകുന്ന കേന്ദ്രമായിരിക്കും ഇത്.
എൻഎച്ച് 44, എൻഎച്ച് 48 എന്നീ ഗതാഗത മാർഗ്ഗങ്ങളുടെ സാമീപ്യം ഈ പുതിയ നഗരമേഖലയുടെ വളർച്ചാ സാധ്യത കൂട്ടും. പത്തോളം പ്ലഗ് ആൻഡ് പ്ലേ കേന്ദ്രങ്ങൾ ഇവിടെയുണ്ടാകും. സ്ഥാപനങ്ങൾ തുടങ്ങാൻ ആഗ്രഹിക്കുന്നവർക്ക് എല്ലാ സൗകര്യങ്ങളും ഈ കേന്ദ്രങ്ങളിൽ ഒരുക്കപ്പെടും. ഓരോ കേന്ദ്രവും 20 മുതൽ 25 വരെ ഏക്കറുകളിൽ ആണ് സജ്ജീകരിക്കുക.പാട്ടത്തിന് സ്ഥലമെടുത്തും വിലയ്ക്ക് വാങ്ങിയുമെല്ലാം ഇവിടെ സ്റ്റാർട്ടപ്പുകൾ തുടങ്ങാൻ സാധിക്കും.
ഇത് ക്വിൻ സിറ്റി പ്രോജക്ടിന് സമാന്തരമായി തന്നെ നടക്കുമെന്നാണ് എംബി പാട്ടീൽ നൽകുന്ന സൂചന. നോളജ് വെൽബീയിങ് ഇനവേഷൻ സിറ്റി എന്നതാണ് ക്വിൻ സിറ്റിയുടെ പൂർണരൂപം. ഏതാണ്ട് 2,000 ഏക്കറിലാണ് ഈ നഗരം ഉയരുന്നത്. അഡ്വാൻസ്ഡ് മാനുഫാക്ചറിങ്, ലൈഫ് സയൻസസ്, അഡ്വാൻസ്ഡ് മെറ്റീരിയലുകൾ, ഫ്യൂച്ചർ മൊബിലിറ്റി, സെമികണ്ടക്ടറുകൾ, എയ്‌റോസ്‌പേസ്, ഡിഫൻസ്, ബഹിരാകാശ സാങ്കേതികവിദ്യ തുടങ്ങിയവയിൽ അധിഷ്ഠിതമായ വ്യവസായങ്ങളാണ് ഇവിടെ വരിക. ചുരുക്കത്തിൽ, ക്വിൻ സിറ്റി പരിപക്വമായ വ്യാവസായിക സംരംഭങ്ങളെ ലക്ഷ്യമാക്കും. സ്വിഫ്റ്റ് സിറ്റി നവവ്യവസായ സാധ്യതകളിലേക്ക് ശ്രദ്ധ നൽകും.
കെംപെഗൗഡ അന്താരാഷ്ട്ര വിമാനത്താവളത്തിനടുത്താണ് ക്വിൻ സിറ്റി വരിക. 2000 ഏക്കർ ഭൂമി ഇതിനായി കണ്ടു വെച്ചിട്ടുണ്ട്. ഈ നഗരത്തിലേക്ക് 40,000 കോടി രൂപയുടെ നിക്ഷേപമാണ് പ്രതീക്ഷിക്കുന്നത്. 80,000 പുതിയ തൊഴിലുകൾ ഇവിടെ സൃഷ്ടിക്കപ്പെടും.
ചെന്നൈയും ഹൈദരാബാദും, കൊച്ചിയും അമരാവതിയും അടക്കമുള്ള ദക്ഷിണേന്ത്യൻ നഗരങ്ങൾ ബെംഗളൂരുവിന് കടുത്ത മത്സര സാഹചര്യം ഒരുക്കിക്കൊണ്ടിരിക്കുകയാണ്. പരസ്പരം ശക്തമായി വെല്ലുവിളിക്കാൻ ഓരോ നഗരങ്ങളും ശ്രമിക്കുന്നു. ഇതിനിടയിൽ ഹൊസൂർ പോലുള്ള പുതിയ നഗരങ്ങളെ വളർത്തിക്കൊണ്ടു വന്ന് ബെംഗളൂരുവിനെ തൊട്ടടുത്ത് നിന്ന് വെല്ലുവിളിക്കാൻ ശ്രമം നടക്കുന്നുണ്ട്. ഈ സാഹചര്യത്തിലാണ് ക്വിൻ സിറ്റിയും സ്വിഫ്റ്റ് സിറ്റിയും അവതരിപ്പിച്ച് കർണാടക സർക്കാർ രംഗത്തെത്തുന്നത്. ബെംഗളൂരുവിനെ വെല്ലുവിളിക്കുക എത്ര എളുപ്പമാകില്ല എന്നതു തന്നെയാണ് സന്ദേശം
