ബെംഗളൂരു: ഐടി നഗരമായ ബെംഗളൂരുവിൻ്റെ സുഗമമായ ഗതാഗതത്തിന് കൂടുതൽ ഡബിൾ ഡെക്കർ ലൈനുകൾ ഒരുക്കും. നഗരത്തിലെ തിരക്ക് കണക്കിലെടുത്ത് വേണ്ടത് ഡബിൾ ഡെക്കർ ലൈനുകളാണെന്ന് സംസ്ഥാന സർക്കാർ വ്യക്തമാക്കിയിരുന്നു. ഭൂമി ഏറ്റെടുക്കുന്നതിലെ തടസ്സങ്ങളും സ്ഥല പരിമിതിയും മൂലമാണ് ഡബിൾ ഡെക്കർ ലൈൻ പദ്ധതികളുമായി സർക്കാർ മുന്നോട്ട് പോകുന്നത്.
ബെംഗളൂരു മെട്രൊയുടെ മൂന്നാം ഘട്ടത്തിൻ്റെ ഭാഗമായി പുതിയ ഡബിൾ ഡെക്കർ ലൈൻ നിർമിക്കുമെന്ന ഏറ്റവും പുതിയ റിപ്പോർട്ടാണ് പുറത്തുവരുന്നത്. ഡബിൾ ഡെക്കർ ലൈൻ പദ്ധതിക്ക് ബാംഗ്ലൂർ മെട്രോ ലിമിറ്റഡ് (ബിഎംആർസിഎൽ) പുതിയ പദ്ധതിക്ക് പച്ചക്കൊടി കാണിച്ചു. 40.65 കിലോമീറ്റർ ദൈർഘ്യത്തിലാകും പുതിയ ഡബിൾ ഡെക്കർ ലൈൻ നിർമിക്കുക. ജെപി നഗർ നാലാം ഘട്ടത്തിൽ നിന്ന് കെമ്പാപുര വരെയും (32.15 കിലോമീറ്റർ), മറ്റൊന്ന് ഹൊസഹള്ളിയിൽ നിന്ന് കടബാഗരെ വരെയുമാണ് (12.5 കിലോമീറ്റർ) പദ്ധതി.
ബെംഗളൂരു നഗരത്തിലെ രണ്ടാമത്തെ ഡബിൾ ഡെക്കർ പദ്ധതിയാണിത്. ആദ്യത്തേത് സെൻട്രൽ സിൽക്ക് ബോർഡിൽ നിന്ന് റാഗിഗുഡയിലേക്കുള്ള മൂന്ന് കിലോമീറ്റർ പാതയായിരുന്നു. ബെംഗളൂരുവിൽ ശക്തമാകുന്ന ഗതാഗതക്കുരുക്ക് ദൈനംദിന യാത്രക്കാർക്ക് ബുദ്ധിമുട്ട് സൃഷ്ടിക്കുകയാണ്. ഡബിൾ ഡെക്കർ ഇടനാഴി വരുന്നതോടെ ഗതാഗതക്കുരിക്കിൻ്റെ തീവൃത കുറയും. മെട്രോ വയഡക്റ്റിന് താഴെയായി റോഡുകൾ വരുന്നതിനാൽ സുഗമമായ റോഡ് കണക്റ്റിവിറ്റിയും വേഗത്തിലുള്ള പൊതുഗതാഗതവും ലഭ്യമാകും.
ബെംഗളൂരു മെട്രോ മൂന്നാം ഘട്ടത്തിൻ്റെ ഭാഗമായ മെട്രോ പാത വിലുപീകരണ ചർച്ചകൾ ആരംഭിച്ചിരുന്നു. ഇതിനിടെയാണ് ഡബിൾ ഡെക്കർ ലൈൻ നിർമിക്കാനുള്ള തീരുമാനമെടുത്തത്. സ്ഥലപരിമിതി പ്രശ്നം രൂക്ഷമായതിനാൽ എലിവേറ്റഡ് റോഡുകളും മെട്രോ വയഡക്റ്റുകളും സംയോജിപ്പിച്ച് ഗതാഗതം സുഗമമാക്കുകയാണ് ലക്ഷ്യം. പുതിയ പാതയ്ക്ക് രണ്ട് ലെവലുകൾ ഉണ്ടാകും. ഒന്നിലൂടെ മെട്രോ കടന്നുപോകുമ്പോൾ രണ്ടാമത്തെ പാതയിലൂടെ വാഹനങ്ങൾ സഞ്ചരിക്കും.
8,916 കോടി ചെലവ് പ്രതീക്ഷിക്കുന്ന പദ്ധതിയുടെ ഭൂമി ഏറ്റെടുക്കലിന് മാത്രം 2,548 കോടി രൂപ വേണ്ടിവരും. മെട്രോയുടെ നിർമാണത്തിന് 6,368 കോടിയും ആവശ്യമാണ്. 2025 – 2026ലെ സംസ്ഥാന ബജറ്റിൽ പ്രഖ്യാപിച്ചത് പ്രകാരം പദ്ധതിക്കുള്ള ധനസഹായം സർക്കാർ കൈമാറിയേക്കും. അതേസമയം, പദ്ധതിക്ക് ധനസഹായം നൽകുന്നതിനായി ജാപ്പനീസ് ഏജൻസിയുമായി ചർച്ചകൾ നടത്തിവരികയാണ്. രണ്ട് മാസത്തിനുള്ളിൽ പ്ലാൻ ഉൾപ്പെടെയുള്ളവ തയാറാക്കും. തുടർന്ന് നിർമാണ പ്രവൃത്തികളിലേക്ക് കടക്കും.
