മലയാളികള്‍ക്ക് ഇത് ആഘോഷങ്ങളുടെ കാലമാണ്. അതില്‍ ഏറ്റവും വലിയ ആഘോഷമായ വിഷുവിനെ വരവേല്‍ക്കാൻ മലയാളികള്‍ ഒരുങ്ങി കഴിഞ്ഞു.വിഷുവിന് കൃത്യം ഒരു മാസം ഇനിയുണ്ട്. എങ്കിലും കേരളത്തിന് പുറത്തുള്ള മലയാളികള്‍ക്ക് നാട്ടിലെത്തണമെങ്കില്‍ ഇപ്പോഴേ ടിക്കറ്റ് ബുക്ക് ചെയ്തേ മതിയാകൂ. ബെംഗളൂരുവില്‍ നിന്ന് കേരളത്തിലേക്ക് വരാൻ ആഗ്രഹിക്കുന്നവരാണ് നിങ്ങളെങ്കില്‍ അധികം വൈകാതെ തന്നെ ടിക്കറ്റുകള്‍ ബുക്ക് ചെയ്യണം.നിലവില്‍ ട്രെയിൻ ടിക്കറ്റുകള്‍ എല്ലാം ഇതിനോടകം തന്നെ വെയ്റ്റിംഗ് ലിസ്റ്റിലായ സ്ഥിതിയ്ക്ക് തത്ക്കാല്‍ ടിക്കറ്റിന് ശ്രമിക്കേണ്ടി വരും.
അതും നടന്നില്ലെങ്കില്‍ പിന്നെ ബസിനെ ആശ്രയിക്കുകയെ വഴിയുള്ളൂ. ബസിന്റെ കാര്യം നോക്കിയാല്‍ കെഎസ്‌ആർടിസിയിലെയും കർണാടക ആർടിസിയിലെയും ടിക്കറ്റുകള്‍ അതിവേഗം വിറ്റഴിയുകയാണ്. ഇത്തവണ ഏപ്രില്‍ 14നാണ് വിഷു. അതുകൊണ്ട് തന്നെ ഒരു മാസം മുമ്ബേ കെഎസ്‌ആർടിസിയില്‍ ടിക്കറ്റ് റിസർവേഷൻ ആരംഭിച്ചു കഴിഞ്ഞു. ഏപ്രില്‍ 13 ഞായറാഴ്ചയും 12 രണ്ടാം ശനിയാഴ്ചയും ആയതിനാല്‍ വെള്ളിയാഴ്ച തന്നെ വിഷു ആഘോഷിക്കാൻ മറുനാടൻ മലയാളികള്‍ക്ക് നാട്ടിലേക്ക് വരാൻ കഴിയും. വെള്ളി, ശനി, ഞായർ ദിവസങ്ങളിലെ ബസുകളില്‍ എല്ലാം വലിയ തിരക്ക് അനുഭവപ്പെടാൻ സാധ്യതയുള്ളതിനാല്‍ കഴിവതും ഇന്ന് തന്നെ ടിക്കറ്റ് ബുക്ക് ചെയ്യുന്നതാണ് നല്ലത്.
നിലവില്‍ ഏപ്രില്‍ 11ന് കെഎസ്‌ആർടിസിയില്‍ കണ്ണൂരിലേക്കുള്ള യാത്രയിലെ ഭൂരിഭാഗം ബസുകളിലെയും ടിക്കറ്റ് ബുക്കിംഗ് പൂർണ്ണമായും കഴിഞ്ഞു. അതേസമയം, കോഴിക്കോട്ടേക്കും തിരുവന്തപുരത്തേക്കുമുള്ള സർവീസുകളില്‍ നിലവില്‍ ടിക്കറ്റുകള്‍ ബാക്കിയുണ്ട്. വെള്ളിയാഴ്ച കോഴിക്കോട്ടേക്കുള്ള ചുരുക്കം ബസുകളില്‍ മാത്രമേ ബുക്കിംഗ് പൂർണ്ണമായിട്ടുള്ളൂ. ബെംഗളൂരുവില്‍ നിന്ന് എറണാകുളത്തേക്കുള്ള കെഎസ്‌ആർടിസി ബസില്‍ മൂന്ന് സർവീസുകളില്‍ ഇപ്പോള്‍ തന്നെ ബുക്കിംഗ് പൂർത്തിയായിട്ടുണ്ട്.
വെള്ളിയാഴ്ചകളില്‍ വൈകീട്ടുള്ള ബസുകളിലെ ബുക്കിംഗാണ് അതിവേഗം പൂർത്തിയാകുന്നത്. മറ്റ് സർവീസുകളില്‍ ഏതാനും ടിക്കറ്റുകളാണ് ബാക്കിയുള്ളത്. ബെംഗളൂരുവില്‍ നിന്ന് കേരളത്തിലെ വിവിധ നഗരങ്ങളിലേയ്ക്ക് സർവീസ് നടത്തുന്ന കർണാടക ആർടിസി ബസുകളിലും ഇപ്പോള്‍ നിങ്ങള്‍ക്ക് ടിക്കറ്റ് ബുക്ക് ചെയ്യാൻ കഴിയും. ഇനി സീസണ്‍ സമയം ആയതിനാല്‍ ടിക്കറ്റ് നിരക്ക് കൂടെ നോക്കാം.ബെംഗളൂരുവില്‍ നിന്ന് കോഴിക്കോട്ടേക്ക് സൂപ്പർ എക്സ്പ്രസ് എയർ ബസുകള്‍ക്ക് 640 രൂപയും, സ്വിഫ്റ്റ് ഗരുഡ എസി സീറ്റർ ബസിന് 913 രൂപയും, സ്വിഫ്റ്റ് – ഹൈബ്രിഡ് നോണ്‍ എസി സീറ്റർ കം സ്ലീപ്പർ ബസിന് 650 രൂപയും എസി മള്‍ട്ടി ആക്സിലിന് 1053 രൂപയുമാണ് ടിക്കറ്റ് നിരക്ക്.
സ്വിഫ്റ്റ് ഡീലക്സ് എയർ ബസുകള്‍ക്ക് 713 രൂപയും നല്‍കണം. ബെംഗളൂരുവില്‍ നിന്നും തിരുവനന്തപുരത്തേക്ക് 1100 മുതല്‍ 2000 വരെ ആണ് നിലവില്‍ ടിക്കറ്റ് നിരക്ക്. 983, 1631, 1533 എന്നി നിരക്കുകളില്‍ നിങ്ങള്‍ക്ക് എറണാകുളത്ത് എത്തിച്ചേരാവുന്നതാണ്. സ്ഥിരം ബസുകളിലെ സീറ്റുളുടെ ബുക്കിംഗ് പൂർത്തിയായാല്‍ സ്പെഷ്യല്‍ ബസുകള്‍ പ്രഖ്യാപിച്ചേക്കും. വിഷു പോലെയുള്ള ഉത്സവ സീസണില്‍ കെഎസ്‌ആർടിസിയും കർണാടക ആർടിസിയും സ്പെഷ്യല്‍ ബസ് സർവീസുകള്‍ നടത്താറുണ്ട്. വിഷു, ഈസ്റ്റർ സീസണിലെ തിരക്ക് പരിഗണിച്ച്‌ റെയില്‍വേ പ്രത്യേക ട്രെയിൻ പ്രഖ്യാപിക്കാനും സാധ്യതയുണ്ട്.
