ബെംഗളൂരു: വ്യാഴാഴ്ച പുലർച്ചെ 1.30ഓടെ ഫുഡ് ഡെലിവറി ബോയിയിൽ നിന്ന് നാലംഗ സംഘം 20,000 രൂപയുടെ മൊബൈൽ മോഷ്ടിച്ചു. ബാനസവാടിക്ക് സമീപം,ബാബുസാപാളയ എന്ന സ്ഥലത്താണ് സംഭവം.രാമമൂർത്തിനഗർ സ്വദേശിയായ സുജിത് ആർ നൽകിയ പരാതിയുടെ അടിസ്ഥാനത്തിൽ അജ്ഞാതരായ നാലുപേർക്കെതിരെ പോലീസ് കവർച്ചയ്ക്ക് കേസെടുത്തു.
ഫുഡ് ഓർഡർ ആൻഡ് ഡെലിവറി സ്ഥാപനത്തിലാണ് സുജിത്ത് ജോലി ചെയ്യുന്നത്. പുലർച്ചെ 1.30 ഓടെ ഭക്ഷണം എത്തിക്കാൻ ഹെന്നൂർ ഗാർഡനിലേക്ക് പോയി, സ്‌കൂട്ടറിൽ റസ്‌റ്റോറന്റിലേക്ക് മടങ്ങുമ്പോൾ രണ്ട് ഇരുചക്രവാഹനങ്ങളിലെത്തിയ നാല് പേർ ഇയാളെ ആക്രമിക്കുകയായിരുന്നു. തന്റെ കയ്യിലുള്ള വിലപിടിപ്പുള്ള വസ്തുക്കൾ നൽകാൻ അവർ ആവശ്യപ്പെട്ടു, എന്നാൽ തന്റെ പക്കൽ ഒന്നുമില്ലെന്ന് അദ്ദേഹം പറഞ്ഞു. തുടർന്ന് ഇയാളുടെ ഫോൺ തട്ടിയെടുത്ത് അക്രമികൾ രക്ഷപ്പെട്ടു. ബാനസവാടി പോലീസ് സംഘത്തിനായി തിരച്ചിൽ നടത്തിവരികയാണ്.
