ബെംഗളൂരുവില്‍ റാപ്പിഡോ ബൈക്ക് ടാക്സിയില്‍ യാത്ര ചെയ്തയാളെ ഓട്ടോ ഡ്രൈവർ പിന്തുടർന്ന് പിടിച്ചുവലിക്കാൻ ശ്രമിച്ചതായി പരാതി.സംഭവത്തിന്റെ അനുഭവം യാത്രക്കാരൻ റെഡ്ഡിറ്റിലൂടെ പങ്കുവച്ചതോടെയാണ് സംഭവം ശ്രദ്ധ നേടിയത്. ഓടിക്കൊണ്ടിരുന്ന ബൈക്കില്‍ നിന്ന് തന്നെ പിടിച്ചുവലിക്കാൻ ശ്രമിച്ചെന്നാണ് യാത്രക്കാരന്റെ ആരോപണം. രണ്ട് മുതല്‍ മൂന്ന് കിലോമീറ്റർ വരെയുള്ള ചെറിയ ദൂരത്തേക്ക് ഓട്ടോ ഡ്രൈവർമാർ 120 രൂപ നിരക്ക് ആവശ്യപ്പെട്ടതിനെ തുടർന്നാണ് യാത്രക്കാരൻ ബൈക്ക് ടാക്സി ബുക്ക് ചെയ്തതെന്നാണ് റെഡ്ഡിറ്റ് പോസ്റ്റില്‍ പറയുന്നത്. യാത്രയ്ക്കിടെ ഒരു ഓട്ടോ ഡ്രൈവർ ബൈക്കിനെ പിന്തുടരുകയും യാത്രക്കാരന്റെ കൈയില്‍ പിടിച്ച്‌ താഴേക്ക് വലിക്കാൻ ശ്രമിക്കുകയും ചെയ്തതായി പോസ്റ്റില്‍ ആരോപിക്കുന്നു.ഓടുന്ന ബൈക്കില്‍ നിന്ന് താഴെ വീണിരുന്നെങ്കില്‍ ഗുരുതരമായി പരിക്കേല്‍ക്കാൻ സാധ്യതയുണ്ടായിരുന്നുവെന്നും യാത്രക്കാരൻ പറഞ്ഞു.
ഏറെക്കാലമായി ബെംഗളൂരുവില്‍ താമസിക്കുന്ന തനിക്ക് ഇത്തരമൊരു അനുഭവം മുമ്പ് ഉണ്ടായിട്ടില്ലെന്നും സംഭവത്തില്‍ ഞെട്ടലുണ്ടായെന്നും അദ്ദേഹം വ്യക്തമാക്കി. ബൈക്ക് ടാക്സികള്‍ക്കെതിരെ ഓട്ടോ ഡ്രൈവർമാർക്ക് എതിർപ്പുകളുണ്ടാകാമെങ്കിലും യാത്രക്കാരനെ ശാരീരികമായി ഉപദ്രവിക്കാൻ ശ്രമിക്കുന്നത് അംഗീകരിക്കാനാകില്ലെന്നും പോസ്റ്റില്‍ ചൂണ്ടിക്കാട്ടി. സംഭവത്തില്‍ പൊലീസിനെ സമീപിക്കണോ അതോ റാപ്പിഡോയ്ക്ക് പരാതി നല്‍കണോ എന്ന കാര്യത്തിലും യാത്രക്കാരൻ മറ്റ് ഉപയോക്താക്കളോട് അഭിപ്രായം തേടി.സംഭവം ചർച്ചയായതോടെ പൊലീസില്‍ പരാതി നല്‍കണമെന്ന നിർദേശവുമായി നിരവധി പേർ രംഗത്തെത്തി. ഓട്ടോയുടെ രജിസ്ട്രേഷൻ നമ്പർ ലഭ്യമാണെങ്കില്‍ അത് പൊലീസിന് കൈമാറണമെന്നും സമീപത്തെ സിസിടിവി ദൃശ്യങ്ങള്‍ അന്വേഷണത്തിന് സഹായകമായേക്കാമെന്നും ചിലർ അഭിപ്രായപ്പെട്ടു. എന്നാല്‍, സംഭവത്തെക്കുറിച്ച്‌ ഔദ്യോഗിക സ്ഥിരീകരണമോ പൊലീസ് നടപടിയെക്കുറിച്ചുള്ള വിവരങ്ങളോ റിപ്പോർട്ടില്‍ വ്യക്തമാക്കിയിട്ടില്ല.
