ഓണ്‍ലൈൻ ചൂതാട്ടത്തിന് അടിമ; അസി. മാനേജര്‍ ബാങ്ക് ലോക്കറില്‍ നിന്ന് അടിച്ചു മാറ്റിയത് 4 കോടിയുടെ സ്വര്‍ണം

ബംഗളൂരു: ഉപഭോക്താക്കളുടെ ലോക്കറുകളില്‍ നിന്ന് ഏകദേശം 2.7 കിലോഗ്രാം സ്വർണ്ണം മോഷ്ടിച്ച്‌ ഓണ്‍ലൈൻ വാതുവെപ്പിനും ചൂതാട്ടത്തിനും ഉപയോഗിച്ച കേസില്‍ ഒരു ദേശീയ ബാങ്കിന്റെ ഗിരിനഗർ ശാഖയിലെ അസിസ്റ്റന്റ് മാനേജർ കിരണ്‍ കുമാർ അറസ്റ്റില്‍.ശാഖാ മാനേജരുടെ അഭാവത്തില്‍ ലോക്കർ താക്കോലുകള്‍ സൂക്ഷിച്ചിരുന്നത് കിരണ്‍ കുമാറാണ്. ഇയാള്‍ ലോക്കറില്‍ നിന്ന് ചെറിയ അളവില്‍ സ്വർണ്ണം ഘട്ടം ഘട്ടമായി മാറ്റുകയായിരുന്നു. ജനുവരി 2-ന് ഉപഭോക്താക്കള്‍ പണയം വെച്ച സ്വർണ്ണാഭരണങ്ങള്‍ തിരിച്ചെടുക്കാൻ എത്തിയപ്പോഴാണ് തട്ടിപ്പ് പുറത്തുവന്നത്. 34 വയസ്സുള്ളയാളാണ് കിരണ്‍ കുമാർ.ലോക്കറുകള്‍ പരിശോധിച്ചതില്‍ 24 പാക്കറ്റുകളില്‍ ക്രമക്കേടുകള്‍ കണ്ടെത്തുകയായിരുന്നു. 21 പാക്കറ്റുകളില്‍ നിന്ന് ഭാഗികമായും മൂന്നെണ്ണത്തില്‍ നിന്ന് പൂർണ്ണമായും സ്വർണ്ണം കാണാതായി. പ്രാഥമിക അന്വേഷണത്തില്‍ ഏകദേശം 4 കോടി രൂപ വിലമതിക്കുന്ന 2,783 ഗ്രാം സ്വർണ്ണമാണ് മോഷ്ടിക്കപ്പെട്ടതെന്ന് കണ്ടെത്തി. ബാങ്ക് നടത്തിയ ആഭ്യന്തര അന്വേഷണത്തിനിടെ കിരണ്‍ കുമാർ സ്വർണ്ണാഭരണങ്ങള്‍ മോഷ്ടിച്ചതായി സമ്മതിച്ചു.മോഷ്ടിച്ച സ്വർണ്ണത്തിന്റെ ഒരു ഭാഗം വിവിധ കടകളിലും സ്വകാര്യ ധനകാര്യ സ്ഥാപനങ്ങളിലും പണയം വെച്ചതായും ഇതിന്റെ ഭൂരിഭാഗവും ഓണ്‍ലൈൻ ചൂതാട്ടത്തിനായി ഉപയോഗിച്ചതായും പോലീസ് പറഞ്ഞു. “ലോക്കർ താക്കോലുകള്‍ ഉപയോഗിക്കാനുള്ള അനുവാദം ശാഖാ മാനേജർക്കും കിരണ്‍ കുമാറിനും മാത്രമായിരുന്നു. സംശയം തോന്നാതിരിക്കാൻ പല സമയങ്ങളിലായി ചെറിയ അളവിലാണ് മോഷ്ടിച്ചതെന്ന് ചോദ്യം ചെയ്യലില്‍ കിരണ്‍ കുമാർ സമ്മതിച്ചു,” ബെംഗളൂരു സൗത്ത് ഡെപ്യൂട്ടി കമ്മീഷണർ ലോകേഷ് ജഗലാസർ പറഞ്ഞു.അതെസമയം മോഷ്ടിക്കപ്പെട്ട സ്വർണം പൂർണമായി വീണ്ടെടുക്കാനായിട്ടില്ല. ഇതുവരെ ഏകദേശം 1.2 കിലോഗ്രാം സ്വർണ്ണം പോലീസ് കണ്ടെടുത്തു. പ്രതിയെ കസ്റ്റഡിയിലെടുത്തിട്ടുണ്ട്. “ചില ധനകാര്യ സ്ഥാപനങ്ങള്‍ സ്വർണം വീണ്ടെടുക്കുന്നതിന് പൂർണ്ണമായി സഹകരിക്കുന്നില്ല. ബാക്കിയുള്ള സ്വർണ്ണം വീണ്ടെടുക്കുന്നതിന് ആവശ്യമായ നിർദ്ദേശങ്ങള്‍ ലഭിക്കാൻ ഞങ്ങള്‍ കോടതിയെ സമീപിക്കും,” ജഗലാസർ കൂട്ടിച്ചേർത്തു. ബാങ്ക് ഉപഭോക്താക്കള്‍ ജാഗ്രത പാലിക്കണമെന്നും അദ്ദേഹം ഉപദേശിച്ചു. “സ്വർണ്ണം പണയം വെക്കുന്ന ഉപഭോക്താക്കള്‍ അവരുടെ ലോക്കർ രേഖകള്‍ പതിവായി പരിശോധിക്കുകയും സ്വർണ്ണവായ്പാ ഇടപാടുകളില്‍ സുതാര്യത ഉറപ്പാക്കുകയും വേണം. ഇത് ആഭ്യന്തര തട്ടിപ്പുകള്‍ക്കെതിരായ ഏറ്റവും നല്ല സുരക്ഷയാണ്,” അദ്ദേഹം പറഞ്ഞു. ഗിരിനഗർ പോലീസ് സ്റ്റേഷനില്‍ കേസ് രജിസ്റ്റർ ചെയ്തിട്ടുണ്ട്, കൂടുതല്‍ അന്വേഷണം പുരോഗമിക്കുകയാണ്.