കാസര്കോട്: കാസര്കോട് പെരുമ്പള ബേനൂരിലെ അഞ്ജുശ്രീ പാര്വതിയുടെ മരണം ആത്മഹത്യയെന്ന് സ്ഥിരീകരിച്ച് പൊലീസ്. അഞ്ജുശ്രീയുടെ മരണം എലിവിഷം അകത്ത് ചെന്നാണെന്ന രാസ പരിശോധനാ ഫലം ലഭിച്ചു. അന്തിമ പോസ്റ്റ്മോർട്ടം റിപ്പോർട്ടിലും ഇത് സ്ഥിരീകരിച്ചു. പെണ്കുട്ടി ആത്മഹത്യ ചെയ്തതാണെന്ന് കാസര്കോട് ജില്ലാ പൊലീസ് മേധാവി വൈഭവ് സക്സേന പറഞ്ഞു.
ജനുവരി ഏഴിനാണ് 19 കാരിയായ അഞ്ജുശ്രീ മരിച്ചത്. കോഴിക്കോട് ഫോറന്സിക് ലാബില് നടത്തിയ പരിശോധനയിലാണ് എലിവിഷം അകത്ത് ചെന്നാണ് മരണമെന്ന് സ്ഥിരീകരിച്ചത്. ഇത് സംബന്ധിച്ച റിപ്പോര്ട്ട് അന്വേഷണ സംഘത്തിന് ലഭിച്ചു. പരിയാരം മെഡിക്കല് കോളേജില് നിന്നുള്ള അന്തിമ പോസ്റ്റ്മോര്ട്ടം റിപ്പോര്ട്ടിലും ഇത് സ്ഥിരീകരിക്കുന്നു. അഞ്ജുശ്രീയുടെ മരണം ആത്മഹത്യയാണെന്ന് കാസര്കോട് ജില്ലാ പൊലിസ് മേധാവി വൈഭവ് സക്സേന പറഞ്ഞു. വീട്ടില് നടത്തിയ പരിശോധനയില് ആത്മഹത്യാ കുറിപ്പ് പൊലീസ് കണ്ടെത്തിയിരുന്നു.
കാസര്കോട്ടെ ഹോട്ടലില് നിന്ന് ഭക്ഷണം കഴിച്ചതിനെ തുടര്ന്നാണ് മരണമെന്ന് ചൂണ്ടിക്കാട്ടി പെണ്കുട്ടിയുടെ ബന്ധുക്കള് മേല്പ്പറമ്പ് പൊലീസില് പരാതി നല്കിയിരുന്നു. തുടര്ന്ന് നടത്തിയ അന്വേഷണത്തില് മരണം ഭക്ഷ്യ വിഷബാധമൂലമല്ലെന്ന് സ്ഥിരീകരിച്ചിരുന്നു. പ്രാഥമിക പോസ്റ്റ്മോര്ട്ടം റിപ്പോര്ട്ടില് വിഷബാധയേറ്റാണ് മരണമെന്ന് കണ്ടെത്തി. ഏത് തരം വിഷം ഉള്ളില് ചെന്നാണ് മരിച്ചതെന്ന് അറിയാനായാണ് അന്വേഷണ സംഘം പെണ്കുട്ടിയുടെ ആന്തരിക അവയവങ്ങള് രാസപരിശോധനയ്ക്ക് അയച്ചത്.
മദ്രാസ് ഐഐടിയില് ഒരു വിദ്യാര്ത്ഥി കൂടി ജീവനൊടുക്കി
ചെന്നൈ: മദ്രാസ് ഐഐടിയില് ഒരു വിദ്യാര്ത്ഥി കൂടി ജീവനൊടുക്കി. മഹാരാഷ്ട്ര സ്വദേശിയായ ശ്രീവന് സണ്ണിയാണ് ആത്മഹത്യ ചെയ്തത്. ഇന്നലെ രാത്രിയാണ് ശ്രീവന് സണ്ണിയുടെ മൃതദേഹം കണ്ടെത്തിയത്. ഐഐടിയില് രണ്ടാം വര്ഷ വിദ്യാര്ത്ഥിയാണ് ശ്രീവന്.
വിഷാദം മൂലമാണ് വിദ്യാര്ത്ഥി ആത്മഹത്യ ചെയ്തതെന്നാണ് കോട്ടൂര്പുരം പൊലീസ് പറയുന്നത്. കര്ണാടക സ്വദേശിയായ മറ്റൊരു വിദ്യാര്ത്ഥിയും ഇന്നലെ ക്യാമ്ബസില് ആത്മഹത്യയ്ക്ക് ശ്രമിച്ചിരുന്നതായി റിപ്പോര്ട്ടുണ്ട്.
ഐഐടി അഡ്മിനിസ്ട്രേഷന് അധികൃതരുടെ നടപടികളില് പ്രതിഷേധിച്ച് വിദ്യാര്ത്ഥികള് രാത്രി മെഴുകുതിരി കത്തിച്ച് പ്രതിഷേധിച്ചു. എന്നാല് അഡ്മിനിസ്ട്രേഷന് അധികൃതരുടെ ഭാഗത്തുനിന്നുള്ള വീഴ്ചയാണ് ആത്മഹത്യയ്ക്ക് കാരണമെന്നാണ് വിദ്യാര്ത്ഥികള് ആരോപിക്കുന്നത്.
