പാലക്കാട്: സിനിമാ ചിത്രീകരണത്തിനിടെ നടൻ ബിബിൻ ജോര്‍ജിന് പരിക്ക്. ഗുമസ്തൻ സിനിമയുടെ ഷൂട്ടിങ്ങിനിടയിലാണ് അപകടം സംഭവിച്ചത്. ബിബിൻ ജോര്‍ജിന്റെ ആക്ഷൻരംഗങ്ങള്‍ ചിത്രീകരിക്കുന്നതിനിടയില്‍ നിയന്ത്രണം വിട്ട ബൈക്ക് മറിയുകയായിരുന്നു. അപകട സമയത്ത് താരത്തിനൊപ്പമുണ്ടായിരുന്ന ജൂനിയര്‍ ആര്‍ട്ടിസ്റ്റിന് സാരമായി പരിക്കേറ്റു. ഇയാളെ ഉടൻ തന്നെ സമീപത്തെ ആശുപത്രിയില്‍ പ്രവേശിപ്പിച്ചു.
ബിബിൻ ജോര്‍ജിന്റെ പരിക്ക് സാരമുള്ളതല്ലെന്ന് അണിയറ പ്രവര്‍ത്തകര്‍ അറിയിച്ചു. തുടര്‍ന്ന് സിനിമയുടെ ചിത്രീകരണം ഇന്നത്തേയ്‌ക്ക് നിര്‍ത്തിവച്ചു. ബിബിൻ നായകനാകുന്ന ഗുമസ്തനില്‍ ദിലീഷ് പോത്തനും ശ്രദ്ധേയമായ ഒരു കഥാപാത്രത്തെ അവതരിപ്പിക്കുന്നുണ്ട്. ജെയ്സ് ജോസ്, സ്മിനു സിജോ, റോണി ഡേവിഡ് രാജ്,അസീസ് നെടുമങ്ങാട്, മക്ബുല്‍ സല്‍മാൻ കൈലാഷ്, എന്നിവരാണ് മറ്റ് താരങ്ങള്‍. പാലക്കാടും പരിസര പ്രദേശങ്ങളിലുമായാണ് സിനിമയുടെ ചിത്രീകരണം നടക്കുന്നത്.
