ബംഗളൂരു: സംസ്ഥാനത്തെ റവന്യൂ വരുമാനം വർദ്ധിപ്പിക്കുന്നതിൻ്റെ ഭാഗമായി ഉപയോഗിക്കാതെ കിടക്കുന്ന മദ്യ ലൈസൻസുകൾ ലേലം ചെയ്യാൻ കർണാടക സർക്കാർ. ഈ നടപടിയിലൂടെ ഏകദേശം 1000 കോടി രൂപയുടെ അധിക വരുമാനമാണ് സർക്കാർ ലക്ഷ്യമിടുന്നത്.മുഖ്യമന്ത്രി സിദ്ധരാമയ്യയുടെ നേതൃത്വത്തിൽ ചേർന്ന ഉന്നതതല യോഗത്തിലാണ് ഈ തീരുമാനം. സംസ്ഥാനത്ത് നിലവിൽ അനുവദിച്ചിട്ടുള്ളതും എന്നാൽ വിവിധ കാരണങ്ങളാൽ പ്രവർത്തനക്ഷമമല്ലാത്തതുമായ ലൈസൻസുകളാണ് ലേലത്തിന് വയ്ക്കുക.
നിലവിലുള്ള നിയമങ്ങൾക്കനുസൃതമായി സുതാര്യമായ ലേല നടപടികളിലൂടെ പുതിയ സംരംഭകർക്ക് ഈ ലൈസൻസുകൾ സ്വന്തമാക്കാം. മദ്യവില്പന രംഗത്തെ കുത്തക ഒഴിവാക്കാനും സർക്കാരിന് ലഭിക്കേണ്ട കൃത്യമായ നികുതി ഉറപ്പാക്കാനുമാണ് ഈ നീക്കം.മദ്യ വിതരണ ശൃംഖലയിൽ കൂടുതൽ സുതാര്യത കൊണ്ടുവരുന്നതിനൊപ്പം ഖജനാവിലേക്കുള്ള വരുമാനം ഉയർത്തുന്നതിനും ഈ തീരുമാനം സഹായിക്കുമെന്ന് എക്സൈസ് വകുപ്പ് അധികൃതർ വ്യക്തമാക്കി. ലേല നടപടികൾ സംബന്ധിച്ച കൂടുതൽ മാർഗ്ഗനിർദ്ദേശങ്ങൾ ഉടൻ പുറത്തിറക്കും.വികസന പദ്ധതികൾക്കും ക്ഷേമപ്രവർത്തനങ്ങൾക്കും കൂടുതൽ ഫണ്ട് കണ്ടെത്തുന്നതിനായുള്ള സർക്കാരിന്റെ നയപരമായ മാറ്റമായാണ് ഇത് വിലയിരുത്തപ്പെടുന്നത്.
