ബെംഗളൂരു: ബെംഗളൂരുവിലെ പരപ്പന അഗ്രഹാര സെൻട്രല് ജയിലിനുള്ളിലെ നിയമവിരുദ്ധ പ്രവർത്തനങ്ങള്ക്കെതിരെ നടത്തിയ വലിയ നടപടിയെത്തുടർന്ന് തടവുകാർ മൂന്ന് ദിവസത്തെ നിരാഹാര സമരം ആരംഭിച്ചു, തടവുകാർ മൊബൈല് ഫോണ് ഉപയോഗിക്കുന്നതും മദ്യം കഴിക്കുന്നതും പാർട്ടിയില് പങ്കെടുക്കുന്നതും കാണിക്കുന്ന നിരവധി വീഡിയോകള് വൈറലായതിന് പിന്നാലെയാണ് നടപടി എടുത്തത്.നിയമവിരുദ്ധമായ പ്രവർത്തനങ്ങള് ശ്രദ്ധയില്പ്പെട്ടതിനെത്തുടർന്ന് ജയിലില് നിരീക്ഷണം ശക്തമാക്കിയിരുന്നു.എന്നാല് ഇത് തടവുകാരുടെ പ്രതിഷേധത്തിന് കാരണമായി. തടവുകാർ മൊബൈല് ഫോണ് ഉപയോഗിക്കുന്നതും മദ്യം കഴിക്കുന്നതും സിഗരറ്റ് വലിക്കുന്നതും ജയിലിനുള്ളില് പാർട്ടി നടത്തുന്നതിന്റെയുമൊക്കെ വീഡിയോ ദൃശ്യങ്ങളാണ് പുറത്ത് വന്നത്. വിവാദത്തിന് പിന്നാലെ നിരവധി ജയില് ജീവനക്കാരെ സ്ഥലം മാറ്റുകയും സസ്പെൻഡ് ചെയ്യുകയും ചെയ്തിരുന്നു.
ജയിലിനുള്ളില് ഇത്തരത്തിലുള്ള പ്രവർത്തനങ്ങള് തടയാൻ കർശന നടപടിയെടുക്കുമെന്ന് സംസ്ഥാന സർക്കാർ ഉറപ്പ് നല്കുകയും ചെയ്തിരുന്നു. ജയിലിനുള്ളിലേക്ക് മദ്യത്തിന്റെയും സിഗരറ്റിന്റെയുമൊക്കെ ഒഴുക്ക് തടയാൻ നിരീക്ഷണം ശക്തമാക്കുകയും ചെയ്തു. ഇതാണ് തടവുകാരില് അസ്വസ്ഥതയുണ്ടാക്കിയത്.ഇതോടെ തടവുകാർ മൂന്ന് ദിവസത്തെ നിരാഹാരം ആരംഭിച്ചു. ഭക്ഷണം നിഷേധിച്ചാല് ശക്തമായ നടപടിയെടുക്കുമെന്ന് ജയില് അധികൃതർ താക്കീത് നല്കിയതോടെയാണ് പ്രതിഷേധം അവസാനിപ്പിച്ചത്. ‘അടുത്തിടെ ജയിലിനുള്ളില് നടത്തിയ പരിശോധനയില് ഏകദേശം 50 മൊബൈല് ഫോണുകള് പിടിച്ചെടുത്തിരുന്നു. ഇത്തരം വസ്തുക്കള് ജയിലിനുള്ളില് എത്തുന്നത് തടയാനുള്ള നടപടികള് സ്വീകരിച്ചു. നിരീക്ഷണവും കർശനമാക്കി. ബീഡിയും സിഗരറ്റും വീണ്ടും അനുവദിക്കണമെന്ന് തടവുകാർ ആവശ്യപ്പെട്ടിരുന്നു.തയ്യാറാകാതിരുന്നതോടെ ഒരു കൂട്ടം തടവുകാർ അഡ്മിനിസ്ട്രേറ്റീവ് ബ്ലോക്കിന് മുന്നില് കുത്തിയിരിപ്പ് സമരം നടത്തുകയും ചെയ്തു. ശക്തമായ നടപടി ഉണ്ടാകുമെന്ന് തടവുകാർക്ക് മനസിലായതോടെ പ്രതിഷേധം അവസാനിപ്പിച്ചു. മുഴുവൻ സമയവും പൊലീസിനെ സജ്ജരാക്കി നിർത്തി. ആരൊക്കെയാണ് ഇത്തരം പ്രതിഷേധങ്ങള്ക്ക് നേതൃത്വം കൊടുക്കുന്നത് കണ്ടെത്തിയിട്ടുണ്ട്. അവർക്ക് കർശനമായ മുന്നറിയിപ്പുകള് നല്കി’- ജയില് അധികൃതർ അറിയിച്ചു.”ഒരു തരത്തിലുള്ള നിയമവിരുദ്ധ പ്രവർത്തനവും അനുവദിക്കില്ല. ഒരു സാഹചര്യത്തിലും നിരോധിത വസ്തുക്കളോ നിരോധിത വസ്തുക്കളോ ജയിലിനുള്ളില് അനുവദിക്കില്ല. ജീവനക്കാരെയും സന്ദർശകരെയും പരിശോധിക്കുന്നത് കർശനമാക്കിയിട്ടുണ്ട്, കൂടാതെ പരിസരത്ത് പ്രവേശിക്കുന്നതെല്ലാം സൂക്ഷ്മമായി പരിശോധിക്കാൻ കർണാടക സംസ്ഥാന വ്യാവസായിക സുരക്ഷാ സേനാംഗങ്ങള്ക്ക് നിർദ്ദേശം നല്കിയിട്ടുണ്ട്” ജയില് അധികൃതർ കൂട്ടിച്ചേർത്തു.
