വിട്‌ള ബൊലന്തൂരിലെ ബീഡി വ്യവസായി സുലൈമാന്റെ വീട്ടില്‍ നടന്ന വ്യാജ ഇ.ഡി റെയ്ഡുമായി ബന്ധപ്പെട്ട് ഒരാളെക്കൂടി ഞായറാഴ്ച അറസ്റ്റ് ചെയ്തു.കണ്ണൂർ സ്വദേശി സി.കെ. അബ്ദുല്‍ നാസിറിനെയാണ് (52) അറസ്റ്റ് ചെയ്തത്. ഇതോടെ അറസ്റ്റിലായവരുടെ എണ്ണം എട്ടായി. പ്രാദേശിക പ്രതിയായ സിറാജുദ്ദീനും മുഖ്യഗൂഢാലോചനക്കാരനായ മുൻ കേരള എ.എസ്.ഐ ഷഫീർ ബാബുവിനും (48) തമ്മിലുള്ള കണ്ണിയായി നാസിർ പ്രവർത്തിച്ചു എന്ന് പൊലീസ് കണ്ടെത്തി.
സുലൈമാന്റെ ബീഡി കമ്ബനിയില്‍ ജോലി ചെയ്തിരുന്ന സിറാജുദ്ദീൻ തർക്കത്തെത്തുടർന്ന് ജോലി ഉപേക്ഷിച്ച്‌ നസീറിന്റെ സഹായത്തോടെ റെയ്ഡ് സംഘടിപ്പിച്ച്‌ പ്രതികാരം ചെയ്യാൻ ശ്രമിച്ചു. ഇ.ഡി. ഉദ്യോഗസ്ഥരായി വേഷംമാറി സംഘം കോടി രൂപ കൊള്ളയടിക്കുകയും ബിസിനസുകാരനെ വീട്ടില്‍ ഒരു ചാക്കില്‍ ഒളിപ്പിച്ച മൂന്നു കോടി രൂപ കൂടി നല്‍കാൻ നിർബന്ധിക്കുകയും ചെയ്തു.
ജനുവരി മൂന്നിന് രാത്രിയാണ് റെയ്ഡ് നടന്നത്. തൃശൂർ കൊടുങ്ങല്ലൂർ പൊലീസ് സ്റ്റേഷനിലെ മുൻ എ.എസ്.ഐ ഷഫീർ ബാബു (48), പാർലിയയിലെ ഇഖ്ബാല്‍ (38), കെ.എസ്.ഇ കോള്‍നാട് സ്വദേശി സിറാജുദ്ദീൻ നർഷ് (37); മംഗളൂരു പടിലില്‍ അൻസാർ (27); കോട്ടയം സ്വദേശികളായ അനില്‍ ഫെർണാണ്ടസ് (49), സച്ചിൻ ടി.എസ് (29), ഷാബിൻ എസ്. (27) എന്നിവരാണ് നേരത്തേ അറസ്റ്റിലായത്. അന്വേഷണം തുടരുകയാണ്.
റെയില്‍ പാളത്തില്‍ ടെലിഫോണ്‍ പോസ്റ്റ്; അട്ടിമറി ശ്രമമെന്ന് പൊലീസ്
കൊല്ലം-ചെങ്കോട്ട റെയില്‍വേ പാതയില്‍ കുണ്ടറ നെടുമ്ബായക്കുളം ഭാഗത്ത് റെയില്‍വേ പാളത്തില്‍ ടെലിഫോണ്‍ പോസ്റ്റ് വെച്ച സംഭവത്തില്‍ അട്ടിമറി ശ്രമത്തിന് കുണ്ടറ പൊലീസ് കേസെടുത്തു.സംഭവദിവസം രാത്രിയില്‍ റെയില്‍വേ പൊലീസിനെ വിവരമറിയിച്ച പള്ളിമുക്ക് ലെവല്‍ ക്രോസിലെ ഗേറ്റ് കീപ്പർ അനന്ദിന്‍റെ മൊഴിയുടെ അടിസ്ഥാനത്തിലാണ് റെയില്‍വേ ആക്‌ട് -1989ലെ 150 (1) (എ) 153 പ്രകാരം എഫ്.ഐ.ആർ രജിസ്റ്റർ ചെയ്തത്. സംഭവത്തിന് 24 മണിക്കൂർ തികയുംമുമ്ബ് തന്നെ പ്രതികളായ ഇളമ്ബള്ളൂർ സ്വദേശി അരുണ്‍, പെരുമ്ബുഴ സ്വദേശി രാജേഷ് എന്നിവരെ കുണ്ടറ പൊലീസ് അറസ്റ്റ് ചെയ്തിരുന്നു.
പ്രതികളെ എൻ.ഐ.എ ഉദ്യോഗസ്ഥരും മധുരയില്‍നിന്നെത്തിയ ഉന്നത റെയില്‍വേ ഉദ്യോഗസ്ഥരും ശനിയാഴ്ച രാത്രി തന്നെ ചോദ്യം ചെയ്തു. ഞായറാഴ്ച പുലർച്ചയോടെയാണ് അറസ്റ്റ് രേഖപ്പെടുത്തിയത്.ടെലിഫോണ്‍ പോസ്റ്റിന്‍റെ ചുവട് ഭാഗത്തുള്ള കാസ്റ്റ് അയണ്‍ പൊട്ടിച്ചെടുക്കാൻ വേണ്ടിയാണ് പാളത്തിന് കുറുകെ പോസ്റ്റ് വെച്ചതെന്നാണ് പ്രതികള്‍ ചോദ്യംചെയ്യലില്‍ പറഞ്ഞത്. എന്നാല്‍, അപകടസാധ്യത അറിയാമായിരുന്നിട്ടും രണ്ടാംതവണയും പോസ്റ്റ് എടുത്തുവെച്ചത് ഗൗരവത്തിലെടുത്താണ് അട്ടിമറി ശ്രമത്തിനുള്ള വകുപ്പുകള്‍ ചുമത്തി പൊലീസ് കേസെടുത്തത്. ഫോറൻസിക്, ഡോഗ് സ്കോഡ് വിഭാഗവും സ്ഥലത്തെത്തി തെളിവുകള്‍ ശേഖരിച്ചു. പ്രതികളെ കോടതിയില്‍ ഹാജരാക്കി റിമാൻഡ് ചെയ്തു.
