ബെംഗളൂരു: ഇന്ത്യയിലെ തിരക്കേറിയ മൂന്നാമത്തെ അന്താരാഷ്ട്ര വിമാനത്താവളമായി ബെംഗളൂരുവിലെ കെംപഗൗഡ ഇൻ്റർനാഷണൽ വിമാനത്താവളം (കെഐഎ). കൊച്ചി നെടുമ്പാശേരി അന്താരാഷ്ട്ര വിമാനത്താവളത്തിനെയും ചെന്നൈ അന്താരാഷ്ട്ര വിമാനത്താവളത്തെയും പിന്നിലാക്കിയാണ് ആഭ്യന്തര യാത്രക്കാരുടെ എണ്ണത്തിൽ 2024 ഒക്ടോബറിൽ കെഐഎ മൂന്നാമത് എത്തിയത്. ആഭ്യന്തര സഞ്ചാരികളുടെ എണ്ണത്തിൽ ഡൽഹിക്കും മുംബൈയ്ക്കും പിന്നാലെ ബെംഗളൂരു വിമാനത്താവളവും മൂന്നാം സ്ഥാനത്തെത്തി.
ചെന്നൈ, കൊച്ചി വിമാനത്താവളങ്ങളെ മറികടന്ന് കഴിഞ്ഞ ഒക്ടോബറിൽ 4.8 ലക്ഷം അന്താരാഷ്ട്ര യാത്രക്കാരാണ് ബെംഗളൂരു അന്താരാഷ്ട്ര വിമാനത്താവളത്തിലൂടെ യാത്ര ചെയ്തത്. എയർപോർട്ട് അതോറിറ്റി ഓഫ് ഇന്ത്യയുടെ (എഎഐ) കണക്കുകൾ പ്രകാരം ഒക്ടോബറിൽ കെഐഎ 4.8 ലക്ഷം അന്താരാഷ്ട്ര യാത്രക്കാരാണ് ബെംഗളൂരു വിമാനത്താവളം ഉപയോഗിച്ചത്. ദക്ഷിണേന്ത്യയിലെ മറ്റൊരു വലിയ വിമാനത്താവളമായ ചെന്നൈ വിമാനത്താവളത്തിലൂടെ 4.5 ലക്ഷം യാത്രക്കാരും കൊച്ചി വിമാനത്താവളത്തിലൂടെ 4.1 ലക്ഷം ആഭ്യന്തര യാത്രക്കാരും സഞ്ചരിച്ചു.
ആഭ്യന്തര യാത്രക്കാരുടെ എണ്ണത്തിൽ 17.5 ലക്ഷം യാത്രക്കാരെ സ്വന്തമാക്കിയ രാജ്യ തലസ്ഥാനത്തെ ഡൽഹി ഇന്ദിരാഗാന്ധി അന്താരാഷ്ട്ര വിമാനത്താവളമാണ് മുന്നിൽ. 12.5 ലക്ഷം യാത്രക്കാരുമായി മുംബൈ വിമാനത്താവളം രണ്ടാം സ്ഥാനം നിലനിർത്തി. 2024 ഒക്ടോബറിൽ ബെംഗളൂരു വിമാനത്താവളത്തിലൂടെ 30.8 ലക്ഷം ആഭ്യന്തര യാത്രക്കാർ കടന്നുപോയി. ഡൽഹി (46.8 ലക്ഷം), മുംബൈ (31.6 ലക്ഷം) വിമാനത്താവളങ്ങൾ തൊട്ടുപിന്നാലെയുണ്ട്.
2023 ഒക്ടോബറിനെ അപേക്ഷിച്ച് ബെംഗളൂരു വിമാനത്താവളം അന്താരാഷ്ട്ര യാത്രക്കാരുടെ എണ്ണത്തിൽ 24.3 ശതമാനത്തിൻ്റെ വളർച്ചയാണ് നേടിയത്. കഴിഞ്ഞ ഒക്ടോബറിൽ 3.9 ലക്ഷം അന്താരാഷ്ട്ര യാത്രക്കാർ മാത്രമാണ് ബെംഗളൂരു വിമാനത്താവളം ഉപയോഗിച്ചത്. എന്നാൽ 2004ൽ 4.39 ലക്ഷം അന്താരാഷ്ട്ര യാത്രക്കാരെ സ്വന്തമാക്കിയ ബെംഗളൂരു വിമാനത്താവളം പട്ടികയിൽ അഞ്ചാമതെത്തി. ഡൽഹി, മുംബൈ, ചെന്നൈ, കൊച്ചി വിമാനത്താവളങ്ങളെയാണ് പിന്നിലാക്കിയത്.
2023 സെപ്റ്റംബറിൽ ടെർമിനൽ 2ൽ പ്രവർത്തനം ആരംഭിച്ചതോടെ ബെംഗളൂരു വിമാനത്താവളത്തിൻ്റെ ശേഷി വർധിച്ചു. ഇതോടെയാണ് ബെംഗളൂരു കെംപഗൗഡ ഇൻ്റർനാഷണൽ വിമാനത്താവളത്തിലൂടെയുള്ള യാത്രക്കാരുടെ എണ്ണം അതിവേഗം കുതിച്ചുയർന്നത്. ബെംഗളൂരുവിൽ നിന്ന് വിവിധ വിമാന കമ്പനികൾ പുതിയ റൂട്ടുകൾ ആരംഭിക്കുന്നതും യാത്രക്കാരുടെ എണ്ണം വർധിക്കാൻ സഹായകരമാകുന്നുണ്ട്. 2026ൽ ബെംഗളൂരു മെട്രോ ബ്ലൂ ലൈൻ വിമാനത്താവളവുമായി ബന്ധപ്പെട്ട് പ്രവർത്തനം ആരംഭിക്കും. ഇതോടെ യാത്രക്കാരുടെ എണ്ണത്തിൽ വൻ കുതിച്ചുച്ചാട്ടമാണ് പ്രതീക്ഷിക്കുന്നത്
