ബെംഗളുരു: ബെംഗളുരുവിൽ സ്കൂൾ വിദ്യഭ്യാസം നേടാത്ത കുട്ടികളെ കണ്ടെത്താൻ പുതിയ നീക്കം നടത്തുകയാണ് ബൃഹത് ബെംഗളുരു മഹാനഗര പാലിക് (ബിബിഎംപി) വിദ്യഭ്യാസ വകുപ്പ്. ഇതിനായി നഗരത്തിൽ വ്യാപകമായി സര്‍വ്വേ നടത്താനാണ് നീക്കം. ഇ-ഗവേണൻസിൻ്റെ ഭാഗമായി വികസിപ്പിച്ച ആപ്പ് ഉപയോഗിച്ചാണ് നഗരത്തിലെ ഓരോ വാര്‍ഡിലെയും സര്‍വ്വേ പൂര്‍ത്തിയാക്കുക.
നഗരത്തിലെ വിവിധ ഭാഗങ്ങളായി റസിഡൻഷ്യൽ മേഖലകള്‍, വ്യവസായ ശാലകൾ, നിര്‍മ്മാണ പ്രവര്‍ത്തനങ്ങൾ നടക്കുന്ന സ്ഥലങ്ങൾ, ബസ് സ്റ്റേഷനുകള്‍, റെയിൽവേ സ്റ്റേഷനുകൾ, മതപരമായ കേന്ദ്രങ്ങള്‍, അനാഥാലയങ്ങള്‍, ജയിൽ, ആശുപത്രികള്‍, ഹോട്ടലുകള്‍, തിയേറ്ററുകള്‍, ചെറുകിട വ്യവസായ ശാലകള്‍ തുടങ്ങിയ സ്ഥലങ്ങളിലെല്ലാം സര്‍വ്വേയുടെ ഭാഗമായി വിവര ശേഖരണം നടത്തും. മുഖ്യ ധാരാ വിദ്യഭ്യാസം നേടാൻ കഴിയാതെ ഇരിക്കുന്ന കുട്ടികൾ ഈ മേഖലകളിൽ ജോലി ചെയ്യുന്നുണ്ടോ, താമസിക്കുന്നുണ്ടോ തുടങ്ങിയ വിവരങ്ങൾ കണ്ടെത്തുന്നതിനാണ് നീക്കം.
പ്രധാന സര്‍വ്വേ തുടങ്ങുന്നതിന് മുന്നോടിയായി ഗാന്ധി നഗര്‍ നിയമസഭാ മണ്ഡലത്തിലെ സുഭാഷ് നഗര്‍ വാര്‍ഡിലാണ് പൈലറ്റ് സര്‍വ്വേ നടത്തുക. 10,000 വീടുകളെയാണ് പൈലറ്റ് സര്‍വ്വേയിൽ ഉള്‍പ്പെടുത്തുക. ഇതിനായി ടെണ്ടറുകള്‍ ക്ഷണിച്ച് ബിബിഎംപി അധികൃതര്‍ നോട്ടിഫിക്കേഷൻ പുറത്തുവിട്ടിരുന്നു. സര്‍വ്വേ നടത്തുന്നതിനായി വിവിധ സംഘടനകൾ താൽപ്പര്യം പ്രകടിപ്പിച്ചിട്ടുള്ളതായാണ് സൂചന.
ഓരോ വാര്‍ഡിലെയും സ്കൂളിൽ പോകാത്ത കുട്ടികളുടെ എണ്ണം കണക്കാക്കാനായാൽ അവരെ സ്കൂളിലേക്ക് എത്തിക്കാനുള്ള പ്രവര്‍ത്തനങ്ങൾ നടത്താനാകുമെന്നാണ് ബിബിഎംപി അധികൃതരുടെ പ്രതീക്ഷ. 2019-ലെ ഹൈക്കോടതി നിര്‍ദ്ദേശമനുസരിച്ചാണ് ബിബിഎംപി അധികൃതര്‍ സര്‍വ്വേ നടപടിക്രമങ്ങൾ ആരംഭിക്കുന്നത്. നഗരത്തിലെ മുഴുവൻ കുട്ടികളും സ്കൂള്‍ വിദ്യഭ്യാസം നേടുന്നുണ്ടെന്ന് ഉറപ്പുവരുത്താൻ സര്‍വ്വേ നടത്തണമെന്നായിരുന്നു കോടതി ബിബിഎംപിയോട് നിര്‍ദ്ദേശിച്ചത്.
ഏകദേശം 30 ലക്ഷം കുടുംബങ്ങളിൽ നടത്താനാണ് ബൃഹത് ബെംഗളുരു മഹാനഗര പാലിക് (ബിബിഎംപി) ലക്ഷ്യമിടുന്നത്. ഇതിനായി ഏകദേശം 3 കോടി രൂപ ചെലവ് വരുമെന്നാണ് കരുതപ്പെടുന്നത്. അതായത് ഒരു കുടുംബത്തിന് 10 രൂപ നിരക്കിലാണ് ചെലവ് കണക്കാക്കിയിരിക്കുന്നത്. വ്യാപകമായി സര്‍വ്വേ നടത്തുന്ന സമയത്ത് നേരിടാവുന്ന പ്രതിസന്ധികളെ പരിഹരിക്കുന്നതിന് വേണ്ടിയാണ് ആദ്യം ഗാന്ധി നഗര്‍ മണ്ഡലത്തിൽ പൈലറ്റ് സര്‍വ്വേ നടത്തുന്നത്.
സര്‍വ്വേ നടത്തുന്ന സംഘടനക്ക് ഓരോ കുടുംബത്തിനും 10 രൂപ വീതമാണ് ലഭിക്കുക. സര്‍വ്വേ നടത്തുന്ന വ്യക്തികള്‍ക്ക് പത്താം ക്ലാസ് (SSLC) യോഗ്യത ഉണ്ടായിരിക്കണം. അത് മാത്രമല്ല, മിനിമം 30 അംഗങ്ങളുടെ സംഘമായിരിക്കണം സര്‍വ്വേ നടത്തുന്ന സംഘടന. ശേഖരിച്ച വിവരങ്ങള്‍ രഹസ്യ സ്വഭാവത്തോടെ കൈകാര്യം ചെയ്യേണ്ടതാണ്. അത് മാത്രമല്ല, സര്‍വ്വേ നടത്തുന്ന വ്യക്തികള്‍ സ്മാര്‍ട്ട് ഫോൺ മികച്ച രീതിയിൽ ഉപയോഗിക്കാൻ അറിവുള്ളവരായിക്കണമെന്നും ബിബിഎംപി വ്യക്തമാക്കിയിട്ടുണ്ട്.
