മുന്‍ ഇന്ത്യന്‍ ക്രിക്കറ്റ് താരം വീരേന്ദര്‍ സെവാഗും ഭാര്യ ആരതി അഹ്‌ലാവതും രണ്ട് പതിറ്റാണ്ടുകളുടെ ദാമ്പത്യത്തിന് ശേഷം വേര്‍പിരിയുന്നു. ഇരുവരും മാസങ്ങളായി വേര്‍പിരിഞ്ഞ് താമസിക്കുകയാണെന്നും വിവാഹമോചനം ഉണ്ടാവുമെന്നും ദി ഹിന്ദുസ്ഥാന്‍ ടൈംസ് വെളിപ്പെടുത്തി.2004 ല്‍ വിവാഹിതരായ ഇരുവരും സോഷ്യല്‍ മീഡിയയില്‍ പരസ്പരം അണ്‍ഫോളോ ചെയ്തതായാണ് കാണുന്നത്. ഇത് ഇരുവരുടെയും ബന്ധത്തെക്കുറിച്ചുള്ള അഭ്യൂഹങ്ങള്‍ക്ക് കാരണമായി. മാസങ്ങളായി വേര്‍പിരിഞ്ഞാണ് താമസിക്കുന്നതെന്ന് സ്രോതസ്സുകളെ ഉദ്ധരിച്ച് തയ്യാറാക്കിയ റിപോര്‍ട്ടില്‍ പറയുന്നു.ആക്രമണാത്മക ബാറ്റിങ് ശൈലി കൊണ്ട് ക്രിക്കറ്റ് ലോകത്ത വിസ്മയിപ്പിച്ച താരമാണ് വിരേന്ജര്‍ സെവാഗ്.
അക്കാലത്ത് ലോകത്തെ ബൗളര്‍മാരുടെയെല്ലാം പേടിസ്വപ്‌നമായി സെവാഗ് മാറിയിരുന്നു.സെവാഗിനും ആരതിക്കും രണ്ട് ആണ്‍മക്കളുണ്ട്. മൂത്ത മകന്‍ ആര്യവീര്‍ 2007ലും രണ്ടാമത്തെ മകന്‍ വേദാന്ത് 2010ലുമാണ് ജനിച്ചത്. ദീപാവലി ആഘോഷ വേളയില്‍ സെവാഗ് തന്റെ മക്കളോടും അമ്മയോടുമൊപ്പമുള്ള ചിത്രങ്ങള്‍ സോഷ്യല്‍ മീഡിയയില്‍ പങ്കുവച്ചിരുന്നു. എന്നാല്‍, ഇതില്‍ ആരതിയുടെ ഫോട്ടോകള്‍ ഒഴിവാക്കിയതും ഭാര്യയെ കുറിച്ച് പരാമര്‍ശിക്കാതിരുന്നതും ആരാധകര്‍ ശ്രദ്ധിച്ചിരുന്നു. ദാമ്പത്യബന്ധത്തെ കുറിച്ച് ഇരുവരും നിശബ്ദത പാലിച്ചത് വേര്‍പിരിയലിനെക്കുറിച്ചുള്ള അഭ്യൂഹങ്ങള്‍ക്ക് ആക്കം കൂട്ടി.
പരസ്പരം യോജിച്ച് പോകാനാവാത്തതിനാല്‍ സെവാഗിന്റെയും ആരതിയുടെയും ബന്ധം കുറച്ചുകാലമായി ഉലഞ്ഞിരുന്നു. വേര്‍പിരിഞ്ഞാണ് താമസമെന്നും സ്രോതസ്സുകള്‍ വ്യക്തമാക്കുന്നു. ഇത് വേര്‍പിരിയാനുള്ള തീരുമാനത്തിലേക്ക് നയിച്ചു.2004 ഏപ്രിലില്‍, അന്നത്തെ കേന്ദ്ര നിയമ മന്ത്രിയായിരുന്ന അന്തരിച്ച അരുണ്‍ ജെയ്റ്റ്ലി തന്റെ വസതിയില്‍ കനത്ത സുരക്ഷാ വലയത്തില്‍ സംഘടിപ്പിച്ച പരസ്യ ചടങ്ങിലായിരുന്നു സെവാഗ്-ആരതി വിവാഹം.
2002 ചാമ്പ്യന്‍സ് ട്രോഫി, 2007 ടി20 ലോകകപ്പ്, 2011 ഏകദിന ലോകകപ്പ് എന്നിവ നേടിയ ഇന്ത്യന്‍ ടീമില്‍ അംഗമായിരുന്നു സെവാഗ്. ലോകത്തെ മികച്ച ഓപണര്‍മാരില്‍ ഒരാളായും തന്റെ കാലഘട്ടത്തിലെ ഏറ്റവും മികച്ച ബാറ്റ്സ്മാന്‍മാരില്‍ ഒരാളായും കണക്കാക്കപ്പെടുന്നു. ഐപിഎല്ലില്‍ ഡല്‍ഹി ക്യാപിറ്റല്‍സിനും ആഭ്യന്തര ക്രിക്കറ്റില്‍ ഡല്‍ഹിക്കും ഹരിയാനയ്ക്കും വേണ്ടി കളിച്ചു.
ഇന്ത്യക്ക് വേണ്ടി 1999ല്‍ ഏകദിന അരങ്ങേറ്റം നടത്തിയ സെവാഗ് 2001ല്‍ ടെസ്റ്റ് ടീമിലും അംഗമായി. സ്ഥിരം ക്യാപ്റ്റന്റെ അഭാവത്തില്‍ സെവാഗ് സ്റ്റാന്‍ഡ്-ഇന്‍ ക്യാപ്റ്റനായി. ഇന്ത്യന്‍ ടീമിന്റെ വൈസ് ക്യാപ്റ്റനായിട്ടുണ്ട്. ഡല്‍ഹി ഡെയര്‍ഡെവിള്‍സിന്റെയും ഡല്‍ഹി രഞ്ജി ടീമിന്റെയും മുന്‍ ക്യാപ്റ്റനാണ്.
