ബെംഗ്ളുറു: ബെംഗ്ളുറു ആസ്ഥാനമായുള്ള പ്രൊഫഷണലായ നികിത അയ്യര്‍ താന്‍ സഞ്ചരിച്ച ഓടോറിക്ഷയുടെ ഡ്രൈവര്‍ മികച്ച ഇന്‍ഗ്ലീഷില്‍ സംസാരിക്കുന്നത് കേട്ടപ്പോള്‍, അവര്‍ ആദ്യം ഞെട്ടി.ജിജ്ഞാസയോടെ നികിത അദ്ദേഹത്തോട് എങ്ങനെയാണ് ഭാഷയില്‍ പ്രാവീണ്യം നേടിയതെന്ന് ചോദിച്ചു.
പിന്നീടുണ്ടായത് ‘വളരെ സമ്ബന്നമായ 45 മിനിറ്റ്’ ആയിരുന്നു, അതില്‍ 74 കാരനായ ഡ്രൈവര്‍ ഒരു ഇന്‍ഗ്ലീഷ് ലക്ചറര്‍ എന്ന നിലയിലുള്ള തന്റെ മുന്‍ ജീവിതത്തെക്കുറിച്ചും മറ്റും തുറന്നു പറഞ്ഞു. ഒരു ലിങ്ക്ഡ്‌ഇന്‍ പോസ്റ്റില്‍ നികിത തന്റെ ഈ അസാധാരണമായ കണ്ടുമുട്ടല്‍ രേഖപ്പെടുത്തിയ കുറിപ്പ് ഓണ്‍ലൈനില്‍ പോസ്റ്റിയതോടെ അത് വൈറലായി.
നികിത ഡ്രൈവറോട് എങ്ങനെയാണ് ‘ഇത്രയും നല്ല ഇന്‍ഗ്ലീഷ് സംസാരിക്കുന്നത്’ എന്ന് ചോദിച്ചപ്പോള്‍, താന്‍ മുംബൈ കോളജില്‍ ഇന്‍ഗ്ലീഷ് ലക്ചററായിരുന്നുവെന്നും എംഎയും എംഇഡും പഠിച്ചിട്ടുണ്ടെന്നും ആ മനുഷ്യന്‍ വെളിപ്പെടുത്തി. യുവതിയുടെ അടുത്ത ചോദ്യം പോലും അദ്ദേഹം പ്രവചിച്ചു: ‘അപ്പോള്‍ എന്തിനാണ് ഞാന്‍ ഓടോ റിക്ഷ ഓടിക്കുന്നത് എന്നാവും നിങ്ങള്‍ എന്നോട് ചോദിക്കാന്‍ പോകുന്നത്?’.
അനുകൂല പ്രതികരണം ലഭിച്ചതോടെ ഓടോ ഡ്രൈവര്‍ തന്റെ ജീവിതത്തെ കുറിച്ച്‌ തുറന്നു പറഞ്ഞു. തന്റെ പേര് പട്ടാബി രാമന്‍ എന്നാണെന്നും കോളജ് ലക്ചററായി വിരമിച്ച ശേഷം 14 വര്‍ഷമായി ഓടോറിക്ഷ ഓടിക്കുന്നുണ്ടെന്നും അദ്ദേഹം വെളിപ്പെടുത്തി. കര്‍ണാടകയില്‍ ജോലി ലഭിക്കാത്തതിനാലാണ് താന്‍ മുംബൈയില്‍ ലക്ചററായി ജോലി ചെയ്തതെന്ന് രാമന്‍ പറഞ്ഞു.
കര്‍ണാടകയിലെ കോളജുകളില്‍ ‘നിന്റെ ജാതി ഏതാണ്’ എന്ന ചോദ്യം മാത്രമായിരുന്നു അദ്ദേഹത്തോട് ചോദിച്ചത്. തന്റെ പേര് മിസ്റ്റര്‍ പട്ടാബി രാമന്‍ എന്ന് പറഞ്ഞപ്പോള്‍, ‘ഞങ്ങള്‍ നിങ്ങളെ അറിയിക്കാം’ എന്ന് അവര്‍ പറഞ്ഞു.കര്‍ണാടകയിലെ കോളജുകളില്‍ നിന്ന് ലഭിച്ച ഈ പ്രതികരണത്തില്‍ മടുത്ത രാമന്‍ മഹാരാഷ്ട്രയിലെ മുംബൈയിലേക്ക് താമസം മാറ്റി, അവിടെ ഒരു പ്രശസ്ത കോളജില്‍ ജോലി കണ്ടെത്തി.
20 വര്‍ഷം പവായിലെ ആ കോളജില്‍ ജോലി ചെയ്ത അദ്ദേഹം 60-ാം വയസില്‍ വിരമിച്ച്‌ ബെംഗ്ളൂറിലേക്ക് മടങ്ങി. ‘അധ്യാപകര്‍ക്ക് നല്ല ശമ്ബളം ലഭിക്കുന്നില്ല. പരമാവധി 10-15,000/- ആണ് സമ്ബാദിക്കാന്‍ കഴിയുന്നത്, അത് ഒരു സ്വകാര്യ സ്ഥാപനമായതിനാല്‍ എനിക്ക് പെന്‍ഷനില്ല. റിക്ഷ ഓടിച്ചാല്‍ എനിക്ക് ഒരു ദിവസം 700-1500/- എങ്കിലും ലഭിക്കും. എനിക്കും എന്റെ കാമുകിക്കും അത് മതി’, അയാള്‍ ചിരിച്ചുകൊണ്ട് പറഞ്ഞു.
‘കാമുകി’ എന്ന പരാമര്‍ശം കേട്ട് യാത്രക്കാരിയും ചിരിച്ചപ്പോള്‍, രാമന്‍ തന്റെ ഭാര്യയെ കാമുകി എന്ന് വിളിച്ചതായി വിശദീകരിച്ചു. ‘നിങ്ങള്‍ ഭാര്യ എന്ന് പറയുമ്ബോള്‍ തന്നെ ഭര്‍ത്താക്കന്മാര്‍ കരുതുന്നു അവള്‍ നിങ്ങളെ സേവിക്കേണ്ട ഒരു അടിമയാണെന്ന്, പക്ഷേ അവള്‍ ഒരു തരത്തിലും എന്നെക്കാള്‍ താഴ്ന്നതല്ല, വാസ്തവത്തില്‍ അവള്‍ ചിലപ്പോള്‍ എന്നെക്കാള്‍ ഉയര്‍ന്നതാണ്’, അദ്ദേഹം വിശദീകരിച്ചു.
തനിക്കും ഭാര്യക്കും വാടക നല്‍കാന്‍ സഹായിക്കുന്ന ഒരു മകനുണ്ടെന്നും അദ്ദേഹം വെളിപ്പെടുത്തി. എന്നാല്‍ അതിനപ്പുറം ഞങ്ങള്‍ ഞങ്ങളുടെ കുട്ടികളെ ആശ്രയിക്കുന്നില്ല, അവര്‍ അവരുടെ ജീവിതം നയിക്കുന്നു, ഞങ്ങള്‍ ഞങ്ങളുടേത് സന്തോഷത്തോടെ ജീവിക്കുന്നു’, അദ്ദേഹം പറഞ്ഞു.
