ഈറോഡ് : രാത്രിയാത്രാ നിരോധനമുള്ള സത്യമംഗലം-മൈസൂര്‍ റോഡില്‍ ഗതാഗതതടസ്സം രൂക്ഷമായി തുടരുന്നു.
രാവിലെ ആറുമണിമുതല്‍ വൈകീട്ട്‌ ആറുവരെമാത്രം ഇതുവഴി യാത്ര എന്നനിയമം വന്നതോടെ ഇവിടെ പ്രതിസന്ധി തുടരുകയാണ്. തിമ്ബം ഭാഗത്ത് കയറ്റിറക്കങ്ങളുള്ളിടത്ത് വാഹനങ്ങള്‍ക്ക് ഇഴഞ്ഞുനീങ്ങാന്‍ പോലും സാധിക്കാത്ത അവസ്ഥയാണ്.
രാത്രിയാത്രാ നിരോധനത്തിനെതിരേ നിരവധി സമരങ്ങള്‍ നടന്നിട്ടും അധികാരികളുടെ ഭാഗത്തുനിന്ന്‌ യാതൊരു നടപടിയും ഉണ്ടായിട്ടില്ല. ജോലി ഉള്‍പ്പെടെ പല കാര്യങ്ങള്‍ക്കും പോകുന്നവര്‍ക്ക് അതതുസ്ഥലങ്ങളില്‍ സമയത്തിന് എത്തിച്ചേരാന്‍ സാധിക്കുന്നില്ല. മൈസൂരു അടക്കമുള്ള സ്ഥലങ്ങളില്‍നിന്ന്‌ പച്ചക്കറിയും മറ്റുസാധനങ്ങളും കയറ്റിവരുന്ന ചരക്കുലോറികള്‍ക്ക് തമിഴ്‌നാട്ടിലെ വിവിധ മാര്‍ക്കറ്റുകളില്‍ സമയത്തിന് എത്തിക്കാന്‍ പറ്റാത്ത അവസ്ഥയും തുടരുന്നു.
