കർണാടകയിൽ ഇന്നലെ 8,425 പുതിയ കോവിഡ്-19 കേസുകളും 47 മരണങ്ങളുമാണ് റിപ്പോർട്ട് ചെയ്തത്. മൂന്നാം തരംഗം തുടങ്ങിയതിനുശേഷം ആദ്യമായാണ് പ്രതിദിന കോവിഡ് കേസുകൾ 10,000ൽ താഴെയെത്തുന്നത്. ടെസ്റ്റ് പോസിറ്റിവിറ്റി നിരക്കിലും കാര്യമായ കുറവ് രേഖപ്പെടുത്തി. കഴിഞ്ഞ 24 മണിക്കൂറിനുള്ളിൽ കർണാടകയിൽ പോസിറ്റീവിറ്റി നിരക്ക് 6.5 ശതമാനമാണെന്ന് സംസ്ഥാന ആരോഗ്യ കുടുംബക്ഷേമ വകുപ്പ് വ്യക്തമാക്കി.
ഞായറാഴ്ച വരെ സംസ്ഥാനത്ത് ആകെ സജീവമായ കേസുകളുടെ എണ്ണം 97,781 ആണ്. കഴിഞ്ഞ 24 മണിക്കൂറിനുള്ളിൽ 19,800 പേർ രോഗമുക്തി നേടി. ഇതുവരെ, കർണാടകയിൽ 1,115 ഒമിക്റോൺ വേരിയന്റുകൾ കണ്ടെത്തിയിട്ടുണ്ട്. കഴിഞ്ഞ രണ്ടാഴ്ചയ്ക്കിടെ പുതിയ കോവിഡ് -19 കേസുകൾ സംസ്ഥാനത്ത് കുറഞ്ഞു. ജനുവരി 23 ന് കർണാടകയിൽ 50,210 പുതിയ കോവിഡ് -19 കേസുകളും 19 മരണങ്ങളും റിപ്പോർട്ട് ചെയ്തിട്ടുണ്ട്, പോസിറ്റീവിറ്റി നിരക്ക് 22.77 ശതമാനമാണ്. ഇക്കാലയളവിൽ നടത്തിയ ടെസ്റ്റുകളുടെ എണ്ണത്തിലും കുറവുണ്ടായി. ജനുവരി 23 ന് 2,20,459 ടെസ്റ്റുകൾ നടത്തിയപ്പോൾ, ഞായറാഴ്ച 1,29,337 ടെസ്റ്റുകൾ നടത്തിയതായി സംസ്ഥാന സർക്കാർ അറിയിച്ചു.
ഞായറാഴ്ച, ബെംഗളൂരു അർബനിൽ 3,822 പുതിയ കേസുകളും 17 മരണങ്ങളും റിപ്പോർട്ട് ചെയ്തു. മൈസൂരിൽ 582 പുതിയ കോവിഡ് -19 കേസുകളും മൂന്ന് മരണങ്ങളും തുംകുരുവിൽ 318 പുതിയ കേസുകളും ഒരു മരണവും റിപ്പോർട്ട് ചെയ്തു. ബെംഗളൂരു അർബനിൽ മാത്രം 39,654 സജീവ കോവിഡ് -19 കേസുകളുണ്ട്, ബെലഗാവിയിൽ 7,599 കേസുകളുണ്ട്. നിലവിൽ 4,939 സജീവ കേസുകളാണ് മൈസൂരിലുള്ളത്.
