ന്യൂഡൽഹി: ഉത്സവ സീസൺ പ്രമാണിച്ച് സ്പെഷ്യൽ ട്രെയിൻ സർവീസുകൾ പ്രഖ്യാപിച്ച് ഇന്ത്യൻ റെയിൽവേ. ഡൽഹി – പറ്റ്ന വന്ദേ ഭാരത് എക്സ്പ്രസ് ഉൾപ്പെടെയുള്ള സർവീസുകളാണ് റെയിൽവേ നടത്തുക. ദീപാവലി, ഛഠ് പൂജ അവധികളിലെ യാത്രക്കാരുടെ തിരക്ക് പ്രമാണിച്ചാണ് റെയിൽവേയുടെ പുതിയ നീക്കം. ആറ് സ്റ്റോപ്പുകളിലാണ് വന്ദേ ഭാരത് ട്രെയിൻ നിർത്തുകയെന്ന് നോർത്തേൺ റെയിൽവേ ചീഫ് പബ്ലിക് റിലേഷൻ ഓഫീസർ ദീപക് കുമാർ വ്യക്തമാക്കി.ദീപാവലി, ഛഠ് പൂജ ഫെസ്റ്റിവൽ സീസൺ പ്രമാണിച്ച് നിരവധി സ്പെഷ്യൽ ട്രെയിൻ സർവീസുകളാണ് റെയിൽവേ പ്രഖ്യാപിച്ചിരിക്കുന്നത്. റെയിൽവേ 4480 സ്പെഷ്യൽ ട്രിപ്പുകൾ ഉത്സവ സീസണിൽ നടത്തുമെന്ന് റെയിൽവേ മന്ത്രി അശ്വിനി വൈഷ്ണവും വ്യക്തമാക്കിയിരുന്നു.
ന്യൂഡൽഹി – പറ്റ്ന (02250) വന്ദേ ഭാരത് എക്സ്പ്രസ് രാവിലെ 7:25ന് സർവീസ് ആരംഭിച്ച് വൈകീട്ട് 7 മണിയ്ക്ക് പറ്റ്നയിൽ എത്തിച്ചേരുമെന്ന് നോർത്തേൺ റെയിൽവേ സിപിആർഒ ദീപക് കുമാർ പറഞ്ഞു. നവംബർ 11, 14, 16 തീയതികളിലും ട്രെയിൻ സർവീസ് ഉണ്ടാകും. മടക്കയാത്ര 02251 നമ്പർ ട്രെയിൻ പറ്റ്ന ജങ്ഷനിൽനിന്ന് ഡൽഹിയിലേക്ക് നവംബർ 12, 15, 17 തീയതികളിലാണ് സർവീസ് നടത്തുക. പറ്റ്ന ജങ്ഷനിൽനിന്ന് രാവിലെ ഏഴുമണിയ്ക്ക് പുറപ്പെട്ട് വൈകീട്ട് ഏഴ് മണിയ്ക്ക് ഡൽഹിയിൽ എത്തിച്ചേരുന്ന വിധത്തിലാണ് ഈ സർവീസ്.
ആരാഹ് ജങ്ഷൻ, ബക്സർ, പണ്ഡിറ്റ് ദീൻ ദയാൽ ഉപാധ്യായ ജങ്ഷൻ, പ്രയാഗ്രാജ് ജംഗ്ഷൻ, കാൺപൂർ സെൻട്രൽ എന്നിവിടങ്ങളിലാണ് ട്രെയിനിന് സ്റ്റോപ്പുണ്ടാവുക. ഈസ്റ്റേൺ റെയിൽവേ 42 സ്പെഷ്യൽ ട്രെയിനുകളാണ് ഉത്സവ സീസണിൽ പ്രഖ്യാപിച്ചിരിക്കുന്നത്. 512 ട്രിപ്പുകളാണ് ഇവ നടത്തുക. വെസ്റ്റേൺ റെയിൽവേ 36 സ്പെഷ്യൽ ട്രെയിനുകളാണ് പ്രഖ്യാപിച്ചിരിക്കുന്നത്. ഉത്സവ സീസണിൽ 1262 പ്രത്യേക സർവീസുകൾ വെസ്റ്റേൺ റെയിൽവേ നടത്തും.
ഉത്സവകാലത്ത് രാജ്യത്തെ പ്രധാന നഗരങ്ങളെ ബന്ധിപ്പിച്ച് പ്രത്യേക സർവീസുകൾ നടത്തുമെന്ന് ഇന്ത്യൻ റെയിൽവേ നേരത്തെ വ്യക്തമാക്കിയിരുന്നു. ഡൽഹി – പറ്റ്ന, ധൻപുർ – ബെംഗളൂരു, മുസാഫർപുർ – യശ്വന്ത്പുർ, പുരി – പറ്റ്ന, കൊച്ചുവേളി – ബെംഗളൂരു തുടങ്ങിയ നഗരങ്ങളിലേക്കാണ് ഈ സർവീസ്. കഴിഞ്ഞവർഷം ഉത്സവകാലത്ത് 216 പൂജ സ്പെഷ്യൽ ട്രെയിനുകളിലായി 2614 ട്രിപ്പുകളായിരുന്നു റെയിൽവേ നടത്തിയത്.നോർത്ത് വെസ്റ്റേൺ റെയിൽവേ 24 ട്രെയിനുകളാണ് ഉത്സവ സീസണിൽ പ്രഖ്യാപിച്ചിരിക്കുന്നത്. യാത്രക്കാരുടെ തിരക്ക് പ്രമാണിച്ച് 1208 സർവീസുകളാണ് നടത്തുക.
