ബംഗളൂരു: കര്‍ണാടകയില്‍ നടന്നുകൊണ്ടിരിക്കുന്ന മതപരമായ വിഭജനത്തില്‍ ആശങ്കയറിയിച്ച്‌ ബയോകോണ്‍ ലിമിറ്റഡിന്റെ എക്സിക്യൂട്ടീവ് ചെയര്‍പേഴ്സണ്‍ കിരണ്‍ മജുംദാര്‍ ഷാ. ഈ വര്‍ഗീയ വിഭജനം ഇന്ത്യയുടെ സാങ്കേതിക തലസ്ഥാനത്തെ സാരമായി ബാധിക്കുമെന്നും ടെക്, ബയോടെക് മേഖലകളിലെ രാജ്യത്തിന്റെ “ആഗോള നേതൃത്വത്തെ” വരെ അപകടത്തിലാക്കാന്‍ സാധ്യതയുണ്ടെന്നും അവര്‍ മുന്നറിയിപ്പ് നല്‍കി.
‘സംസ്ഥാനത്ത് വര്‍ധിക്കുന്ന മതപരമായ ഭിന്നത പരിഹരിക്കാനുള്ള നടപടികള്‍ എത്രയും പെട്ടെന്ന് സ്വീകരിക്കണം’ – ബുധനാഴ്ച കര്‍ണാടക മുഖ്യമന്ത്രി ബസവരാജ് ബൊമ്മെയെ ടാഗ് ചെയ്ത് കിരണ്‍ മജുംദാര്‍ ട്വീറ്റ് ചെയ്തു. കര്‍ണാടക മുഖ്യമന്ത്രി വളരെ പുരോഗമനവാദിയായ നേതാവാണെന്നും അദ്ദേഹം ഉടന്‍ തന്നെ ഈ പ്രശ്നങ്ങള്‍ പരിഹരിക്കുമെന്ന് തനിക്ക് ഉറപ്പുണ്ടെന്നും അവര്‍ തുടര്‍ന്നുള്ള ട്വീറ്റില്‍ കൂട്ടിച്ചേര്‍ത്തു.
വി.എച്ച്‌.പി , ബജ്റംഗ്ദള്‍ തുടങ്ങിയ തീവ്ര ഹിന്ദു ഗ്രൂപ്പുകളുടെ സമ്മര്‍ദ്ദത്തില്‍ ദക്ഷിണ കന്നഡയിലെയും ശിവമോഗയിലെയും ക്ഷേത്രോത്സവങ്ങളില്‍ നിന്ന് മുസ്ലീം വ്യാപാരികള്‍ക്ക് കഴിഞ്ഞ ആഴ്ച വിലക്കേര്‍പ്പെടുത്തിയിരുന്നു. ഈ തീരുമാനത്തിന് നി‍യമസാധുതയുണ്ടെന്നാണ് സംസ്ഥാന നിയമസഭയില്‍ നടത്തിയ ഔദ്യോഗിക പ്രസ്താവനയില്‍ കര്‍ണാടക സര്‍ക്കാര്‍ പറഞ്ഞത്.
