വാസ്കോ: ആദ്യപാദത്തില്‍ സഹല്‍ മാജിക് ആയിരുന്നെങ്കില്‍ രണ്ടാം പാദത്തില്‍ ലൂനയുടെ ഊഴമായിരുന്നു. ഒരു നിമിഷത്തെ മാന്ത്രികതയില്‍ ഉറുഗ്വായ് മാസ്റ്ററുടെ വലങ്കാലില്‍നിന്ന് വളഞ്ഞുപാഞ്ഞ പന്തില്‍ കേരള ബ്ലാസ്റ്റേഴ്സിന്റെ ഫൈനല്‍ ടിക്കറ്റും ചേര്‍ത്തുവെച്ചിട്ടുണ്ടായിരുന്നു. ലീഗ് റൗണ്ടില്‍ ഒന്നാമന്മാരായി വിന്നേഴ്സ് ഷീല്‍ഡ് അവകാശികളായ ജാംഷഡ്പൂരിന്റെ വെല്ലുവിളി രണ്ടാം സെമിയില്‍ അതിജീവിച്ചാണ് നാലാം സ്ഥാനക്കാരായ ബ്ലാസ്റ്റേഴ്സ് ആറു വര്‍ഷത്തെ ഇടവേളക്കുശേഷം ഇന്ത്യന്‍ സൂപ്പര്‍ ലീഗിന്റെ ഫൈനലിലേക്ക് മുന്നേറിയത്.
ഇരുപാദ സെമിയില്‍ 2-1ന് കീഴടക്കിയാണ് ഇവാന്‍ വുകോമാനോവിചിന്റെ ടീം കലാശക്കളിയിലേക്ക് ടിക്കറ്റുറപ്പിച്ചത്. രണ്ടാം പാദ സെമി 1-1ന് സമനിലയില്‍ അവസാനിച്ചെങ്കിലും ആദ്യപാദത്തിലെ 1-0 മുന്‍തൂക്കം മഞ്ഞപ്പടയെ ഫൈനലിലെത്തിക്കുകയായിരുന്നു. ഹൈദരാബാദ് എഫ്.സി-എ.ടി.കെ മോഹന്‍ ബഗാന്‍ രണ്ടാം സെമി ഫൈനല്‍ വിജയികളുമായി ഈമാസം 20നാണ് ഫൈനല്‍. ബ്ലാസ്റ്റേഴ്സിന്റെ മൂന്നാം ഫൈനലാണിത്. 2014ലെ പ്രഥമ സീസണിലും 2016ലും ബ്ലാസ്റ്റേഴ്സ് കലാശക്കളിയിലെത്തിയെങ്കിലും റണ്ണറപ്പ് ട്രോഫിയുമായി തൃപ്തിപ്പെടാനായിരുന്നു വിധി. 18ാം മിനിറ്റില്‍ സൂപ്പര്‍ പ്ലേമേക്കര്‍ അഡ്രിയാന്‍ ലൂനയുടെ മനോഹര ഗോളില്‍ ബ്ലാസ്റ്റേഴ്സാണ് ലീഡെടുത്തത്. രണ്ടാം പകുതിയില്‍ 50ാം മിനിറ്റില്‍ പ്രണോയ് ഹല്‍ദാറിന്റെ ഗോളിലാണ് ജാംഷഡ്പൂര്‍ ഒപ്പംപിടിച്ചത്. ലൂനയാണ് കളിയിലെ കേമന്‍.
വാസ്കോയിലെ തിലക് മൈതാനത്ത് സമനില സ്വന്തമാക്കിയാലും ഫൈനലിലെത്താമെന്ന അവസ്ഥയായിരുന്നെങ്കിലും ജയം ലക്ഷ്യമിട്ടായിരുന്നു ബ്ലാസ്റ്റേഴ്സ് തുടക്കം മുതല്‍ പന്തുതട്ടിയത്. ആദ്യ പത്ത് മിനിറ്റിനുള്ളില്‍ തന്നെ ബ്ലാസ്റ്റേഴ്സ് രണ്ടു തവണ ഗോളിനടുത്തെത്തുകയും ചെയ്തു. രണ്ടാം മിനിറ്റില്‍ മൈതാനമധ്യത്തുനിന്ന് പന്ത് ക്ലിയര്‍ ചെയ്യാനുള്ള എതിര്‍താരത്തിന്റെ ശ്രമത്തില്‍നിന്ന് ലഭിച്ച പന്തുമായി ഒറ്റക്ക് മുന്നേറിയ അല്‍വാരോ വാസ്ക്വസ് ജാംഷഡ്പൂര്‍ ഗോളി ടി.പി. രഹ്നേഷ് മാത്രം മുന്നില്‍ നില്‍ക്കെ പുറത്തേക്കടിച്ചത് അവിശ്വസനീയതയോടെയാണ് ബ്ലാസ്റ്റേഴ്സ് ബെഞ്ച് കണ്ടത്. ഗോളിക്ക് മുകളിലൂടെ ചിപ് ചെയ്യാനുള്ള സ്പാനിഷ് സ്ട്രൈക്കറുടെ ശ്രമം പാളുകയായിരുന്നു.
നിമിഷങ്ങള്‍ക്കകം ജാംഷഡ്പൂര്‍ നായകന്‍ പീറ്റര്‍ ഹാര്‍ട്‍ലിയുടെ ശ്രമം പാളിയപ്പോള്‍ ചാടിവീണ ജോര്‍ഹെ ഡയസിന്റെ കാലില്‍ തട്ടിയ പന്ത് ബാറിലിടിച്ചാണ് മടങ്ങിയത്. ഇതിനുപിന്നാലൊയിരുന്നു 18ാം മിനിറ്റില്‍ ലൂനയുടെ ഗോള്‍. ഇടതുവിങ്ങിലൂടെ കയറി വാസ്ക്വസ് നലകിയ പാസില്‍ ലൂനയുടെ വലങ്കാലില്‍നിന്ന് മനോഹരമായ ഫിനിഷിങ്. ഇടവേളക്കുശേഷം രണ്ടും കല്‍പിച്ച്‌ ആക്രമിച്ചുകയറിയ ജാംഷഡ്പൂരിന് ആവേശമേകി അഞ്ചു മിനിറ്റിനകം ഗോളെത്തി. ഗോള്‍വലക്കുമുന്നിലെ കൂട്ടപ്പൊരിച്ചിലിനൊടുവില്‍ ഹല്‍ദാര്‍ പന്ത് വലയിലേക്ക് തട്ടിയിടുകയായിരുന്നു.
നിമിഷങ്ങള്‍ക്കകം ജാംഷഡ്പൂര്‍ നായകന്‍ പീറ്റര്‍ ഹാര്‍ട്‍ലിയുടെ ശ്രമം പാളിയപ്പോള്‍ ചാടിവീണ ജോര്‍ഹെ ഡയസിന്റെ കാലില്‍ തട്ടിയ പന്ത് ബാറിലിടിച്ചാണ് മടങ്ങിയത്. ഇതിനുപിന്നാലൊയിരുന്നു 18ാം മിനിറ്റില്‍ ലൂനയുടെ ഗോള്‍. ഇടതുവിങ്ങിലൂടെ കയറി വാസ്ക്വസ് നലകിയ പാസില്‍ ലൂനയുടെ വലങ്കാലില്‍നിന്ന് മനോഹരമായ ഫിനിഷിങ്. ഇടവേളക്കുശേഷം രണ്ടും കല്‍പിച്ച്‌ ആക്രമിച്ചുകയറിയ ജാംഷഡ്പൂരിന് ആവേശമേകി അഞ്ചു മിനിറ്റിനകം ഗോളെത്തി. ഗോള്‍വലക്കുമുന്നിലെ കൂട്ടപ്പൊരിച്ചിലിനൊടുവില്‍ ഹല്‍ദാര്‍ പന്ത് വലയിലേക്ക് തട്ടിയിടുകയായിരുന്നു.
അതിനിടെ താരത്തിന്റെ കൈയില്‍ പന്തുതട്ടിയെങ്കിലും റഫറി വിളിച്ചില്ല. പിന്നീടുള്ള സമയം സമനില ഗോളിനായി ജാംഷഡ്പൂര്‍ ആര്‍ത്തലച്ചെങ്കിലും ബ്ലാസ്റ്റേഴ്സ് തരിമ്ബും വിട്ടുകൊടുത്തില്ല. ഇടക്ക് പ്രത്യാക്രമണവുമായി കയറിയ ബ്ലാസ്റ്റേഴ്സ് വാസ്ക്വസിലൂടെയും മാര്‍കോ ലെസ്കോവിചിലൂടെയും ഗോളിനടുത്തെത്തുകയും ചെയ്തു. ഒടുവില്‍ സമനിലയില്‍നില്‍ക്കെ തന്നെ റഫറി ഹരീഷ് കുന്‍ഡുവിന്റെ ഫൈനല്‍ വിസിലെത്തിയതോടെ ബ്ലാസ്റ്റേഴ്സ് താരങ്ങളും കോച്ചിങ് സ്റ്റാഫും ആഘോഷത്തിമിര്‍പ്പിലേക്ക്.
