ബെംഗളൂരു: അടിമുടി മാറ്റത്തിൻ്റെ പാതയിലാണ് ബെംഗളൂരു നഗരം. മട്രോ പദ്ധതി വിപുലീകരണം മുതൽ കുടിവെള്ള പദ്ധതികളിൽ വരെ മാറ്റങ്ങൾ കൊണ്ടുവരികയാണ് സർക്കാർ. ബെംഗളൂരുവിലെ തെരുവു വിളക്കുകൾ പൂർണമായും എൽഇഡിയിലേക്ക് മാറ്റാനുള്ള നീക്കത്തിലാണ് കർണാടക സർക്കാർ. തെരുവുവിളക്കുകൾ എൽഇഡിയിലേക്ക് മാറ്റാനുള്ള പദ്ധതിക്ക് കർണാടക സർക്കാർ അംഗീകാരം നൽകി. 684 കോടി രൂപയാണ് പദ്ധതിച്ചെലവ്.
ബൃഹത് ബംഗളൂരു മഹാനഗര പാലിക (ബിബിഎംപി) മുന്നോട്ട് വെച്ച നിർദേശം കർണാടക സർക്കാർ അംഗീകരിക്കുകയായിരുന്നു.ഓഗസ്റ്റ് 22ന് ചേർന്ന മന്ത്രിസഭാ യോഗം ബിബിഎംപിയുടെ നിർദേശത്തിന് അംഗികാരം നൽകി. ഏഴ് സോണുകളിലായി നാല് പാക്കേജുകളിലായാണ് പദ്ധതി നടപ്പാക്കുകയെന്ന് മന്ത്രി എച്ച് കെ പാട്ടീൽ പറഞ്ഞു. ബാംഗ്ലൂർ ഇലക്‌ട്രിസിറ്റി സപ്ലൈ കമ്പനി ലിമിറ്റഡ്(ബെസ്‌കോം) ആകും പദ്ധതിച്ചെലവിനാവശ്യമായ തുക കൈമാറുക.
സാധാരണയായി ഉപയോഗിക്കുന്ന ബൾബായ സോഡിയം-വേപ്പർ വഴിവിളക്കുകൾക്ക് കൂടുതൽ വൈദ്യുതി ആവശ്യമാണ്. ഇതോടെ കർണാടകയിലെ വിവിധ നഗരങ്ങൾ എൽഇഡി ലൈറ്റുകൾ ഉപയോഗിക്കാൻ ആരംഭിച്ചിരുന്നു. ഈ മാതൃകയാണ് ബെംഗളൂരു നഗരത്തിൽ ബിബിഎംപി പിന്തുടരുക. എൽഇഡി ലൈറ്റുകൾ ഉപയോഗിക്കുന്നതോടെ പഴയ ലൈറ്റുകളുടെ വാർഷിക വൈദ്യുതി ഉപഭോഗത്തിൻ്റെ 50 ശതമാനം വരെ ലാഭിക്കുമെന്ന് പ്രതീക്ഷ.
മഹാദേവപുര പോലുള്ള ബിബിഎംപി സോണുകളിൽ എൽഇഡി തെരുവുവിളക്കുകൾ സ്ഥാപിച്ചിട്ടുണ്ട്. ഏഴ് സോണുകളിലായി ഏകദേശം 4.6 ലക്ഷം തെരുവ് വിളക്കുകൾ സ്ഥാപിച്ചിരുന്നു. ഏകദേശം 1.6 ലക്ഷം എൽഇഡി ലൈറ്റുകൾ സ്ഥാപിച്ചിട്ടുണ്ട്. നഗരത്തിലെ മൂന്ന് ലക്ഷം പഴയ മാതൃകയിലുള്ള തെരുവുവിളക്കുകൾ മാറ്റി എൽഇഡി ലൈറ്റുകൾ സ്ഥാപിക്കാനാണ് ബിബിഎംപിയുടെ തീരുമാനം.
നിലവിലുള്ള മൂന്ന് ലക്ഷത്തോളം പരമ്പരാഗത ലൈറ്റുകൾ നീക്കി എൽഇഡി ലൈറ്റുകൾ സ്ഥാപിക്കുന്നതുവഴി വൈദ്യുതി ബില്ലിൽ 50 ശതമാനം ലാഭിക്കാൻ സാധിക്കുമെന്നാണ് ബിബിഎംപി വ്യക്തമാക്കുന്നത്. നഗരത്തിൽ 5 ലക്ഷത്തിലധികം തെരുവ് വിളക്കുകൾ ഉണ്ടെന്ന് ബിബിഎംപി വൃത്തങ്ങൾ പറയുന്നത്. പ്രതിവർഷം ഏകദേശം 300 കോടി രൂപ വൈദ്യുതി ബില്ലാകുന്നുണ്ട്. എൽഇഡി ലാമ്പുകളിലേക്ക് മാറുന്നതിലൂടെ ബില്ലിൽ 50 ശതമാനത്തിലധികം ലാഭിക്കാനാകുമെന്ന് അധികൃതർ കണക്കാക്കുന്നത്.
പഴയ വഴിവിളക്കുകൾ നീക്കി പുതിയത് സ്ഥാപിക്കാനുള്ള നീക്കം മാസങ്ങൾക്ക് മുൻപ് ആരംഭിച്ചിരുന്നു. ലോക്‌സഭാ തെരഞ്ഞെടുപ്പിന് ശേഷം ഉടൻ ടെൻഡർ സമർപ്പിക്കുമെന്ന് ബിബിഎംപി അറിയിച്ചിരുന്നു.
