ബെംഗളൂരു: ചിന്നസ്വാമി സ്റ്റേഡിയത്തിൽ നടക്കുന്ന ഐപിഎൽ മത്സരത്തിൻ്റെ പശ്ചാത്തലത്തിൽ ബെംഗളൂരുവിൽ ഇന്ന് ഗതാഗത ക്രമീകരണം. ഉച്ചകഴിഞ്ഞ് മൂന്നു മണിമുതൽ രാത്രി 11 വരെയാണ് പോലീസ് ഗതാഗത ക്രമീകരണം ഏർപ്പെടുത്തിയിരിക്കുന്നത്. ഹോം ഗ്രൗണ്ടായ ചിന്നസ്വാമി സ്റ്റേഡിയത്തിൽ ഇന്ന് ബെംഗളൂരു റോയൽ ചലഞ്ചേഴസ്, ലക്നൗ സൂപ്പർ ജയൻ്റ്സിനെയാണ് നേരിടുക. രാത്രി 7:30ന് മത്സരം ആരംഭിക്കും.നഗരത്തിലെ ക്വീൻസ് റോഡ്, എംജി റോഡ്, എംജി റോഡിൽനിന്ന് കബ്ബൺ റോഡിലേക്കുള്ള ഭാഗം, രാജ്ഭവൻ റോഡ്, സെൻട്രൽ സ്ട്രീറ്റ് റോഡ്, കബ്ബൺ റോഡ്, സെൻ്റ് മാർക്ക്സ് റോഡ്, മ്യൂസിയം റോഡ്, കസ്തൂർബ റോഡ്, അംബേദ്കർ വീഥി റോഡ്, ട്രിനിറ്റി ജങ്ഷൻ. ലാവല്ലേ റോഡ്, വിട്ടൽ മല്യ റോഡ്, കിങ്സ് റോഡ്, നൃപതുങ്ക റോഡ് എന്നിവിടങ്ങളിൽ പാർക്കിങ് നിരോധിച്ചതായി പോലീസ് അറിയിച്ചു.
സെൻ്റ് ജോസഫ്സ് ഇന്ത്യൻ ഹൈസ്കൂൾ ഗ്രൗണ്ട്, യുബി സിറ്റി, ശിവാജിനഗർ ബിഎംറ്റിസി ഫസ്റ്റ് ഫ്ലോർ, ഓൾഡ് കെജിഐഡി ബിൽഡിങ്, കിങ്സ് റോഡ് (കബ്ബൺ പാർക്കിനുള്ളിൽ) എന്നിവിടങ്ങളിൽ വാഹനങ്ങൾ പാർക്ക് ചെയ്യാമെന്നും പോലീസ് വ്യക്തമാക്കി.അതേസമയം ഐപിഎൽ മത്സരത്തിൻ്റെ പശ്ചാത്തലത്തിൽ ബെംഗളൂരു മെട്രോ സർവീസ് ഇന്ന് രാത്രി 11:30 വരെ തുടരും. നാല് മെട്രോ ടെർമിനലുകളിൽ നിന്നും രാത്രി 11:30 വരെ സർവീസുകൾ ഉണ്ടാകുമെന്ന് ബെംഗളൂരു മെട്രോ റെയിൽ കോർപറേഷൻ ലിമിറ്റഡ് (ബിഎംആർസിഎൽ) അറിയിച്ചു. ദീർഘദൂര യാത്രക്കാർക്ക് ലാഭകരമാകുന്ന പേപ്പർ ടിക്കറ്റ് സംവിധാനവും ബിഎംആർസിഎൽ ഒരുക്കിയിട്ടുണ്ട്. 50 രൂപ നിരക്കിലുള്ള പേപ്പർ ടിക്കറ്റ് ഉപയോഗിച്ചു യാത്രക്കാർക്ക് ഏതു മെട്രോ സ്റ്റേഷനുകളിലേക്കും ഒറ്റത്തവണ യാത്ര ചെയ്യാനാകും.
