തിരുവനന്തപുരം: സംയുക്ത ട്രേഡ് യൂണിയന് ആഹ്വാനം ചെയ്ത 48 മണിക്കൂര് പൊതുപണിമുടക്ക് ആരംഭിച്ചു. നാളെ രാത്രി 12 മണി വരെയാണ് പണിമുടക്ക്. ബിഎംഎസ് ഒഴികെയുള്ള ഇരുപതോളം സംഘടനകള് പണിമുടക്കില് പങ്കെടുക്കുന്നുണ്ട്. സ്വകാര്യ വാഹനങ്ങള് റോഡിലിറക്കരുതെന്ന് യൂണിയനുകള് ആഹ്വാനം ചെയ്തിട്ടുണ്ട്. കട കമ്ബോളങ്ങള് അടച്ചിടണമെന്ന് യൂണിയനുകള് ആവശ്യപ്പെട്ടിട്ടുണ്ടെങ്കിലും പണിമുടക്കിനോട് സഹകരിക്കില്ലെന്ന് വ്യാപാരി വ്യവസായി ഏകോപന സമിതി അറിയിച്ചിട്ടുണ്ട്.
തുറക്കുന്ന കടകള്ക്ക് സംരക്ഷണം ആവശ്യപ്പെട്ട് വ്യാപാരികള് മുഖ്യമന്ത്രിക്ക് കത്ത് നല്കിയിട്ടുണ്ട്. കഴിഞ്ഞ നാല് ദിവസമായി സ്വകാര്യ ബസ് സമരത്തില് നട്ടം തിരിഞ്ഞ കേരളത്തിലെ സാധാരണക്കാര്ക്ക് രണ്ടു ദിവസത്തെ പണിമുടക്ക് കൂടുതല് ആഘാതം സൃഷ്ടിക്കും. പാല്, പത്രം,ആശുപത്രി, കോവിഡ് പ്രതിരോധ പ്രവര്ത്തനങ്ങള്, വിദേശ വിനോദ സഞ്ചാരികളുടെ യാത്ര തുടങ്ങിയ മേഖലകളെ പണിമുടക്കില് നിന്ന് ഒഴിവാക്കിയിട്ടുണ്ട്. ബാങ്ക് ജീവനക്കാരുടെ എല്ലാ സംഘടനകളും പണിമുടക്കില് പങ്കെടുക്കുന്നില്ലെങ്കിലും മിക്ക ബാങ്കുകളും പ്രവര്ത്തിക്കാന് സാധ്യതയില്ല. എടിഎമ്മുകളില് ആവശ്യത്തിന് പണമുണ്ടെന്ന് ബാങ്കുകള് അറിയിച്ചു.
കല്ക്കരി, ഉരുക്ക്, എണ്ണ, ടെലികോം, തപാല്, ആദായ നികുതി, ഇന്ഷുറന്സ് തുടങ്ങി വിവിധ മേഖലകളിലെ തൊഴിലാളികള് പണിമുടക്കില് പങ്കെടുക്കുമെന്ന് പ്രതീക്ഷിക്കുന്നതായി തൊഴിലാളി യൂണിയനുകള് പ്രസ്താവനയില് വ്യക്തമാക്കി. ആശുപത്രി, വിമാനത്താവളം, റെയില്വേ സ്റ്റേഷന് എന്നിവിടങ്ങളിലേക്ക് കെഎസ്ആര്ടിസി പരമാവധി സര്വീസുകള് നടത്തുമെന്ന് മന്ത്രി ആന്റണി രാജു അറിയിച്ചു.
